ޖީއެމްއާރު 'ޑީލް' ދިފާއު ކުރައްވައި ނަޝީދު ވިދާޅުވީ ހަނިމާދޫއެއާޕޯޓު އެހެން ބަޔަކާ ހަވާލުކުރުމުން މާ ފައިދާވެދާނެ ކަމަށް

ކުރީގެ ރައީސް މުހައްމަދު ނަޝީދުގެ ސަރުކާރުގެ ދުވަސްވަރު ރާއްޖޭގެ މައި އެއާޕޯޓު ހިންގުން އިންޑިއާގެ ޖީއެމްއާރު ކުންފުންޏަށް ދޫކުރި ދޫކުރުން ދިފާއު ކުރައްވައި، ހދ. ހަނިމާދޫ އިންޓަނޭޝަނަލް އެއާޕޯޓަށް ވެސް އެންމެ ފައިދާ ހުރި ގޮތަކީ ބީލަމުގެ އުސޫލުން އެތަން ހިންގާނެ ބަޔަކު ހޯދުން ކަމަށް އެ މަނިކުފާނު މިރޭ ވިދާޅުވެއްޖެ އެވެ.

ޓޫރިޒަމް ދާއިރާގެ އިސް ބޭފުޅުން ތިއްބަވާ ގުރޫޕެއްގައި ނަޝީދު އެހެން ވިދާޅުވީ، އިންޑިއާގެ އަދާނީ ގުރޫޕަށް ހަނިމާދޫ އިންޓަނޭޝަނަލް އެއާޕޯޓު "ވިއްކާލަން" އުޅޭ ކަމަށް ބުނާ ވާހަކަ އިކޮނޮމިކް މިނިސްޓަރު މުހައްމަދު ސައީދު މިއަދު ދޮގުކުރައްވާފައި ވަނިކޮށެވެ. އޭނާ އެ ވާހަކަތައް ދޮގުކުރެއްވީ ރައީސް ޑރ. މުހައްމަދު މުއިއްޒު މިދިޔަ ހަފުތާގައި ސިންގަޕޫރަށް ކުރެއްވި ފުރަމާނަ ދަތުރުފުޅުގައި ހަނިމާދޫ އެއާޕޯޓު "ވިއްކާލުމާ ގުޅޭ މަޝްވަރާތައް" އަދާނީ ގުރޫޕާ އެކު ކުރެއްވި ކަމަށް ކުރީގެ ރައީސް އަބްދުﷲ ޔާމީން އިއްޔެ ރޭ ވިދާޅުވުމުން ދެއްވި ރައްދެއްގަ އެވެ.

ނަޝީދު ވިދާޅުވީ، ހަނިމާދޫ އެއާޕޯޓު އެއާލައިނަކުން ހިންގައިފި ނަމަ ލިބޭނެ ފައިދާ ބޮޑުވެދާނެ ކަމަށެވެ.

"އިތުރަށް ދަރަނިވެރި ވެގެން ލޯނުތައް ދައްކަން އުޅުމަށް ވުރެން އަތުގައި ހުރި އެއްޗެއް ކުއްޔަށް ދީގެން އެ ފައިސާ ހޯދިއްޖެ ނަމަ ރާއްޖެ އަށް ކުރާނެ ފައިދާ ވަރަށް ބޮޑު ކަމަށް ފެންނަނީ،" އެ މަނިކުފާނު ވިދާޅުވި އެވެ.

ނަޝީދު ދެކެވަޑައިގަންނަވާ ގޮތުގައި އެއާޕޯޓުތައް ވެސް އަދި އެހެނިހެން ވިޔަފާރިތައް ވެސް އަމިއްލަ ފަރާތްތަކުން ހިންގުން ބުއްދިވެރި އެވެ. އެ މަނިކުފާނު ވިދާޅުވީ، އެ ހާލަތުގައި ޕްރައިވެޓް ސެކްޓާއަކީ ދިވެހިންތޯ ނުވަތަ ބޭރު ބައެއްތޯ ބަލަން ރަނގަޅު ވާނީ އާންމު ބީލަމަކަށް ގޮސް ސަރުކާރަށް އެންމެ ފައިދާ ހުރި ގޮތެއް ބަލައިގެން ކަމަށެވެ.

މި މައުލޫއުގައި ވެލާނާ އިންޓަނޭޝަނަލް އެއާޕޯޓުގެ ހިންގުން ޖީއެމްއާރު ކުންފުންޏަށް ދޫކުރި ދޫކުރުން ދިފާއު ކުރައްވަމުން ނަޝީދު ވިދާޅުވީ، އެ ފިޔަވަޅު އޭރު އެޅި ނަމަ "ދެ ބިލިއަން ޑޮލަރުގެ ދަރަނި ނޭޅި އާ އެއާޕޯޓު އޮޕަރޭޓް ކުރާތާ 10 އަހަރު މިހާރު އޮންނާނީ ވެފައި" ކަމަށެވެ.

"އަދި ސަރުކާރަށް ވާ ފައިދާ ކުޑައެއް ނުވާނެ،" ނަޝީދު ވިދާޅުވި އެވެ.

މިހާރުގެ ވެލާނާ އިންޓަނޭޝަނަލް އެއާޕޯޓު އަދި އޭރުގެ އިބްރާހިމް ނާސިރު އިންޓަނޭޝަނަލް އެއާޕޯޓު ހިންގަން ޖީއެމްއާރު ކުންފުންޏާ ހަވާލު ކުރުމަށް ނަޝީދުގެ ސަރުކާރުގެ ދުވަސްވަރު ހެދި އެއްބަސްވުން ބާތިލްކުރީ، ކުރީގެ ރައީސް މުހައްމަދު ވަހީދުގެ ވެރިކަމުގަ އެވެ. އެ އެއްބަސްވުން އުވައިލުމުގެ ބަދަލެއްގެ ގޮތުން ދައްކަން ޖެހުނު 271 މިލިއަން ޑޮލަރު (4.1 ބިލިއަން ރުފިޔާ) ނޮވެމްބަރު 15، 2016 ގައި ޔާމީންގެ ސަރުކާރުން ދައްކައި ހަލާސްކުރި އެވެ.

އެމްޑީޕީ ސަރުކާރުން 25 އަހަރަށް ޖީއެމްއާރާ އެކު ހެދި އެއްބަސްވުން 2012 ގައި ވަހީދުގެ ސަރުކާރުން އުވައިލީ އޭގެ ސަބަބުން ދިވެހި ދައުލަތަށް ބޮޑު ގެއްލުމަކާ ކުރިމަތިލާން ޖެހޭތީ އެވެ.

ހަނިމާދޫ އެއާޕޯޓުގެ މަސައްކަތް ނިމޭނީ މި އަހަރުގެ ސެޕްޓެމްބަރަށް

ކޮންސްޓްރަކްޝަން މިނިސްޓަރު ޑރ. އަބްދުﷲ މުއްތަލިބު މި މަހުގެ 1 ވަނަ ދުވަހު ވިދާޅުވީ، އިންޑިއާގެ ލައިން އޮފް ކްރެޑިޓުގެ ދަށުން ހަދަމުން އަންނަ ހަނިމާދޫ އިންޓަނޭޝަނަލް އެއާޕޯޓުގެ މަސައްކަތް އެއްކޮށް ނިމޭނީ އަންނަ ސެޕްޓެމްބަރު މަހު ކަމަށެވެ.

އޭނާ ވިދާޅުވިގޮތުގައި ޕްރޮޖެކްޓުގެ 88.7 ޕަސެންޓް މިހާރު ވަނީ ނިމިފަ އެވެ.

މިނިސްޓަރު ވިދާޅުވީ، އެއާޕޯޓުގެ ރަންވޭގެ މަސައްކަތް އެއްކޮށް މިހާރު ނިމިއްޖެ ކަމަށެވެ. އަދި ޕަސެންޖާ ޓާމިނަލުގެ 83 ޕަސެންޓް ނިމިފައިވާ ކަމަށާއި އެއާ ޓްރެފިކް ކޮންޓްރޯލް ޓަވަރާއި އެއާކްރާފްޓް މެއިންޓެއިނަންސް އަށް ހާއްސަ ސަރަހައްދާއި ކާގޯ ބިލްޑިންގެ 96 ޕަސެންޓް މަސައްކަތް ނިމިފައިވާ ކަމަށް ވެސް މިނިސްޓަރު ވިދާޅުވި އެވެ.

ކަލްޕަތަރު ޕްރޮޖެކްޓްސް އަށް މިހާރު ނަން ބަދަލުކޮށްފައިވާ އިންޑިއާގެ ކުރީގެ ޖީއެމްސީ ކުންފުންޏާ ހަނިމާދޫ އެއާޕޯޓްގެ މަސައްކަތް ހަވާލުކުރީ ކުރީގެ ރައީސް އިބްރާހިމް މުހައްމަދު ސޯލިހުގެ ސަރުކާރުގެ ދުވަސްވަރު ސެޕްޓެމްބަރު 2022 ގަ އެވެ. ހަނިމާދޫ އެއާޕޯޓުގައި 2.7 ކިލޯމީޓަރުގެ އާ ރަންވޭއަކާއި އަހަރަކު 1.3 މިލިއަން ފަސިންޖަރުންނަށް ހިދުމަތް ދެވޭ އާ ޓާމިނަލަކާއި އާ އެއާޓްރެފިކް ކޮންޓްރޯލް ޓަވަރަކާއި ކާގޯ އިމާރާތެއްގެ އިތުރުން ފިއުލް ފާމެއް ގާއިމް ކުރުން ޕްރޮޖެކްޓުގައި ވަނީ ހިމަނައިފަ އެވެ.

އެ އެއާޕޯޓު ތަރައްގީ ކުރަނީ އެންމެ ބޮޑެތި ބޯޓު ވެސް ޖެއްސޭ ގޮތަށެވެ. އިންޑިއާގެ އެގްޒިމް ބޭންކުން ދީފައިވާ 800 މިލިއަން ޑޮލަރުގެ ލައިން އޮފް ކްރެޑިޓްގެ ދަށުން އެ މަޝްރޫއަށް 136 މިލިއަން ޑޮލަރު (ދެ ބިލިއަން ރުފިޔާ) ހަރަދުކުރެ އެވެ.