ރާއްޖޭގެ ޖަލުތަކުގައި ކުއްލި ގޮތަކަށް މީހުން މަރުވުން އާއްމުވެފައިވާ ކަމަށް ބުނެ އެ މައްސަލަ ތަހުގީގުކުރަން ބައިނަލްއަގުވާމީ ފަރާތްތަކަށް އެމްޑީޕީން ރޭ ގޮވާލައިފި އެވެ.
މީގެ ދެ އަހަރު ކުރިން، 2015 ގެ މެއި އެއް ވަނަ ދުވަހު ސަރުކާރާ ދެކޮޅަށް ކުރި މުޒާހަރާގައި ހިންގި ހަމަނުޖެހުންތަކާ ގުޅިގެން ފަސް އަހަރަށް ޖަލަށްލާފައިވާ އަބްދުﷲ ރަޝީދު، 51، އިއްޔެ ވަނީ މަރުވެފަ އެވެ. އައިޖީއެމްއެޗުގައި ފަރުވާދެމުން އަންނަނިކޮށް އޭނާ މަރުވިއިރު، އެކަށީގެންވާ ބޭސްފަރުވާ ފޯރުކޮށްދޭން ކަރެކްޝަންސް އިން އިހުމާލުވެފައިވާ ކަމަށް އާއިލާއާ ހަވާލީ އެމްޑީޕީން ބުންޏެވެ.
މި މައްސަލާގައި ކަންބޮޑުވުންފާޅުކޮށް އެމްޑީޕީން ނެރުނު ބަޔާނެއްގައި ބުނީ ޖަލުތަކުގައި ހުކުމް ތަންފީޒުކުރަމުންދާ މީހުން ކުއްލި ގޮތަކަށް ނުވަތަ މީހުން ވީނުވީއެއް ނޭނގި މަރުވުމުން އާއްމުވެފައިވާ ކަމަށެވެ. އަބްދުﷲ ރަޝީދަކީ ވޭތުވެދިޔަ ދެ އަހަރުގެ ތެރޭގައި މިގޮތަށް މަރުވި ހަތް ވަނަ މީހާ ކަމަށް ވެސް އެމްޑީޕީން ބުންޏެވެ.
އާއިލާއާ ހަވާލާދީ އެ ޕާޓީން ބުނީ ޖަލަށް ލިއިރު އަބްދުﷲ ރަޝީދަކީ އެއްވެސް ބައްޔަކަށް ފަރުވާ ކުރަމުން އައި މީހެއް ނޫން ކަމަށެވެ. އޭނާގެ ސިއްހީ ހާލަތު ގޯސްވާން ފެށީ ޖަލުގައި ކަމަށާއި ފަރުވާ އަށް ތަކުރާރުކޮށް އެދުމުން ވެސް ކަރެކްޝަނުން އިހުމާލުވެފައިވާ ކަމަށް ތުހުމަތު ކުރެވޭ ކަމަށެވެ.
އަބްދުﷲ ރަޝީދު މާލެ ގެނެސް އައިޖީއެމްއެޗުގައި ފަރުވާ ދޭން ފެށީ، ގޮޅިތެރެއަށް އަނބުރައިގަނެގެން ވެއްޓުމުން، އެ ގޮޅީގައި ތިބި އެހެން މީހުން އަޑުގަދަކުރުމުން ކަމަށް ވެސް އެމްޑީޕީން ބުންޏެވެ.
އެހެންވެ މިއީ، ތަހުގީގުކުރަން ޖެހޭ މައްސަލައެއް ކަމަށާއި މި މަރާއި މިގޮތަށް ވީނުވީއެއް ނޭނގި މަރުތައް ގިނަވާ މައްސަލަތައް ތަހުގީގުކުރުމުގައި އިންސާނީ ހައްގުތަކަށް މަސައްކަތްކުރާ ޖަމިއްޔާތަކުން އެހީތެރިވެދޭން އެމްޑީޕީން ވަނީ ގޮވާލައިފަ އެވެ.
މިފަދަ މަރުތައް ތަހުގީގުކުރުމަކީ ހިއުމަން ރައިޓްސް ކޮމިޝަނުގެ މަސްއޫލިއްޔަތަކށްވާއިރު ވެސް ޒިންމާއަދާކުރުމުގައި އެ ކޮމިޝަން ފޭލްވެފައިވާ ކަމަށް ވެސް އެމްޑީޕީން ބުންޏެވެ.
ޖަލުތަކުގެ ހާލަތު ރަނގަޅުކޮށް، ގައިދީންގެ އިންސާނީ ހައްގުތައް ކަށަވަރުކޮށްދޭން ސަރުކާރުން މަސައްކަތް ކުރަމުން ނުދާ ކަމަށް ބުނެ ވެސް އެމްޑީޕީން ވަނީ ކަންބޮޑުވުންފާޅުކޮށްފަ އެވެ.
