ގޯތި ނުދީ އުތުރުތިލަފަޅުގައި އެހެން ކަންކަން ކުރަން އުޅޭތީ ކަންބޮޑުވުން ފާޅުކޮށްފި

މާލެ ސަރަހައްދުގައި ދިރިއުޅޭ ރައްޔިތުންނަށް ކުރީގެ ރައީސް އިބްރާހިމް މުހައްމަދު ސޯލިހުގެ ސަރުކާރުން ގޯތި ދިނުމަށް އުތުރު ތިލަފަޅު ހިއްކި ނަމަވެސް މި ސަރުކާރުން އެ ތަނުގައި ދަނޑުވެރިކަމުގެ ބިޔަ މަޝްރޫއެއް އިއުލާނު ކުރުމަކީ ކަންބޮޑުވާ ކަމެއް ކަމަށް އުތުރު ތިލަފަޅު ޔޫނިއަނުން މިއަދު ބުނެފި އެވެ.

މާލޭގައި ދިރިއުޅޭތާ 20 އަހަރު ވެފައިވާ މީހުންނާއި ދަފްތަރުގައި ޖެހުނުތާ 20 އަހަރު ފުރިފައިވާ މީހުންނަށް މާލެ ސަރަހައްދުން ގޯތި ދިނުމުގެ މަޝްރޫއުއަށް ކުރިމަތިލާން މިދިޔަ ސަރުކާރުން ހުޅުވައިލުމުން 19،000 އަށް ވުރެ ގިނަ މީހުން އެ އަށް ކުރިމަތިލި އެވެ.

އޭގެ ތެރެއިން އުތުރު ތިލަފަޅުގައި ކުރިއަށް ގެންދާ ބޯހިޔާވަހިކަމުގެ މަޝްރޫއަށް 251 ހެކްޓަރުގެ ބިން ހިއްކާނެ ކަމަށް އޭރު ސަރުކާރުން ބުނެފައިވެ އެވެ. އެ ތަނުން 5،000 ގޯތި ދޭން އޭރު އޮތީ ނިންމައިފަ އެވެ.

އެކަމަކު ދެމެހެއްޓެނިވި ގޮތެއްގައި ދަނޑުވެރިކަން ކުރަން ރާއްޖޭގައި އެގްރިކަލްޗާ އިކޮނޮމިކް ޒޯން (އޭއީޒެޑް)އެއް ގާއިމްކުރުމަށް، އެސްޓީއޯގެ ދަށުން ހިންގާ މޯލްޑިވްސް އިންޑަސްޓްރިއަލް ޑިވެލޮޕްމަންޓް ފްރީ ޒޯން (އެމްއައިޑީ) އާއި ޗައިނާ ހާބަ އިންޖިނިއަރިން ކޮމްޕެނީ ލިމިޓެޑާ އެކު ވަނީ މިދިޔަ އަހަރުގެ މާޗު 28 ގައި ސޮއިކޮށްފަ އެވެ.

އެކަމާ ގުޅިގެން އުތުރު ތިލަފަޅު ޔޫނިއަނުން މިއަދު ބޭއްވި ނޫސްވެރިންގެ ބައްދަލުވުމެއްގައި ގާނޫނީ ވަކީލު އަލީ ހުސައިން ވިދާޅުވީ އެ ރަށުން ގޯއްޗާއި ފްލެޓް ދިނުން ފިޔަވައި އިތުރު ކަމެއް ކުރުމަކީ ބަލައިގަނެވޭނެ ކަމެއް ނޫން ކަމަށެވެ.

300 ކުދިންގެ ރިހެބިލިޓޭޓް ކުރަން 19،000 އާއިލާއެއްގެ އުއްމީދު ކީއްކުރަންހޭ އަޅުގަނޑުމެން ގެއްލުންވާލަންވީ؟ އަޅުގަނޑު ގަބޫލުކުރާ ގޮތުގައި އުތުރު ތިލަފަޅުގައި އަޅަން ޖެހޭނީ ސެންޓްރަލް ޖަލެއް ނޫން. އެ ތަނުގައި އަޅަން ޖެހޭނީ ހޯޕް އައިލެންޑެއް ނޫން،"--- އަލީ ހުސައިން

އޭނާ ތަކުރާރު ކުރެއްވީ މި ސަރުކާރުގެ ކެމްޕެއިނު ދުވަސްވަރާއި ވެރިކަމަށް ވަޑައިގަތުމަށް ފަހު ވެސް ސަރުކާރުން ދޫކޮށްފައިވާ ފްލެޓާއި ގޯތި އަތުނުލާނެ ކަމަށް ރައީސް ޑރ. މުހައްމަދު މުއިއްޒު ވިދާޅުވި ވިދާޅުވުމެވެ.

އަލީ ހުސެއިން ވިދާޅުވިގޮތުގައި، ކާބޯތަކެތީގެ ރައްކާތެރިކަން އިތުރުކުރުމަށާއި އިގްތިސާދު ސިންދަފާތުކުރުމަށާއި އިމްޕޯޓްކުރާ ކާބޯތަކެތީގެ މައްޗަށް ބަރޯސާވުން ކުޑަކުރުމަށް ކަމަށް ބުނެ ފެށި އެ މަޝްރޫއުއާ މެދު ކަންބޮޑުވާ ކަމަށެވެ. އުތުރު ތިލަފަޅުގެ 100 ހެކްޓަރުގެ ބިމުގައި ގްރީން ހައުސް ހަދައި ބާކީ 100 ހެކްޓަރުގައި ފަލަމަޑީގެ ބާވަތްތައް އިންދާނެ ކަމަށް ދަނޑުވެރިކަމާ ބެހޭ މިނިސްޓްރީން ބުނެފައިވާ ކަމަށް އޭނާ ވިދާޅުވި އެވެ.

އެކަމަކު އެތައް ހާސް ބަޔަކު ބޯހިޔާވަހިކަމުގެ އުއްމީދުގައި ތިއްބައި އެކަން ފެށުމަކީ ކަންބޮޑުވާ ކަމެއް ކަމަށާއި މި ސަރަހައްދަށް އެންމެ ބޮޑު މައްސަލައަކީ ބޯހިޔާވަހިކަމުގެ މައްސަލަ ކަމަށް އަލީ ހުސައިން ވިދާޅުވި އެވެ.

"19،000 އެތައް ބަޔަކު ގޯތި ހޯދުމުގެ އުއްމީދުގައި ތިއްބާ ދަނޑުވެރިކަމަށް އުތުރު ތިލަފަޅު ހާއްސަކުރެވިގެން ދިޔައީމަ އެއީ ރައްޔިތުންގެ ކަންބޮޑުވުން އައި ކަމެއް. އެއީ މި ސަރަހައްދަށް ދިމާވެފައިވާ އެންމެ ބޮޑު މައްސަލައަކީ ބޯހިޔާވަހިކަން. ބޯހިޔާވަހިކަމުގެ މައްސަލަައަށް ދާއިމީ ހައްލެއް ހޯދޭނީ ގޯތި ލިބިގެން،" އަލީ ހުސައިން ވިދާޅުވި އެވެ.

އޭނާ ވިދާޅުވީ، ދަނޑުވެރިިކަމުގެ ޕްރޮގްރާމު ފުށިދިއްގަރަށް ބަދަލުކުރާ ކަމަށް ސަރުކާރުން ފަހުން ބުނެފައިވާ ކަމަށާއި އުތުރު ތިލަފަޅަށް ހޯޕް އައިލެންޑާއި ސެންޓްރަލް ޖަލު ބަދަލުކުރާ ވާހަކަ ވެސް ދެއްކެވިފައިވާ ކަމަށެވެ.

"300 ކުދިންގެ ރިހެބިލިޓޭޓް ކުރަން 19،000 އާއިލާއެއްގެ އުއްމީދު ކީއްކުރަންހޭ އަޅުގަނޑުމެން ގެއްލުންވާލަންވީ؟ އަޅުގަނޑު ގަބޫލުކުރާ ގޮތުގައި އުތުރު ތިލަފަޅުގައި އަޅަން ޖެހޭނީ ސެންޓްރަލް ޖަލެއް ނޫން. އެ ތަނުގައި އަޅަން ޖެހޭނީ ހޯޕް އައިލެންޑެއް ނޫން،" އަލީ ހުސައިން ވިދާޅުވި އެވެ.

އޭނާ ދެކެވަޑައިގަންނަވާ ގޮތުގައި މީހުން ރިހެބިލިޓޭޓް ކުރަން ޖެހޭނީ ރަށެއްގައި އެކަހެރިކޮށްގެން ނޫނެވެ. އެއީ މުޖުތަމައާ ގުޅިގެން ކުރަންޖެހޭ ކަމެއް ކަމަށް އަލީ ހުސައިން ވިދާޅުވި އެވެ.