ރައްޔިތުންގެ މަޖިލީހުގެ ރައީސް އަބްދުﷲ މަސީހްގެ އިތުބާރު ނެތް ކަމުގެ ވޯޓު "ކޮންމެ ގޮތަކުން" ނަމަވެސް އިއްޔެ ނިންމުމަށް ރައީސް އަބްދުﷲ ޔާމީން ޕީޕީއެމްގެ ޕާލަމެންޓްރީ ގްރޫޕްގެ މެމްބަރުންނަށް އެންގެވި ކަމަށް ބުނާ ވައިބާ މެސެޖްތަކެއް ސޯޝަލް މީޑިއާގައި ލީކުކޮށްލައިފި އެވެ.
އެ މެސެޖްތަކުގައި ދައްކަވާފައި ހުރި ވާހަކަތަކަށް ބަލާއިރު، އެއީ 1:30 ގައި ވޯޓަށް އެހުމުގެ ކުރިންނާއި ފަހުން މަޖިލިސް ހަލަބޮލިވެފައި އޮއްވައި މެމްބަރުންނާ އެކު ދެއްކެވި ވާހަކަފުޅުތަކެއް ކަމަށް ބެލެވެ އެވެ. އެއީ ދޮގު އެއްޗެއް ކަމަކަށް، ޕީޕީއެމްގެ ޕާލިމެންޓަރީ ގްރޫޕުން ބުނެފަައެއް ނުވެ އެވެ.
ރައީސް ޔާމީން އެއް މެސެޖުގައި އަންގަވާފައި އޮތީ "ވޯޓު މިއަދު [އިއްޔެ] ފަހު ގަޑިއަކަށް ލަސްކުރިޔަ ނުދޭތި" ކަމަށެވެ. އެއާ އެކު، "އިދިކޮޅު ފަރާތްތަކާ މެދު ފިޔަވަޅު އަޅާފައި ނަމަވެސް ވޯޓު ނަގަން ޖެހޭ ކަމަށް" ވެސް ރައީސް އަށް ނިސްބަތްވާ އެހެން މެސެޖެއްގައިވެ އެވެ.
ރޯލް ކޯލް ވޯޓާ ގުޅޭ ގޮތުން ވެސް މެމްބަރުންނާ އެމަނިކުފާނު ވާހަކަފުޅު ދެއްކެވި ކަމަށް މެސެޖްތަކުން އެނގެ އެވެ. ރޯލް ކޯލްއަކަށް ވާތީ ވޯޓުގައި ބޭނުން ކުރަންވާ އިބާރާތް ވަރަށް ސާފުކޮށް ރިޔާސަތުން އޮޅުންފިލުވަން ރައީސް ޔާމީން އިރުޝާދު ދެއްވި އެވެ. އަދި ރިޔާސަތުން ބޭނުންކުރާ އިބާރާތް ނޫން އެހެން އިބާރާތެއް ބޭނުން ނުކުރަން ވެސް އެދިވަޑައިގެންނެވި ކަމަށް މެސެޖްތަކުގައިވެ އެވެ.
އިއްޔެގެ ވޯޓާ ދެކޮޅު މެމްބަރުން ވިދާޅުވާން ޖެހޭނީ "ނުފެނޭ" ކަމަށް ރިޔާސަތުން، ރީކޯމޫސާ މަނިކު އިއުލާންކުރެއްވި އެވެ. އެކަމަކު ޕީޕީއެމްގެ ބައެއް މެމްބަރުން "ނުފެނޭ" ވިދާޅުވެފައި، އެހެން ވާހަކަތަކެއް ދައްކަވަން އުޅުއްވި އެވެ. އެހެންކަމުން މޫސަ އެންގެވީ ވޯޓުގައި އޮތް އެއްޗެއް ނޫން އެހެން އެއްޗެއް ވިދާޅުނުވުމަށެވެ.
ވޯޓު ކޮންމެހެން ވެސް ނަގަން ޖެހޭ ކަމަށް ރައީސް ވިދާޅުވި ވާހަކަފުޅަށް ތާއީދު ކުރެއްވި މެމްބަރުންގެ ތެރެއިން އެއް މެމްބަރަކު ވިދާޅުވީ، ވައިބަ ސްކްރީން ޝޮޓްތަކުގައިވާ ގޮތުން، "މިއަދު، ރައީސް ވިދާޅުވިހެން މިހާރުން މިހާރަށް ނިންމުން ވަރަށް މުހިއްމު" ކަމަށެވެ. އެހެން މެމްބަރުންތަކެއް ވެސް ރައީސް އެންގެވި ގޮތަށް އެކަން ކުރައްވާނެ ކަމުގެ ފުރިހަމަ ޔަގީން ދެއްވައި މެސެޖް ކުރެއްވި އެވެ.
ޕީޕީއެމްގެ ޕާލަމެންޓްރީ ގްރޫޕްގެ އިސް ބޭފުޅުން ފޯނު ނުނަންގަވާތީ، މި މެސެޖްތަކާ ގުޅޭ ގޮތުން އަދި ކޮމެންޓެއް ނުލިބެ އެވެ.
މަސީހް މަގާމުން ވަކިކުރަން އިދިކޮޅު ފަރާތްތަކުން ހުށަހެޅި ވޯޓު ސަރުކާރުން ދިފާއުކުރީ 48 ވޯޓުންނެވެ. މިހާތަނަށް ނެގި، މުހިއްމު ބޮޑެތި ވޯޓުތަކުގައި ޕީޕީއެމް/އެމްޑީއޭ ކޯލިޝަނުން އާއްމުކޮށް 51 ވޯޓު ލިބުނަސް މި ވޯޓުގައި ސަރުކާރަށް އޮތް ސުޕަ މެޖޯރިޓީ ވަނީ ގެއްލިފަ އެވެ.