ސުޕްރީމް ކޯޓު "ހުއްޓިފައި" އޮންނާތީ ހުށަހެޅި ދުސްތޫރީ މައްސަލަ ފަނޑިޔާރުންގެ މަޖިލީހާ ހަމައަށް

ސުޕްރީމް ކޯޓުގެ ތިން ފަނޑިޔާރަކު ސަސްޕެންޑު ކުރުމަކީ އެ ކޯޓު ހިންގުން ހުއްޓުވާލުން ކަމަށް ވިދާޅުވެ، އެ ކޯޓު ހިންގޭނެ ގޮތެއް ހަދައިދިނުމަށް އެދި ރައްޔިތުންގެ މަޖިލިހުގެ ކުރީގެ މެމްބަރު އިބްރާހިމް އިސްމާއިލް (އިބްރާ) ސުޕްރީމް ކޯޓަށް ހުށަހެޅި ދުސްތޫރީ މައްސަލަ ބަލައިނުގަތުމަށް އެ ކޯޓުން ނިންމާފައިވާތީ، ފަނޑިޔާރުންގެ މަޖިލީހަށް ހުށަހަޅައިފި އެވެ.

ސުޕްރީމް ކޯޓުގެ ފަނޑިޔާރުންގެ މަޖިލީހަށް މައްސަލަ ހުށަހެޅުމަށް ފަހު، އުއްތަމަ ފަނޑިޔާރު މުއުތަސިމް އަދުނާނަށް އިބްރާ ފޮނުއްވި ސިޓީއެއްގައި ވިދާޅުވީ ސުޕްރީމް ކޯޓުގެ ދެ ފަނޑިޔާރުން ވަކިކުރުމުގެ މައްސަލަ މިހާރު ހިނގަމުންދާ ގޮތަށް ބަލާއިރު ކުރިމަތީގައި އޮތް ނުރައްކަލުން ގައުމު ސަލާމަތް ކުރެވެން އޮތީ ދުސްތޫރީ މައްސަލަ ބަލައި، ގޮތެއް ކަނޑައަޅައިގެން ކަމަށެވެ.

"އަޅުގަނޑު ދެކޭ ގޮތުގައި އެންމެ ކުޑަމިނުން ފަނޑިޔާރުން ވަކިކޮށް ނިމުމުގެ ކުރިން މި މައްސަލައިގައި ފާހަގަކޮށްފައިވާ ގާނޫނީ ސުވާލުތައް ސުޕްރީމް ކޯޓުގެ ޝަރީއަތުގެ މަޖިލީހުގައި އަޑުއެއްސުވުމަކީ ރައްޔިތުންގެ ހައްގު އަދާކުރުމަށްޓަކައި ސުޕްރީމް ކޯޓުން ކޮންމެހެން ކުރެއްވުން ލާޒިމް ކަމެކެވެ،" ސިޓީގައިވެ އެވެ.

އެހެންވެ، އިބްރާ އެދިވަޑައިގަތީ މައްސަލައާ މެދު މިއަދުން މިއަދަށް ގޮތެއް ނިންމޭނެ މަގެއް އޮތް ނަމަ އެ މަގެއް ދައްކަވައި ދެއްވުމަށެވެ.

މިދިޔަ އާދިއްތަ ދުވަހު އިބްރާގެ ފަރާތުން ސުޕްރީމް ކޯޓަށް އެ މައްސަލަ ހުށަހެޅީ އެއީ އަބަދުމެ، ހިނގަހިނގާ އޮންނަން ޖެހޭނެ ތަނެއް ކަމަށް ގާނޫނުއަސާސީ ތަސައްވުރު ކުރާއިރު، ފަނޑިޔާރުންގެ ސަސްޕެންޝަނާ އެކު ކޯޓުގެ ބައެއް މަސައްކަތްތައް ހުއްޓިފައި އޮންނާތީ އެވެ.

އެ މައްސަލަ ހުށަހެޅީ ޖުޑީޝަލް ސާވިސް ކޮމިޝަންއާ ދެކޮޅަށެވެ.

އިބުރާ "މިހާރު" އަށް ވިދާޅުވީ ދުސްތޫރީ ނިޒާމަކީ އެއްކޮށް ގެތިފައި އޮންނަ އެއްޗެއް ކަމެއް ކަމަށާއި އޭގެ ތެރެއިން އެންމެ ނިޒާމެއްގެ މަސައްކަތް ހުއްޓުނަސް މުޅި ނިޒާމް ރޫޅިގެން ދާނެ ކަމަށެވެ. މިހާރު ދުސްތޫރީ ނިޒާމް އޮތީ އެ ހާލަތުގައި ކަމަށާއި މިއީ ހައްލުކުރަން ޖެހޭ ކަމެއް ކަމަށް އޭނާ ވިދާޅުވި އެވެ.

އެންޓި ކޮރަޕްޝަން ކޮމިޝަން (އޭސީސީ) އިން ބަލަން ފެށި މައްސަލައަކާ ގުޅިގެން ސުޕްރީމް ކޯޓުގެ ތިން ފަނޑިޔާރުން ސަސްޕެންޑް ކުރިއިރު، އޭގެ ތެރެއިން ފަނޑިޔާރު ހުސްނުއްސުއޫދު ވަނީ އިސްތިއުފާ ދެއްވައިފަ އެވެ. އަދި ފަނޑިޔާޜު މަހާޒު އަލީ ޒާހިރާއި ފަނޑިޔާރު ޑރ. އަޒްމިރަލްދާ ޒާހިރު އަދިވެސް ތިއްބެވީ ސަސްޕެންޝަންގަ އެވެ. އަދި ކޯޓުގައި މި ވަގުތު ތިއްބެވީ ފަސް ފަނޑިޔާރުންނެވެ. އިބްރާ ވިދާޅުވީ ސުޕްރީމް ކޯޓަށް ހުށަހެޅި މައްސަލައިގެ ތެރޭގައި ފަނޑިޔާރުންގެ ސަސްޕެންޝަން ނިމުމަކަށް ގެންނަން ވެސް އެދިވަޑައިގެންފައިވާނެ ކަމަށެވެ. އޭނާ ވިދާޅުވި ގޮތުގައި އެއީ ޖުޑީޝަލް ސާވިސް ކޮމިޝަން (ޖޭއެސްސީ) އިން އިޖުރާއަތްތަކާ ހިލާފަށް ކޮށްފައިވާ ސަސްޕެންޝަނެއް ކަމަށާއި އެކަމުގެ ވަށައިގެން ވަނީ މުޅިން ވެސް ގޯސް ކަމަށް އޭނާ ވިދާޅުވި އެވެ.

މިހާރު އަމަލުކުރާ ގާނޫނުއަސާސީ އެކުލަވާލި ޑްރާފްޓިން ކޮމިޓީގެ މުގައްރިރުކަން ކުރެއްވި އިބްރާގެ ފަރާތުން އެ މައްސަލަ މީގެ ކުރިން ހައި ކޯޓަށް ވެސް ހުށަހެޅި އެވެ. އެކަމަކު، އެ ކޯޓުން ވެސް ނިންމީ އެ މައްސަލަ ބަލައިނުގަތުމަށެވެ.

ސުޕްރީމް ކޯޓުގެ ދެ ފަނޑިޔާރުން ވަކިކުރުމުގައި އިޖުރާއީ ގޯސްތަކެއްވާ ކަމުގެ ކަންބޮޑުވުންތައް އޮއްވައި، ދެ ފަނޑިޔާރުން ވަކިކުރުމުގެ މައްސަލަ މިއަދު މަޖިލީހުގެ ޖަލްސާއަށް ވަނީ އެޖެންޑާކޮށްފަ އެވެ.