ހދ. ވައިކަރަދޫގައި 50 ހައުސިން ޔުނިޓް އިމާރާތްކުރަން ހައުސިން މިނިސްޓްރީން އެޗްޑީސީއާ މިއަދު ހަވާލުކޮށްފި އެވެ.
ހައުސިން މިނިސްޓްރީގައި ބޭއްވި ރަސްމިއްޔާތެއްގައި އެއްބަސްވުމުގައި އެ މިނިސްޓްރީގެ ފަރާތުން ސޮއިކުރެއްވީ ސްޓޭޓް މިނިސްޓަރު ހަސަން ރަޝީދެވެ. އެޗްޑީސީން ސޮއި ކުރެއްވީ އެ ކުންފުނީގެ މެނޭޖިން ޑިރެކްޓަރު އަލީ ޒުހައިރު އެވެ.
މިނިސްޓްރީން ބުނީ އެ މަޝްރޫއުގެ ދަށުން ވައިކަރަދޫގައި އިމާރާތްކުރާނީ ތިން ކޮޓަރީގެ ހައުސިން ޔުނިޓްތަކެއް ކަމަށެވެ.
އެ މަޝްރޫއު އެޗްޑީސީއާ ހަވާލުކުރީ 480 ދުވަސް ތެރޭގައި ނިންމާ ގޮތަށެވެ.