ރައްޔިތުންގެ މަޖިލީހުގެ ރިއާސަތުގެ މޭޒު އުސް ކުރުމަށް ފަހު، އަންނަ ހޯމަ ދުވަހު މަޖިލީހުގެ ޖަލްސާތައް ފަށަން ތައްޔާރުވެފައިވާ ކަން "މިހާރު" އަށް އެނގިއްޖެ އެވެ.
އެނގިފައިވާ ގޮތުގައި ސިފައިންގެ އެހީތެރިކަމާ އެކު، މަޖިލީހުގެ ރިޔާސަތުގެ މޭޒު އުސްކޮށް، ސްޓޭޖެއް ގޮތަށް ވަނީ ހަދައިފަ އެވެ. އެކަމަކު އެ މޭޒު ބަހައްޓަނީ ކިހާ އުހެއްގައި ކަމެއް އެނގިފައެއް ނުވެ އެވެ. އިދިކޮޅު ފަރާތްތަކުން ތުހުމަތު ކުރާ ގޮތުގައި މަޖިލީހުގެ ރިއާސަތުގެ މޭޒު ބަހައްޓަނީ 10 ފޫޓެއްހާ އުހުގަ އެވެ.
މަޖިލީހުގެ އިދާރާ އިން މިއަދު ބުނީ ތިން ވަނަ ދައުރުގެ ޖަލްސާތައް މި މަހުގެ ނުވައެއްގައި ފަށާނެ ކަން މަޖިލީހުގެ ރައީސް އަބްދުﷲ މަސީހު މެމްބަރުންނަށް އަންގަވާފައިވާ ކަމަށެވެ. އަދި އެ ދުވަހުގެ އެޖެންޑާގައި ހިމަނާނެ ކަންކަން ފަހުން އާންމު ކުރައްވާނެ ކަމަށް އެ އިދާރާ އިން ބުންޏެވެ.
އެކަމަކު ރިއާސަތުގެ މޭޒު އުސްކުރުމާ ގުޅޭ ގޮތުން މަޖިލިހުން ވާހަކައެއް ނުދައްކަ އެވެ.
މި އަހަރުގެ ފަހު ދައުރުގެ މަސައްކަތް ފަށާނީ ޖަލްސާ ބާއްވާ ޗެމްބަރަށް ބޮޑެތި ބަދަލުތަކެއް ގެނައުމަށް ފަހު ކަމަށް އިދިކޮޅު މެމްބަރުން ކުރިން ތުހުމަތު ކުރެއްވި އެވެ. އޭރު މަޖިލީހުގައި ސިފައިން މަސައްކަތްތަކެއް ކުރަމުން ދިޔަ ފޮޓޯތައް ވެސް އާންމުވި އެވެ. އެނގިފައިވާ ގޮތުގައި ޗެމްބަރު އުސް ކުރުމުގެ އިތުރުން މޭޒު ވަށައިގެން ބުލެޓް ޕްރޫފް ބިއްލޫރި ޖެހުމަށް ވެސް ވަނީ ނިންމައިފަ އެވެ.
އިދިކޮޅު ފަރާތްތަކުން ބުނީ މަޖިލީހުގައި ރައްޔިތުންގެ އަޑު އިއްވުމަށް ކުރާ މަސައްކަތް ހުއްޓާނުލާނެ ކަމަށާއި ރައްޔިތުންގެ އަތުނުޖެހޭ ހިސާބު މައްޗަށް އެއްވެސް ބޭފުޅަކަށް ނޭރުއްވޭނެ ކަމަށެވެ.
ދެވަނަ ދައުރުގައި ބޭއްވި އެންމެ 11 ޖަލްސާ އަށް ފަހު، މެމްބަރުން އެއް މަސް ދުވަހުގެ ޗުއްޓީއަކަށް ވަޑައިގެންނެވީ މިދިޔަ އޮގަސްޓް 24 ގަ އެވެ. ދެވަނަ ދައުރުގައި 39 ޖަލްސާ ބާއްވަން ކަނޑައަޅާފައިވީ ނަމަވެސް ތިން މަސް ދުވަހުގެ އެ ދައުރުގައި ބޭއްވި ޖަލްސާތަކުގެ އަދަދު މަދުވުމާއި އެކަށީގެންވާ މަސައްކަތެއް ނުކުރުމުން ގިނަ ބައެއްގެ ފާޑުކިއުން މަޖިލީހަށް އަމާޒުވި އެވެ.
ދެވަނަ ދައުރުގައި މަޖިލީހުގެ ރައީސް މަސީހް މަގާމުން ވަކިކުރުމުގެ މައްސަލަ ބޭރުކޮށްލުމާ އެކު، ސަރުކާރާއި އިދިކޮޅު ފަރާތްތަކާ ދެމެދު އުފެދިފައި އޮތް ކޯޅުންތަކަށް އަދިވެސް ހައްލެއް ނުލިބެ އެވެ. އެހެންވެ ތިން ވަނަ ދައުރުގެ ޖަލްސާތައް ވެސް އަމާންކަމާ އެކު ކުރިއަށް ހިނގާނެ ކަމަކަށް ނުބެލެވެ އެވެ.
މަސީހް މަގާމުން ވަކިކުރުމަށް 45 މެމްބަރުންގެ ސޮޔާ އެކު މަޖިލީހަށް ވެއްދި މައްސަލަ ބޭރުކޮށްލީ، އޭގައި ސޮއިކުރެއްވި ހަ މެމްބަރެއްގެ ގޮނޑި ގެއްލިފައިވާ ކަމަށް އިލެކްޝަންސް ކޮމިޝަނުން ކަނޑައެޅުމާ ގުޅިގެން ކަމަށް މަޖިލީހުގެ އިދާރާ އިން ވަނީ ބުނެފަ އެވެ.
އެކަމަކު އިދިކޮޅު ފަރާތްތަކުން ކެނޑިނޭޅި ބުނަމުން އަންނަނީ މަޖިލީހަށް ފުރަތަމަ ވެސް އެޖެންޑާ ކުރަން ޖެހޭނީ މަސީހްގެ އިތުބާރު ނެތްކަމުގެ މައްސަލަ ކަމަށާއި އެ ނޫން ގޮތަކަށް ޖަލްސާ ކުރިއަށް ގެންދަން ޖާގަ ނުދޭނެ ކަމަށެވެ. އޭގެ ނަތީޖާ އަކީ އޭގެ ފަހުން އޮތް ހަތަރު ޖަލްސާ ވެސް އިދިކޮޅު މެމްބަރުންގެ ހަޅޭކާއި ޒުވާބާއި ހަމަނުޖެހުމުގެ ތެރޭގައި ބާއްވަން ޖެހުމެވެ. އެ ހަތަރު ޖަލްސާ ވެސް ބޭއްވީ ސިފައިންގެ "ފައުޖެއް" ރިޔާސަތުގެ މޭޒުގެ ކުރިމަތީގަ އާއި ވަށައިގެން އަތުރާލައިގެންނެވެ.
