ބާޒާރުމަތީ މަގު ހެދުމުގެ މަސައްކަތް ކުރާތީ ނޯތު ހާބަރުން ބޯޓުތަކަށް ޖާގަ ލިބުމުން ދަތިވެފައިވާ މައްސަލައަށް ވަގުތީ ހައްލެއް ހޯދުމަށް އިތުރު ޖާގަ އެހެން ސަރަހައްދުތަކުން ހަމަޖެއްސުމުގެ މަސައްކަތް ކުރަމުން އަންނަ ކަމަށް އެމްޕީއެލް އިން މިއަދު ބުނެފި އެވެ.
ނޯތު ހާބަރު ބަލަހައްޓާ އެމްޕީއެލްގެ މީޑިއާ އޮފިޝަލް ހަސަން ޝިފާން "މިހާރު"އަށް ވިދާޅުވީ ބާޒާރުމަތީ މަގު ހެދުމުގެ މަސައްްކަތާ އެކު، އެ ބަނދަރުގެ އެއްގަމު ތޮށި ބޭރަށް ޖެއްސުމުގެ މަސައްކަތް މި ދުވަސްވަރު ކުރަމުން އަންނާތީ ބޯޓުތަކަށް ޖާގަ ދިނުމުގައި ދަތިތަކެއް އެބަހުރި ކަމަށެވެ. އެހެންވެ، ބޯޓުފަހަރަށް ކީވޯލުތަކަށް ނޯޓްކުރާ އުސޫލަށް ވެސް މި މަހު ކުރީކޮޅު ބަދަލެއް ގެނެސްފައިވާ ކަމަށް އޭނާ ވިދާޅުވި އެވެ.
އުސޫލަށް ގެނައި ބަދަލު
- ބޯޓުފަހަރު މާލެ ނޯތު ހާބަރުގެ ޒޯނުތަކުގެ ކިޔުގައި ނަން ނޯޓުކުރެވޭނީ އެ ބަނދަރުން ފުރާ ވަގުތުން ފެށިގެން 48 ގަޑިއިރު ފަހުން.
- ކިޔު ތަރުތީބުން ކީވޯލަށް އުޅަނދު ކައިރި ކުރުމަށް ޖާގަ ލިބުމުން، އެއްވެސް ސަބަބަކާ ހުރެ މާލޭ ނޯތު ހާބަރުގެ ފަޅަށް ނުވަދެވިއްޖެ ހާލަތެއްގައި ފަޅަށް ވަނުމަށް 24 ގަޑިއިރުގެ މުހުލަތެއް ކޮންމެ އުޅަނދަކަށް ދޭނެ.
- އެ 24 ގަޑިއިރުގެ ތެރޭގައި މާލެ ނޯތު ހާބަރު ފަޅަށް ނުވަދެވިއްޖެ ނަމަ، ދާނީ ކިޔުގެ އެންމެ ފަހަތަށް.
އެ އުސޫލު ކުރިން އޮންނަ ގޮތުގައި، ބޯޓުފަހަރު މާލެ އައިސް ނޯތު ހާބަރު ޖާގަ ހޯދުމަށް އެމްޕީއެލްގައި އެދެވެ އެވެ. އެކަމަކު، މިހާރު ޖެހެނީ ރަށުން ފުރުމުގެ ކުރިން ޖާގައަށް އެދޭށެވެ.
ޝިފާން ވިދާޅުވީ ނޯތު ހާބަރުން ޖާގަ ލިބުމުން މި ދުވަސްވަރު ދަތިވާތީވެ، ހުޅުމާލެ ބަނދަރުގެ ދެ ސަރަހައްދަކުންނާއި މާލޭ އެމްއެމްއޭ ކުރިމަތީގައި އޮންނަ އެއް ނަންބަރު ޖެޓީން ވެސް ބޯޓުތަކަށް ވަގުތީ ގޮތުން ޖާގަ ދެމުން އަންނަ ކަމަށެވެ.
ނަމަވެސް، ޖާގައަށް އެދޭ ބޯޓުތައް އިތުރުވަމުން އަންނާތީ ހުޅުމާލެއިން 13 ޖާގައެއް ހަމަޖެއްސުމުގެ މަސައްކަތް މިވަގުތު ކުރަމުން އަންނަ ކަމަށް ޝިފާން ވިދާޅުވި އެވެ.
"އޮޑިވެރިންނަށް ވީހާ ވެސް ދަތިނުވާނެ ގޮތަކަށް، މެނޭޖުކުރަމުން ދަނީ،" އޭނާ ވިދާޅުވި އެވެ.
"ގަބޫލުކުރަން ދަތިތައް ހުރި ކަމަށް. އެކަމަކު، އޮޑިވެރިން ދޭ އެއްބާރުލުން ފާހަގަކޮށް ޝުކުރު އަދާކުރަން."
ބޮޑުތަކުރުފާނުގެ މަގުގެ އިރުމަތީ ފަރާތުގައި ތާރު އަޅައި ޒަމާނީ ފެންވަރަށް ތަރައްގީ ކުރުމުގެ މަސައްކަތް ކުރަމުން އަންނަ އެމްޓީސީސީން ބުނެފައިވާ ގޮތުގައި، އެ މަގުގެ ނޯތު ހާބަރު ސަރަހައްދުގެ މަގުގެ މަސައްކަތް މި އަންނަ ރޯދަ މަހުގެ ކުރިން ނިންމަން އަންނަނީ މަސައްކަތް ކުރަމުންނެވެ. ނޯތު ހާބަރުގެ އެއްގަމުގެ ތޮށި ބޭރަށް ޖެއްސުމުގެ މަސައްކަތުގެ ބޮޑު ބައެއް މިހާރު ވަނީ ނިމިފަ އެވެ.
މީލާދީ ކަލަންޑަރުގައިވާ ގޮތުން މި އަހަރުގެ ރޯދަ މަސް ފެށޭނީ އަންނަ މަހު 18 ގަ އެވެ.
ރަށްރަށް އާންމުކޮށް މުދާ ގެންދަނީ ނޯތު ހާބަރަށް ކައިރި ކުރާ ބޯޓުފަހަރުގަ އެވެ. ނަމަވެސް، ނޯތު ހާބަރުން ޖާގަ ލިބުމުން މި ދުވަސްވަރު ދަތިވެފައި ވާތީ، ކުރިއަށް އޮތް ރޯދަ މަހަށް ރަށްރަށަށް މުދާ ގެންދިއުމުގައި ދަތިތައް ކުރިމަތިވާ ކަމަށް ބުނެ ބައެއް އޮޑިވެރިން ދަނީ ކަންބޮޑުވުން ފާޅުކުރަމުންނެވެ.