ގާނޫނާ ހިލާފަށް މީހުން ވަޒީފާއިން ވަކިކުރުމުގައި ބައިވެރިވާ ފަރާތްތަކާ މެދު ފިޔަވަޅު އަޅަންޖެހޭ: އޮޑިޓް

ގާނޫނާ ހިލާފަށް ސިވިލް ސާވިސްގެ މުވައްޒަފުން ވަޒީފާއިން ވަކިކުރުމުގައި ބައިވެރިވާ ފަރާތްތަކާއި އަދި ވަޒީފާގެ މައްސަލަތައް ކޯޓުތަކުގައި އިސްތިއުނާފް ކުރުމުގައި އިހުމާލުވާ މުވައްޒަފުންނާ މެދު ފިޔަވަޅު އެޅުމަށް އޮޑިޓާ ޖެނެރަލް ހުސައިން ނިޔާޒީ އަންގަވައިފި އެވެ.

އޮޑިޓާ ޖެނެރަލް ނިޔާޒީ ސޮއިކުރައްވައި، މިދިޔަ ހަފުތާގައި ނެރުއްވި ސިވިލް ސާވިސް ކޮމިޝަން (ސީއެސްސީ) ގެ އޮޑިޓް ރިޕޯޓުގައިވާ ގޮތުން 2022 ވަނަ އަހަރު ވަޒީފާގެ އެކި މައްސަލަތަކުގައި 1.4 މިލިއަން ރުފިޔާ ބަދަލުގެ ގޮތުގައި ދޭން ޖެހުނެވެ. އޭގެ ތެރެއިން ބައެއް މައްސަލަތައް އިސްތިއުނާފް ނުކުރެވި، ބަދަލު ދޭން ޖެހުނީ ކޮމިޝަންގެ ފަރާތުން އިސްތިއުނާފް ފީ ދެއްކުމުގައި އިހުމާލުވުމުން ކަމަށާއި ގާނޫނީ ހިލާފަށް މީހުން ވަކިކުރުމުގައި ބައިވެރިވާ ފަރާތްތަކާ މެދު ފިޔަވަޅު އެޅޭނެ ނިޒާމެއް ނެތް ކަމަށް އެ ރިޕޯޓްގައިވެ އެވެ.

އެހެންކަމުން، ގާނޫނީ އިޖުރައާތުތައް ފުރިހަމަ ނުކޮށް މުވައްޒަފުން ވަކިކުރުމުގައި ބައިވެރިވާ ފަރާތްތަކާ މެދު ފިޔަވަޅު އެޅޭނެ ނިޒާމެއް ސީއެސްސީން އެކުލަވާލަންޖެހޭ ކަމަށް އެ ރިޕޯޓުގައިވެ އެވެ. އަދި ވަޒީފާގެ މައްސަލަތައް ސީއެސްސީއަށް ނާކާމިޔާބުވުމުން އިސްތިއުނާފްކުރަން ނިންމާ ހާލަތްތަކުގައި، އެ މައްސަލަތައް އިސްތިއުނާފް ކުރުމުގައި އިހުމާލުވާ މުވައްޒަފުންނާ މެދު ވެސް ފިޔަވަޅު އަޅަންޖެހޭ ކަމަށް ރިޕޯޓުގައި ބުނެފައިވެ އެވެ.

އޮޑިޓް ރިޕޯޓްގައިވާ ގޮތުން ވަޒީފާއިން ވަކިކުރާ މައްސަލަތަކުގައި ގެއްލުމުގެ ބަދަލު ނަގައިދެވޭނެ އެންމެ ދިގު މުއްދަތު ގާނޫނުގައި ކަނޑައަޅާފައި ނެތުމުން، އެގޮތަށް ބަދަލު ނަގައިދެވޭނެ އެންމެ ދިގު މުއްދަތެއް ވެސް ގާނޫނުގައި ހިމަނައި އަދި ގަވާއިދުތަކުގައި ވެސް އެކަން ހިމަނަން ޖެހެ އެވެ.

މީގެ އިތުރުން ގާނޫނާ ހިލާފަށް ވަޒީފާއިން ވަކިކުރުމުން ބަދަލު ދޭންޖެހޭ ހާލަތްތަކުގައި ޕެންޝަނަށް ދައްކަންޖެހޭ ފައިސާތައް ވެސް ގަވާއިދާ އެއްގޮތަށް ހިސާބުކޮށް، ޕެންޝަން އޮފީހަށް ދައްކާފައި ނުވާތީ އެ ފައިސާ ވެސް ދެއްކުމަށް އޮޑިޓާ ޖެނެރަލް އެ ރިޕޯޓުގައި އަންގަވާފައިވެ އެވެ.