ބްލޫ ކާބަން މަޝްރޫއު ހިންގައިގެން ޑޮލަރު ހޯދަން ތިން ރަށަކުން ތައްޔާރުވަނީީ

ބްލޫ ކާބަން މަޝްރޫއު ނުވަތަ ޖައްވުގައި ހުންނަ ކާބަން ޑައިއޮކްސައިޑް ގުދުރަތީ ގޮތުން ނަގައިގެން، ޑޮލަރުން އާމްދަނީ ހޯދަން ތިން ރަށެއްގައި މަޝްރޫއުތައް ހިނގަން އެ ރަށްރަށުގެ ކައުންސިލްތަކުން ތައްޔާރުވެއްޖެ އެވެ. 

ޖައްވަށް ދޫވެފައިހުރި ކާބަން ނަގައި، ގުދުރަތީ ގޮތުން ރައްކާކޮށްފި ނަމަ ކާބަން ކްރެޑިޓް ކަނޑައަޅައި، އެ އަށް ފައިސާ ދިނުމަށް މޫސުމާ ބެހޭ ޕެރިސް އެގްރިމެންޓްގައި ގައުމުތަކުން އެއްބަސްވެފައިވެ އެވެ.

އައިއެމްއެފުން ކަނޑައަޅާފައިވާ ގޮތުން ކާބަން ޓަނަކީ 85 ޑޮލަރެވެ. 

މި ބޭނުމަށް ބްލޫ ކާބަން މަޝްރޫއުތައް ހިންގަން ނިންމާފައިވަނީ ހދ. ވައިކަރަދޫ، ށ. ކަނޑިތީމު އަދި ފުވައްމުލަކުގަ އެވެ. މި މަޝްރޫއުތަކަށް އިންވެސްޓަރުން ހޯދަން އެމްޑީޕީން މިހާރު މާލޭގައި ކުރިއަށް ގެންދާ ކޮންގްރެސްގެ ހަވާސާގައި ބޭއްވި "ރަށްވެހި ތަރައްގީ" ފޯރަމްގައި ވަނީ ހުޅުވާލައިފަ އެވެ. 

މީގެ ތެރެއިން ށ. ކަނޑިތީމުގައި މަޝްރޫއު ހިންގަނީ އެ ރަށުގެ ކައުންސިލާ ގުޅިގެން އަމިއްލަ ޖަމިއްޔާއެއް ކަމަށްވާ ބްލޫ ގައިޑް ފައުންޑޭޝަނުންނެވެ. ކަނޑިތީމުގައި ބްލޫ ކާބަން އޮބްޒަވޭޓަރީއެއް ގާއިމުކުރަން އެ ޖަމިއްޔާއިން އަމާޒު ހިފާފައިވަނީ 10 އަހަރު ދުވަހުގެ މަޝްރޫއުއަކަށެވެ. 

ބްލޫ ގައިޑް ފައުންޑޭޝަނުން ފޯރަމްގައި ހުށަހެޅި ޕްރޮޕޯސަލްގައި ބުނީ މަޝްރޫއު ކައުންސިލުން އެންޑޯޒުކޮށް، ސަރުކާރުން މިކަމަށް ހުއްދަ ހޯދުމަށް އެދި ހުށަހަޅާފައިވާނެ ކަމަށެވެ. ކާބަން ފައިނޭންސިން ހޯދެން އޮތީ އެ މަރުހަލާތަކާއި ސައިންޓިފިކް ދިރާސާތަކެއް ކުރުމަށް ފަހު އެވެ. އެހެންވެ، މެރިން އަދި ކޮރަލް ރިސާޗުތައް ހެދުމަށް އިންވެސްޓަރުންގެ އެހީއަށް ބްލޫ ގައިޑް ފައުންޑޭޝަނުން އެދުނެވެ. 

"ކުރިއަށް އޮތް 10 އަހަރު އަޅުގަނޑުމެންގެ ރަށުގެ ގަސްތަކަށް އަންނަ ބަދަލުތައް ދެނެގަތުމާއި ސައިންޓިސްޓުން މި ހިނގާ ހަރަކާތްތަކުން އަޅުގަނޑުމެންނަށް މި އެނގެނީ ރަށުގައި އަސްލު ހުރި ވެލިއު،" ޖަމިއްޔާއިން ބުންޏެވެ. 

ފުވައްމުލަކުގައި ހިންގަން ނިންމާފައިވާ ކާބަން ފައިނޭންސް އަދި ވެޓްލޭންޑް ޕްރޮޓެކްޝަން މަޝްރޫއުއާ ގުޅޭ ގޮތުން، އެ ސިޓީގެ މޭޔަރު އިސްމާއިލް ރަފީގު ވިދާޅުވި ގޮތުގައި ފުވައްމުލަކުގެ 40 ޕަސެންޓަކީ ފެހި ސަރަހައްދު ކަމަށް ވާއިރު، ކާބަން ގަދައަށް ރައްކާކުރެވޭ ބާވަތްތައް އަލާކުރަން ފަށާފައިވާނެ ކަމަށެވެ. 

"ފުވައްމުލައް ކާބަން ކްރެޑިޓް ރަނގަޅަށް ހަމަޖެހިއްޖެ ނަމަ ރަނގަޅު އެއްޗެއް ކައުންސިލަށް ވަންނާނެ،" އިސްމާއިލް ވިދާޅުވި އެވެ.

މި ތިން މަޝްރޫއުއަށް ފައިނޭންސް ހޯދައިދޭން މަސައްކަތް ކުރައްވާނެ ކަމުގެ ޔަގީންކަން ދެއްވަމުން އެމްޑީޕީގެ ޗެއާޕާސަން ކުރީގެ ރައީސް މުހައްމަދު ނަޝީދު ވިދާޅުވީ ތިން ރަށުގެ މަޝްރޫއުތަކުން ކުރަންވީ ކަމަކީ ރައްކާކުރެވެނީ ކިހާ ކާބަންއެއްތޯ ބަލައި، އެ އަށް ކްރެޑިޓް ހޯދައި، ބައިނަލްއަގްވާމީ މައިދާނުގައި އެ ވިއްކުން ކަމަށެވެ. 

"މިއީ މިހާރު ހިނގަމުން އަންނަ ބޮޑު ވިޔަފާރިއެއް. މި އަދި އެހާ ފުޅާވެގެނެއް ނުދޭ މި މައުލޫމާތާއި މި އިލްމު އެހާ ގިނައެއް ނޫން،" ނަޝީދު ވިދާޅުވި އެވެ. 

ނަޝީދު ލަފާކުރައްވާ ގޮތުގައި ކަނޑިތީމުގައި އެ މަޝްރޫއު ހިނގިއްޖެ ނަމަ އަހަރެއްގެ ތެރޭގައި 75،000 އާއި 100،000 ޑޮލަރާ ދެމެދުގެ އާމްދަނީއެއް ހޯދޭނެ އެވެ. އެއިރުން ދެ ކަމެއް ހާސިލުވާ ކަމާއި އެއީ ރަށުގެ ގުދުރަތީ ކަންކަން ހިމާޔަތްކޮށް، އެ އިން ކައުންސިލަށް އާމްދަނީއެއް ވެސް ލިބުން ކަން ނަޝީދު ފާހަގަކުރެއްވި އެވެ. 

ނަޝީދު ލަފާކުރައްވާ ގޮތުގައި 10 ހެކްޓަރުގެ މެންގްރޫވްއަށް 5،000 ޓަނުގެ ކާބަން ކްރެޑިޓް އުފެއްދެ އެވެ. އެހެންވީމާ ފުވައްމުލަކުގެ މެންގްރޫވްއިން އަހަރަކަށް 82،500 ކާބަން ކްރެޑިޓް އުފެއްދޭނެ އެވެ. އެއިރުން އެ ސިޓީއަށް އަހަރަކު 4.9 މިލިއަން ޑޮލަރު ހޯދޭނެ ކަން ނަޝީދު ފާހަގަކުރެއްވި އެވެ. 

އައްޑޫއަށް ބަލާ ނަމަ އެ ސިޓީއަށް އަހަރަކު ހަ މިލިއަން ޑޮލަރު ހޯދިދާނެ ކަމުގެ ގާބިލުކަން އެބަހުރި ކަމަށް ނަޝީދު ވިދާޅުވި އެވެ. 

މިފަދަ މަޝްރޫއުއަތަކީ ޖައްވުގައި ހުންނަ ކާބަން ޑައިއޮކްސައިޑް ގުދުރަތީ ގޮތުން ނަގައި، އައްސޭރިފަށާއި ކަނޑުގެ އީކޯސިސްޓަމްތަކުގައި ރައްކާތެރި ކުރުމާއި އާލާކުރުމާއި ދެމެހެއްޓެނިވި ގޮތެއްގައި ބެލެހެއްޓުމަށް ހިންގާ ތިމާވެށި ރައްކާތެރިކުރުމުގެ މަޝްރޫއުތަކެކެވެ.

މިފަދަ އީކޯސިސްޓަމްތަކުގެ ތެރޭގައި ކަނޑޫފާތަކާއި ސީގްރާސް އާއި ކުޅިތަކާއި ޗަސްބިންތައް ހިމެނެ އެވެ. ކާބަން ގިނައިން ރައްކާކުރާ އެއްގަމު ޖަންގަލިތަކާ ހިލާފަށް، ބްލޫ ކާބަން އީކޯސިސްޓަމްތަކުގެ ފަސްގަނޑާއި ފަސްފަށަލަތަކުގައި ގިނަ އަދަދަކަށް ކާބަން ރައްކާކުރެވިދާނެ އެވެ. މިފަދަ އީކޯސިސްޓަމްތައް ހަލާކުވެ ނެތިގޮސްފި ނަމަ ރައްކާކުރެވިފައިވާ ކާބަންގެ ބައެއް ޖައްވުގެ ތެރެއަށް ބޭރުވެގެންދެ އެވެ.

ބްލޫ ކާބަން މަޝްރޫއުތަކަކީ ބައިނަލްއަގްވާމީ ގޮތުން ބަލައިގަނެވިފައިވާ ކާބަން މިންގަނޑުތަކުގެ ޝަރުތުތަކަށް ފެތޭ އަދި މޫސުމީ ފައިދާތަކެއް ހުރި މަޝްރޫއުތަކެއްކަން ސާބިތުކޮށްދެވިއްޖެ ނަމަ، އެ މަޝްރޫއުތަކަށް "ކާބަން ކްރެޑިޓް" އުފެއްދުމުގެ ފުރުސަތު ލިބެ އެވެ.

ކާބަން ކްރެޑިޓަކީ އާންމު ގޮތެއްގައި ޖައްވަށް ބޭރުވުން މަދުކުރުން، ނެގުން ނުވަތަ ވަކި މަޝްރޫއެއްގެ ތެރެއިން ޖައްވަށް ބޭރުވިޔަނުދީ ހިފެހެއްޓުމަކީ އެއް ޓަންގެ ކާބަން ޑައިއޮކްސައިޑާ އެއްވަރުގެ މިންވަރެކެވެ. މިފަދަ ކްރެޑިޓްތައް، ކާބަން މަދުކުރުމުގެ މަޝްރޫއުތަކަށް އެހީތެރިވާން ބޭނުންވާ ޖަމިއްޔާތަކަށް ވިއްކުމުގެ ފުރުސަތު އޮވެ އެވެ.

ބްލޫ ކާބަންގެ އިގްތިސާދީ ފައިދާގެ ފުރުސަތުތަކުގެ ސަބަބުން މިފަދަ އީކޯސިސްޓަމްތަކަށް ބައިނަލްއަގުވާމީ ދާއިރާގައި އޮތް ޝައުގުވެރިކަން ވަނީ އިތުރުވެފަ އެވެ. ނަމަވެސް، ކްރެޑިޓް ކުރެވޭނެ ކާބަންގެ ހަގީގީ މިންވަރާއި މަޝްރޫއަކުން ލިބޭނެ އާމްދަނީ އާއި އޭގެ ދިގު މުއްދަތުގެ ކާމިޔާބީ ބިނާވެގެން ވަނީ ބޭނުންކުރާ އީކޯސިސްޓަމަކާއި މަޝްރޫއުގެ އުސޫލުތަކާއި މިންގަނޑުތަކާއި ބާޒާރުގެ ހާލަތުގެ އިތުރުން، ހަގީގީ މޫސުމީ ފައިދާތަކެއް ލިބޭކަން ސާބިތުކޮށްދިނުމުގެ ގާބިލުކަމުގެ މައްޗަށެވެ.