މަސް ގަންނަ އަގު 20ރ. އަށް ބޮޑުކުރުން ގުޅިފައި ވަނީ 48 ގަޑިއިރު ތެރޭގައި ފައިސާ ދިނުމުގެ ޔަގީންކަމާ

މަސް ގަންނަ އަގު މި ސަރުކާރުން 20 ރުފިޔާ އަށް ބޮޑުކޮށްދެއްވާނެ ކަމުގެ ޔަގީންކަން ރައީސް ޑރ. މުހައްމަދު މުއިއްޒު އަނެއްކާ ވެސް މިއަދު ދެއްވައިފި އެވެ.

އެ މަނިކުފާނު އެ ޔަގީންކަން ހަފުތާއެއްގެ ތެރޭގައި ދެވަނަ ފަހަރަށް ދެއްވީ މަސްވެރިންނާއި ކެޔޮޅުންނާ އެކު ރައީސް އޮފީހުގައި ބޭއްވެވި ބައްދަލުވުމެއްގައި ކަމަށް އެ އޮފީހުން ބުންޏެވެ.

ރައީސް މުއިއްޒު ވެރިކަމާ ހަވާލުވެވަޑައިގެންނެވި ފަހުން ކެޔޮޅުން އެ މަނިކުފާނާ މިހާތަނަށް ތިން ފަހަރު ރައީސް އޮފީހުގައި ބައްދަލުކޮށްފައިވާއިރު، މިއަދުގެ ބައްދަލުވުމުގެ އެންމެ ބޮޑު ބޭނުމަކީ ވެސް މަސްކިލޯއެއް ގަންނަ އަގު ސަރުކާރުން 20ރ. އަށް ބޮޑުކުރާނެ ތާރީހަކާ ގުޅޭ މައުލޫމާތު ސާފުކުރުމެވެ.

އޭގެ ޖަވާބުގައި ރައީސް ވިދާޅުވީ، މަސް ގަންނަ އަގު ސަރުކާރުން ބޮޑުކޮށްދެވޭނީ، މަސްކިރާތާ 48 ގަޑިއިރުގެ ތެރޭގައި މަސްވެރިންނަށް ފައިސާ ދިނުމުގެ ކަންކަން މެދުނުކެނޑޭނެކަން ޔަގީންވެ، ކަންކަން އެ ގޮތަށް ހަމަޖެހުމުން ކަމަށެވެ.

"ނަމަވެސް މަސް ގަންނަ އަގު ބޮޑުކުރައްވާނެ ކަމުގެ ޔަގީންކަން އެ މަނިކުފާނު ދެއްވި އެވެ،" ރައީސް އޮފީހުގެ ވެބްސައިޓުގައި ވެ އެވެ.

ރައީސް މުއިއްޒު ރިޔާސީ ކެމްޕެއިންގައި ވައުދުވެވަޑައިގެންނެވި ގޮތަށް މިދިޔަ އަހަރުގެ ޑިސެމްބަރު 10 އިން ފެށިގެން އަންނަނީ މަސްވެރިންނަށް 48 ގަޑިއިރުގެ ތެރޭގައި ސަރުކާރުން ފައިސާ ދޫކުރަމުންނެވެ.

މަސް ގަންނަ އަގު މި ސަރުކާރުން 20 ރުފިޔާ އަށް ބޮޑުކޮށްދޭނެ ކަމަށާއި ދެމެހެއްޓެނިވި ގޮތަކަށް އެކަން ކުރެވޭނެ އިންތިޒާމެއް ހަމަޖެއްސުމުގެ މަޝްވަރާ ބައްދަލުވުންތައް ކުރިއަށް ގެންދަވާ ކަން ރައީސް މުއިއްޒު އިއުލާން ކުރެއްވީ މިދިޔަ ހަފުތާގައި މ. އަތޮޅަށް ކުރެއްވި ދަތުރުފުޅުގައި ދިއްގަރު ރައްޔިތުންނާ ބައްދަލުކުރައްވަ އެވެ.

"އަޅުގަނޑު ވީ އެންމެ މުހިންމު ވައުދަކީ [މަސްވެރިންނަށް] 20 ރުފިޔާގެ ވައުދު. އެއީ ވެސް ހަމަ ސަސްޓެއިނަބަލްކޮށް މެދުކެނޑުމެއް ނެތި ކުރިއަށް ގެންދަން ބޭނުންވާ ކަމެއް. ހަމަ ނަމެއްގައި މާދަމާ އިން ފެށިގެން 20 ރުފިޔާއޭ ބުނުމުން އަދި ކަމަކު ނުދޭ،" މި މަހުގެ 22 ވަނަ ދުވަހުގެ ރޭ އެ މަނިކުފާނު ވިދާޅުވި އެވެ.

ސަރުކާރުން މަސް ގަންނަ އަގު 20ރ. އަށް ބޮޑު ކުރަން ފަށާނެ ތާރީހު އޮޅުން ފިލުވުމުގެ އިތުރުން ކެޔޮޅުންގެ ޓީމުން މިއަދު ވަނީ މަސްވެރިންގެ ބައެއް ކަންބޮޑުވުންތައް ވެސް ރައީސާ ހިއްސާ ކޮށްފައި ކަމަށް ރައީސް އޮފީހުން ބުންޏެވެ.

އޭގެ ތެރޭގައި ހިމެނެނީ:

- ރާއްޖޭގެ އެންވެރިކަން ދަށްވުން

- މަސްވެރިންނަށް ބޭންކް އޮފް މޯލްޑިވްސް މެދުވެރިކޮށް ލޯނަށް އެދުމުގައި ހުރި ދަތިތައް

- މަސްވެރިކަމުގެ ލައިސަންސް ހޯދުމަށް ދިމާވާ ދަތިތައް

- މިފްކޯގައި މަސްކިރުމަށް ހުންނަ ކައްޓާތައް ޑިޖިޓަލް ކައްޓާ އަށް ބަދަލުކުރުމަށް ރައީސްގެ އަރިހުގައި އެދުނު

ރައީސް ވަނީ ކަންބޮޑުވުންތަކަށް ހައްލު ލިބޭނެ ގޮތަށް ސަރުކާރުން މަސައްކަތް ކުރާނެ ކަމަށް މަސްވެރިން ގާތު ވިދާޅުވެފަ އެވެ.

އެގޮތުން ސަރުކާރުގެ ސިޔާސަތުގެ ތެރެއިން މަސްވެރިންނަށް ބީއެމްއެލުން ދޫކުރާ ލޯނަށް އެދޭ ގޮތް ފަސޭހަ ކޮށްދިނުމާއި ހުށަހަޅަންޖެހޭ ލިޔެކިޔުން މަދުކުރެވޭނެ ގޮތަކަށް އެކަން ކުރެވޭނެތޯ ބޭންކަށް އެދިވަޑައިގަންނަވާނެ ކަމަށް އެ މަނިކުފާނު ވިދާޅުވި އެވެ.

މަސްވެރިން ވަނީ ރާއްޖޭގައި މިހާރު އެންވެރިކަން އެންމެ ރަނގަޅީ ވ. އަތޮޅުގައި ކަން ފާހަގަކޮށްފަ އެވެ. ޖަވާބުގައި ރައީސް މުއިއްޒު ދެއްވި ޔަގީން ކަމަކީ އެ އަތޮޅުގައި ހިންގާ ބިން ހިއްކުމުގެ މަޝްރޫއުތައް ކުރިއަށް ގެންދާނީ މަސްވެރިންނާ މަޝްވަރާކޮށް، މަސްވެރިންގެ ހިޔާލާ އެކު ކަމަށް ރައީސް އޮފީހުން ބުންޏެވެ.

މިއަދުގެ ބައްދަލުވުމުގައި ރައީސް މުއިއްޒު ވަނީ އެސްޓީއޯ ރޭޓުގައި އަތޮޅުތަކުގައި ތެޔޮ ވިއްކުމުގެ ތަފުސީލް ވެސް މަސްވެރިންނާއި ކެޔޮޅުންނާ ހިއްސާ ކުރައްވައިފަ އެވެ.

"އެގޮތުން އެ މަސައްކަތް އަންނަ އަހަރުގެ މާޗު މަހަށް ނިންމުމަށް މަސައްކަތް ކުރައްވަމުން ގެންދަވާ ކަމުގައި އެ މަނިކުފާނު ވިދާޅުވިއެވެ. އަދި މިފްކޯ އިން ތެޔޮ ވިއްކަން ފަށަން ކުރަމުންދާ މަސައްކަތުގެ ތަފުސީލު ވެސް މި ބައްދަލުކުރެއްވުމުގައި ކެއުޅުންނާ ހިއްސާ ކުރެއްވި އެވެ،" ރައީސް އޮފީހުން ބުންޏެވެ.

ރައީސް ވަނީ ސަރުކާރުން މަސްވެރިންގެ އަޑު އަހައި، މަސްވެރިން ބޭނުންވާ ކަންކަން ކޮށްދޭނެ ކަމުގެ ޔަގީންކަން މިއަދުގެ ބައްދަލުވުމުގައި ދެއްވާފައި ކަމަށް އެ އޮފީހުން ބުންޏެވެ.

ސަރުކާރުން މަސް ގަންނަ އަގު 20ރ. އަށް ބޮޑުކުރާނެކަން ރައީސް މިދިޔަ ހަފުތާގައި އިއުލާން ކުރެއްވުމާ އެކު، މޯލްޑިވްސް ސީފުޑް ޕްރޮސެސާސް އެންޑް އެކްސްޕޯޓާސް އެސޯސިއޭޝަން (އެމްއެސްޕީއީއޭ) އިން ވަނީ ކަންބޮޑުވުން ފާޅުކޮށް ބަޔާނެއް ނެރެފަ އެވެ.

މަސްވެރިކަމުގެ ސިނާއަތުގައި ހަރަކާތްތެރިވާ ކުންފުނިތަކާ ހަވާލާދީ އެ ޖަމިއްޔާ އިން ބުނީ މަސް ގަންނަ އަގެއްގެ ގޮތުގައި ހުށަހަޅާފައިވާ އެ އަގަކީ ބައިނަލްއަގުވާމީ ބާޒާރުތަކަށް ދެމެހެއްޓެނިވި ގޮތެއްގައި މަސް އެކްސްޕޯޓްކުރެވޭ ވަރަށް ވުރެ ބޮޑު އަގެއް ކަމަށެވެ. އޭގެ ސަބަބުން އެ ސިނާއަތުގެ އަމިއްލަ ކުންފުނިތައް ބަނގުރޫޓުވެ ފެކްޓްރީތައް ބަންދުކުރަން ޖެހުމަކީ އެކަށީގެންވާ ކަމެއް ކަަމަށް އެ ޖަމިއްޔާ އިން ބުނެފައި ވެ އެވެ.