މަޝްއަރު ޓުއާސްގެ ވެރިންނަށް ދައުވާކުރަން ފޮނުވައިފި

މިދިޔަ އަހަރުގެ ރޯދަ މަހު އުމްރާއަށް މީހުން ގެންގޮސް ހާލުގައި ޖެއްސި އަލް-މަޝްއަރު ޓުއާސްގެ ވެރިންނަށް ދައުވާކުރަން ޕްރޮސިކިއުޓާ ޖެނެރަލްގެ އޮފީހަށް ފުލުހުން ފޮނުވައިފި އެވެ.

ފުލުހުންގެ އޮފިޝަލަކު މިއަދު "މިހާރު"އަށް ވިދާޅުވީ މަޝްއަރު ޓުއާސްގެ މަކަރާއި ހީލަތުގެ ތިން މައްސަލައެއް ފުލުހުން ބަލަމުން އަންނަ ކަމަށެވެ. އޭގެ ތެރެއިން އެއް މައްސަލާގައި ދައުވާކުރަން ޕީޖީއަށް މިހާރު ފޮނުވާފައިވާ ކަމަށް އޮފިޝަލް ވިދާޅުވި އެވެ.

ބާކީ އޮތް ދެ މައްސަލާގައި ދައުވާކުރަން ފޮނުވުމުގެ ކުރިން، ޕީޖީއާ އެކު މަޝްވަރާ ކުރަމުންދާ ކަމަށް ވެސް އޮފިޝަލް ވިދާޅުވި އެވެ.

މީގެ ފަސް އަހަރު ކުރިން އުފެއްދި މަޝްއަރު ޓުއާސް އަކީ ހައްޖަށް މީހުން ގެންދިއުމުގެ ހުއްދަ ބާތިލްކޮށްފައިވާ ގްރޫޕެއް ކަމަށްވާ އަލް-މަޝްއަރު ހައްޖު އެންޑް އުމްރާ ވެސް ހިންގާ "އަލް-މަޝްއަރު ޕްރައިވެޓް"ގެ ދަށުން އުފައްދާފައިވާ ޓްރެވަލް އެޖެންސީއެކެވެ. އެ ކުންފުނީގެ ޑިރެކްޓަރުންގެ ބޯޑުގައި ތިބެނީ އަލީ ފާރިޝް އާއި މޫސާ ޔާމީން އެވެ.

މަޝްއަރު ޓުއާސްގެ މައްސަލަ މިދިޔަ އަހަރުގެ އެޕްރީލް މަހު ފުލުހުންނަށް ހުށަހެޅީ އިސްލާމިކް މިނިސްޓްރީންނެވެ.

މިދިޔަ އަހަރުގެ ރޯދަ މަހު މަޝްއަރު ޓުއާސް އިން އުމްރާއަށް ގެންދިޔަ ބަޔަކު ހާލުގައި ޖެހި، އެނބުރި މާލެ އާދެވޭނެ ގޮތެއް ނެތި ސައޫދީ އަރަބިއްޔާގައި ތާށިވި އެވެ. އެއީ އުމްރާއަށް މީހުން ގެންދިއުމުގެ ހުއްދަ އިސްލާމިކް މިނިސްޓްރީ ދީފައި އޮތް ބައެއް ނޫނެވެ. އޭރު ބެލިބެލުމުން އެނގުނު ގޮތުގައި، އެ ކުންފުންޏަކީ މިނިސްޓްރީން ހުއްދަ ބާތިލުކޮށްފައި އޮތް ބައެކެވެ. އެ ކުންފުންޏަށް ދިން ހުއްދަ ބާތިލުކޮށްފައި އޮތުމުން ވަކިން ޓުއާ އެޖެންސީއެއް ހަދައިގެން އާންމުންނަށް އޮޅުވާލައިގެން އުމްރާއަށް ގެންދިޔައީ އެވެ.

މަޝްއަރު ޓުއާސްގެ ހަވާލުގައި ދިޔަ މީހުން މައްކާގައި ތާށިވީ އެ މީހުންގެ ރިޓާން ޓިކެޓް ނަގަން ޓްރެވަލް އެޖެންޓަށް ދިން ފައިސާގެ ޗެކު ބައުންސް ވުމުންނެވެ. އެކަމަކު އުމްރާ އަށް ފުރުމުގެ ކުރިން އެންމެންގެ އަތުން ހުރީ ދެކޮޅު ޓިކެޓާއި ކެއުމާއި ހުރުމުގެ ހުރިހާ ހަރަދަކަށް ވާ ފައިސާ ނަގައިފަ އެވެ.

Halleh nuvi, anekkaa ves hurihaa bura eh sarukaarah!

The most trusted news source in the Maldives

Mihaaru

އެ މައްސަލާގައި މަޝްއަރު ޓުއާސް އާއި މިނިސްޓްރީއާ ދެމެދުގައި ވެސް މުއާމަލާތްތައް ކުރި އެވެ. އެންމެފަހުން އެ މީހުން ރާއްޖެ އައީ ރާއްޖެ އަންނަން އޮތް ތާރީހަށް ވުރެ ހަފުތާއަކަށް ވުރެ ގިނަ ދުވަސް ވީ ފަހުންނެވެ. އެ މުއްދަތުގައި އެ މީހުން މައްކާގައި ތިބުމުގެ ހުރިހާ ހަރަދެއް ހަމަޖެއްސީ އެ މީހުންގެ އަމިއްލަ ޖީބުންނެވެ. އަދި ރިޓާން ޓިކެޓް ވެސް ނެގީ އަމިއްލަ އަތުން ހަރަދުކޮށްގެންނެވެ.

މަޝްއަރު ޓުއާސްގެ ވެރިންނަށް ދައުވާކުރަން ފޮނުވި އިރު، އުމްރާއަށް މީހުން ގެންދިއުމުގެ ހުއްދަ އޮވެ، ބަޔަކު އުމްރާއަށް ގެންގޮސް ހާލުގައި ޖެއްސުވި އެހެން މައްސަލައެއް މިހާރު ވަނީ ފެންމަތިވެފަ އެވެ. އެއީ އަލް-ހިޖްރަ ޓްރެވަލް އެންޑް ޓުއާސް ޕްރައިވެޓް ލިމިޑެޓުގެ ހަވާލުގައި އުމްރާއަށް ގެންދިޔަ މީހުންނެވެ.