ސްވައިން ފްލޫ ޖެހުނު މާބަނޑު މީހާ އާއި ސިޒޭރިއަން ހަދައިގެން ނެގި އޭނާގެ ދަރިފުޅުގެ ހާލު ވެސް ވަރަށް ދެރަ ކަމަށް އައިޖީއެމްއެޗުން މިއަދު ބުނެފި އެވެ.
ސްވައިން ފްލޫ އަށް ޕޮޒިޓިވްވި މާބަނޑު މީހާ އައިޖީއެމްއެޗަށް ގެނައީ ހދ. ކުޅުދުއްފުށީ ހޮސްޕިޓަލުންނެވެ. ވެންޓިލޭޓަރުގައި ބާއްވައިގެން ފަރުވާދެމުން އަންނަ މީހާގެ ހާލު ސީރިއަސްކަމުން، ސިޒޭރިއަން ހަދައިގެން އޭނާގެ ދަރިފުޅު ނެގީ ރޭގެ ވަގުތެއްގަ އެވެ. އެނގިފައިވާ ގޮތުގައި އޭނާގެ ބަނޑަށް އަދި ފަސް މަހެވެ.
އައިޖީއެމްއެޗުގެ އޮފިޝަލަކު މިއަދު ވިދާޅުވީ އަންހެން މީހާގެ ހާލަތަށް ބަދަލެއް ނާންނަ ކަމަށެވެ. ދަރިފުޅުގެ ވެސް ހާލު ދެރަކަމަށާއި ދެމައިންނަށް ފަރުވާދެމުން އަންނަ ކަމަށް ވިދާޅުވި އެވެ.
"ދަރިފުޅު އޮތީ އެންއައިސީޔޫގައި، ދެމައިންގެ ހާލު ވެސް ދެރަ،" އޮފިޝަލް ވިދާޅުވި އެވެ.
މި އަންހެން މީހާ އަކީ، މިހާރު ރާއްޖޭގައި ހަލުއިކަމާ އެކު ފެތުރެމުންދާ ރޯގާގައި މި ވަގުތު އޮތް އެންމެ ހާލު ބޮޑު ބަލި މީހާ ކަމަށް ކަމާ ބެހޭ ފަރާތްތަކުން ރޭ ވަނީ ބުނެފަ އެވެ.