ޝަރުއީ ދާއިރާގެ މާލީ ކަންކަން ހިންގަން މިނިވަން ނިޒާމެއް ގެނައުމަށް އުސޫލެއް ކަނޑައަޅައިފި އެވެ.
ފިނޭންސް މިނިސްޓްރީން މިދިޔަ ހަފްތާގައި އާންމުކުރި ޝަރުއީ ދާއިރާގެ ގުޅުންހުރި މާލީ ކަންކަމުގައި އަމަލުކުރާނެ ގޮތުގެ އުސޫލަކީ އުސޫލަކީ އަދުލު އިންސާފުގެ ދާއިރާއަށް ދައުލަތުގެ ބަޖެޓުން ކަނޑައަޅާ ފައިސާ ރޭވުމާއި، ދޫކުރުމާއި، ބެލެހެއްޓުމުގެ އިތުރުން ރިޕޯޓްކުރުމަށްޓަކައި އެ ދާއިރާއަށް ހާއްސަ އޮނިގަނޑެއް އެކަށައެޅުމުގެ މަގުސަދުގައި އެކުލަވާލާފައިވާ އުސޫލެކެވެ.
އާ އުސޫލުގެ މައިގަނޑު އެއް ބަޔަކީ ބަޖެޓް ކަނޑައެޅުމާއި ބަޖެޓް ތަންފީޒުކުރުމުގައި ގެންގުޅޭނެ ވަކި މިންގަނޑުތަކެއް ތައާރަފުކުރުމެވެ. މީގެ ތެރޭގައި ފައިސާ ދޫކުރުމާއި ޒިންމާދާރުކުރުވުމުގެ އުސޫލުތަކެއް ހިމެނެ އެވެ. ކޮންމެ އަހަރަކު ވެސް ރައްޔިތުންގެ މަޖިލީހުން ފާސްކުރާ ދައުލަތުގެ ބަޖެޓުގައި ޝަރުއީ ދާއިރާއަށް ބޭނުންވާ ފައިސާ ހިމަނާނެކަމަށް އުސޫލުގައި ބަޔާންކޮށްފައިވެ އެވެ.
މި އަހަރަށް ފާސްކުރި ބަޖެޓްގައި އެގޮތަށް ޝަރުއީ ދާއިރާއަށް ގްރާންޓް ހަމަޖައްސާފައިވެ އެވެ.
ކޮންމެ އަހަރެއް ފެށުމުގައި، ދައުލަތަށް ލިބޭނެ ކަމަށް އެ އަހަރަކު އަންދާޒާކުރާ އާމްދަނީގެ 2 ޕަސެންޓަށް ވުރެ މަދުނޫން މިންވަރެއް ޝަރުއީ ދާއިރާއަށް ކަނޑައަޅަންވާނެ ކަމަށް އުސޫލުގައި ބަޔާންކޮށްފައިވެ އެވެ.
މާލީ މުއާމަލާތްތައް ހަރުދަނާކޮށް ބެލެހެއްޓުމަށްޓަކައި، ޝަރުއީ ދާއިރާއަށް ދެވޭ ޖުޑީޝަރީ ސެކްޓޯރަލް ގްރާންޓް އެހީ ލިބުމާއި، ބެލެހެއްޓުމާއި އަދި ހަރަދުކުރަން ޖެހެނީ އުސޫލުގައިވާ ގޮތުން، މިނިސްޓްރީން ކަނޑައަޅާ ގޮތެއްގެ މަތިން އެމްއެމްއޭ ގައި ހުޅުވާފައިވާ ހާއްސަ އެކައުންޓެއް މެދުވެރިކޮށެވެ. މި އެކައުންޓުން ކުރެވޭ ހުރިހާ މުއާމަލާތްތަކެއް ހިންގަން ޖެހެނީ ދައުލަތުގެ މާލިއްޔަތުގެ ގަވާއިދާ އެއްގޮތްވާ ގޮތުގެ މަތިން، ދައުލަތުގެ ޕަބްލިކް އެކައުންޓިން ސިސްޓަމް މެދުވެރިކޮށެވެ.
އުސޫލުގައިވާ ގޮތުން ޑިޕާޓްމަންޓް އޮފް ޖުޑީޝަލް އެޑްމިނިސްޓްރޭޝަން (ޑީޖޭއޭ)އިން ޝަރުއީ ދާއިރާގެ އެކުލެވިގެންވާ ބަޖެޓު ތައްޔާރުކޮށް، ކޮންމެ އަހަރެއްގެ ސެޕްޓެމްބަރު 30 ގެ ކުރިން މާލީ ވުޒާރާއަށް ހުށަހަޅަން ޖެހެ އެވެ. ބަޖެޓުގައި މެދު ރާސްތާގައި ލިބޭނެ ކަމަށް ލަފާކުރާ އާމްދަނީގެ ތަފުސީލު ހިމަނަންޖެހެ އެވެ. އަދި ބަޖެޓު ޑެފިސިޓް ވާނެކަމަށް ބެލެވޭ ނަމަ، އެކަމަށް ބޭނުންވާ ފައިސާ ހޯދާނެ ގޮތުގެ ޕްލޭނެއް ވެސް ހިމަނަން ޖެހެ އެވެ.
ބަޖެޓު ހިންގުމާއި ބެލެހެއްޓުމުގެ އިޖުރާއަތުތައް ވެސް އުސޫލުގައި ބަޔާންކޮށްފައިވެ އެވެ. މަޝްރޫއުތަކަށް ފައިސާ ހޯދުމާއި ހަރަދުތައް ބެލެހެއްޓުމުގެ ސިޔާސަތުތައް އެކަށައެޅުމުގެ ޒިންމާ އުފުލާނީ ޗީފް ޖުޑީޝަލް އެޑްމިނިސްޓްރޭޓަރެވެ. އަދި މާލީ ޒިންމާދާރު ވެރިޔާ އެ ސިޔާސަތުތަކާ އެއްގޮތަށް ބަޖެޓު ތަންފީޒުކުރުމުގެ ޒިންމާ އުފުލަންޖެހެ އެވެ. ކަނޑައެޅިފައިވާ ބަޖެޓުން ބޭރުން ކޮންމެހެން ކުރަންޖެހޭ ހަރަދެއް ކުރިމަތިވެއްޖެނަމަ، އެކަން ކުރުމުގެ ކުރިން ސަޕްލިމެންޓްރީ ބަޖެޓެއް ފާސްކުރަންޖެހޭ ކަމަށް ވެސް އުސޫލުގައިވެ އެވެ.
ތަރައްގީގެ މަޝްރޫއުތަކާ ގުޅޭ ގޮތުން އުސޫލުގައި ވަނީ ޝަރުއީ ދާއިރާގެ ޕީއެސްއައިޕީ މަސައްކަތްތަކަށް ހަރަދުކުރާނީ އެ ދާއިރާއަށް ދެވޭ ސެކްޓޯރަލް ގްރާންޓް އެހީގެ ތެރެއިން ކަމަށެވެ.
މުވައްޒަފުންގެ މުސާރަ އާއި އިނާޔަތްތައް ދިނުމުގައި ޕޭ ކޮމިޝަންގެ މިންގަނޑުތަކަށާއި، ދައުލަތުގެ މުސާރައިގެ ސިޔާސަތުގެ ގާނޫނަށާއި، އަދި ވަޒީފާއާބެހޭ ގާނޫނަށް އަމަލުކުރަންޖެހެ އެވެ. ވަގުތީ މުވައްޒަފުން ނެގޭނީ ވެސް މި މިންގަނޑުތަކުގެ ތެރެއިން، ބަޖެޓުގައި ފައިސާ ހުރިކަން މާލީ ޒިންމާދާރު ވެރިޔާ ކަށަވަރުކުރުމަށްފަހުގަ އެވެ. އަދި ކޮންމެ މަހަކު ކުރަންޖެހޭ މުހިންމު ހަރަދުތައް ކަމަށްވާ ކުއްޔާއި، އަދި ބިލްތައް ފަދަ ކަންކަމަށް ފައިސާ ހުރިކަން ކަށަވަރުނުކޮށް އިތުރު ހަރަދުތަކަކަށް ޒިންމާވެގެން ނުވާނެ އެވެ.
މާލީ ގޮންޖެހުންތައް ކުޑަކުރުމުގެ ގޮތުން، ތަކެއްޗާއި ހިދުމަތުގެ އަގު ހެޔޮކުރުމަށް އެއްވެސް ކަހަލަ ސަބްސިޑީއެއް ނުވަތަ އެހީއެއް ނުދެވޭނެކަމަށް އުސޫލުގައި ބުނެފައިވެ އެވެ. އަދި ބަދަލުގެ ގޮތުގައި ފައިސާ ދޭންޖެހޭ ހާލަތްތަކުގައި އެ ފައިސާ ދޫކުރެވޭނީ ކޯޓުގެ ނިހާއީ ހުކުމަކަށްފަހު، ޝަރުއީ ދާއިރާގެ ބަޖެޓުން ކަމަށް ވެސްވެ އެވެ.
އުސޫލުގައިވާ ގޮތުން ދެފުށް ފެންނަ ގޮތަށް ކަންކަން ހިންގުމަށްޓަކައި، ކޮންމެ މަހަކު ކުރެވޭ ހަރަދުތަކުގެ ތަފުސީލު ހިނގަމުންދާ މަސް ނިމުމުގެ ކުރިން އާންމުކުރަންޖެހެ އެވެ. ޝަރުއީ ދާއިރާއަށް ސެކްޓޯރަލް ގްރާންޓް ދޫކުރެވޭނީ ދައުލަތުގެ ކޭޝްފްލޯއަށް ބަލައި، ކޮންމެ މަހަކު ނުވަތަ ކޮންމެ ކުއާޓަރަކު އެއް ފަހަރު އެވެ.