އަންނަ އަހަރުގެ ރިޔާސީ އިންތިޚާބުގައި ހޮވަންޖެހޭނީ އިންތިގާލީ ރައީސެއް ކަމަށް ކުރީގެ ރައީސް މުހައްމަދު ނަޝީދު މިއަދު ވިދާޅުވެއްޖެ އެވެ.
އެމްޑީޕީގެ ގައުމީ މަޖިލީހުގެ މެމްބަރުންނާ މުޚާތަބު ކުރައްވައި، ވާހަކަފުޅު ދައްކަވަމުން ނަޝީދު ވިދާޅުވީ މިހާރު ކަންކަން ހިނގަމުންދާ ގޮތަށް ބަލާއިރު މިނިވަން އިންތިޚާބެއް ހޯދުމަކީ ވަރަށް އުނދަގޫ ކަމެއް ކަމަށެވެ. އެހެންވެ، އެމަނިކުފާނުގެ ގަބޫލުފުޅު ކުރައްވަނީ 2018 ގައި ހޮވަން ޖެހޭނީ ގުޅިފައިވާ ޕާޓީތަކުގެ ތެރެއިން ނެރޭ އިންތިގާލީ ރައީސެއް ކަމަށާއި އެ ރައީސެއްގެ ދައުރަކީ މުއައްސަސާތައް އިސްލާހުކޮށް، މިނިވަން އިންސާފުވެރި އިންތިޚާބެއް ބޭއްވޭނެ މާހައުލެއް ގާއިމް ކުރުން ކަމަށް ނަޝީދު ވިދާޅުވި އެވެ.
"އެ ވެރިމީހާގެ މަސައްކަތަކީ އިންތިގާލީ މަރުހަލާއެއްގައި، އިންތިގާލީ މުއްދަތެއްގައި ކުރަން ހުރި މަސައްކަތްތައް. ޚާއްސަކޮށް ޖުޑިޝަރީ އިސްލާހު ކުރުމާއި ވެރިކަމުގެ ކަންކަން އިސްލާހު ކުރުން." ނަޝީދު ވިދާޅުވި އެވެ.
ނަޝީދު ވިދާޅުވި ގޮތުގައި އިންތިގާލީ ކެންޑިޑޭޓަކު ނެރޭނީ އިދިކޮޅު ކޯލިޝަނުން ގުޅިގެން ނެރޭ ލިސްޓަކުންނެވެ. އެކަން އެގޮތަށް ކުރަން ޖެހެނީ އެމަނިކުފާނު ވިދާޅުވި ގޮތުގައި، އިދިކޮޅު އެއްވެސް ޕާޓީއަކަށް 2018 ގެ އިންތިޚާބު ކާމިޔާބު ކުރެވޭނެ ކަމުގެ އެއްވެސް "ސައިންޓިފިކް ޔަގީންކަމެއް" ނެތުމުންނެވެ. ސައިންޓިފިކް ޔަގީންކަމަކީ ވޯޓުގެ އަދަދުން މޮޅުވުން ކަމަށާއި އެ ޔަގީންކަމެއް ނެތް ކަމަށް ނަޝީދު ވިދާޅުވި އެވެ.
"އެއްވެސް ބޭފުޅަކަށް، މި އިންތިޚާބުން އެ ބޭފުޅުންނަށް ކާމިޔާބުވާނޭ މަންޒަރެއް ނުފެންނާނެ. ހަމަގައިމު ވެސް އަޅުގަނޑަކަށް ނުފެނޭ،" ނަޝީދު ވިދާޅުވި އެވެ،
އިންތިގާލީ ރައީސަކު ހޮވުމަކީ ރާއްޖެއަށް އެންމެ ފައިދާ ހުރިގޮތް ކަމަށާއި އެކަމަށް އެމްޑީޕީގެ ގައުމީ މަޖިލީހުގެ ތާއީދު ލިބޭނެ ކަމަށް އުއްމީދު ކުރައްވާ ކަމަށް ނަޝީދު ވިދާޅުވި އެވެ. އަދި އިންތިގާލީ ރައީސްގެ ވެސް މެނިފެސްޓޯއެއް އޮންނަން ޖެހޭނެ ކަމަށާއި އެކަންކަން ހާސިލް ކުރެވޭނީ ވެރިކަން ހިންގުމުގެ ނިޒާމް ރަނގަޅަށް އޮވެގެން ކަމަށް އެމަނިކުފާނު ވިދާޅުވި އެވެ.
އިންތިގާލީ ރައީސަކު ހޮވަންޖެހޭ ކަމަށް ނަޝީދު ވިދާޅުވިއިރު އިދިކޮޅު ކޯލިޝަންގެ ހުރިހާ ލީޑަރުންހެން މިވަގުތު ތިއްބެވީ ރިޔާސީ އިންތިޚާބުގައި ވާދަ ނުކުރެވޭނެ ފަދަ ހާލަތެއްގަ އެވެ. އެގޮތުން ނަޝީދުގެ މައްޗަށް 13 އަހަރުގެ ޖަލު ހުކުމެއް އޮތްއިރު އަދާލަތު ޕާޓީގެ ރައީސް ޝައިހް އިމްރާންގެ މައްޗަށް 12 އަހަރުގެ ޖަލު ހުކުމެއް ވަނީ އައިސްފަ އެވެ. ތިން އަހަރުގެ ޖަލު ހުކުމެއް އައިސްފައިވާ ޖުމްހޫރީ ޕާޓީގެ ލީޑަރު ގާސިމް އިބްރާހިމާއި ކުރީގެ ރައީސް މައުމޫނަށް 65 އަހަރު ފުރިފައިވާތީ ރިޔާސީ އިންތިޚާބުގައި ވާދައެއް ނުކުރެވޭނެ އެވެ.
