ފުވައްމުލަކުގައި ހިނގި އެކްސިޑެންޓެއްގައި ފުއްޕާމެއަށް ލޭ އެޅި ފުރާނަ ސަލާމަތްކުރެވިދާނެ ކަމާ މެދު އުއްމީދު ކަނޑާލާފައި އޮތް ދިވެހި ޒުވާނަކަށް އޭޑީކޭ އިން ފަރުވާދީ ރަނގަޅުކޮށްފި އެވެ.
މި މަހު ފަސް ވަނަ ދުވަހު ފުވައްމުލަކު ލިންކް ރޯޑްގައި ކާރަކާއި ސައިކަލެއް ޖެހި ހިނގި އެކްސިޑެންޓްގައި އެރަށު އަހުމަދު މުތީއުގެ ފުއްޕާމެއަށް އަނިޔާވުމުގެ އިތުރުން ވާތު ކޮނޑު ކަށިގަނޑާއި ވާތު ފައި ވަނީ ބިނދިފަ އެވެ. އަދި ކަނާތު ކޮނޑު ހުޅަށް ވެސް އަނިޔާވި އެވެ.
ފުވައްމުލަކު ހޮސްޕިޓަލުން އެމަޖެންސީގައި އޭނާ މާލެ ފޮނުވައި ފުރަތަމަ އެޑްމިޓްކުރީ އައިޖީއެމްއެޗްގަ އެވެ. ނަމަވެސް އައިޖީއެމްއެޗުން ފަރުވާ ދެވެން ނެތުމުން މުތީއު ބަދަލުކުރީ އޭޑީކޭ ހޮސްޕިޓަލަށެވެ.
އާއިލާއިން ފުރަތަމަ ހީކުރީ ފަޔާއި ކޮނޑު ކަށިގަނޑު ބިނދުން ނޫން މައްސަލައެއް ނެތް ކަމަށެވެ. ރާއްޖެއިން ފަރުވާ ހޯދަން ނިންމީ ވެސް އެހެންވެ އެވެ.
އެކަމަކު އޭނާގެ ފުއްޕާމޭގައި ލޭ ގަނޑުވުމުގެ ސަބަބުން ފުރާނައަށް އޮތީ ވަރަށް ބޮޑަށް ނުރައްކާވެފަ އެވެ.
އޭޑީކޭގެ ކަށީގެ ޑޮކްޓަރު މުހައްމަދު މިޝްވާާާރު އަޝްފާގް ވިދާޅުވީ މުތީއު ގެނައި އިރު އޮކްސިޖަން ގުޅާފައި ހުއްޓަސް އޭނާގެ ހަށިގަނޑަށް ބޭނުންވާ ވަރަށް އޮކްސިޖަން ނުލިބޭ ކަމަށެވެ. އެހެންކަމުން އޮޕަރޭޝަން ކުރަން އޮތް ރޭ އައިސީޔޫއަށް ބަދަލުކުރި ކަމަށް ވިދާޅުވި އެވެ.
އޭގެ ފަހުން ވެސް ހާލަތު ރަނގަޅެއް ނުވި އެވެ. ޒުވާނާގެ ހާލު ދަށްވުމުން އެންމެ ފަހުން ވެންޓިލޭޓަރަށް ލި އެވެ.
"އެންމެ ފުރަތަމަ ވެންޓިލޭޓަރަށް ލީ ދުވަހު ވެސް އަޅުގަނޑާއި އައިސީޔޫ ސުޕެޝަލިސްޓާ ހީކޮށްގެން ތިބީ ވެންޓިލޭޓާއިން ނެގުމަކީ ނުވަތަ ނެގޭނީ ކޮން ދުވަހަކުން ކަމެއް ނޭނގެޔޭ. ޕޭޝަންޓް ކޮންމެ ވަގުތެއްގައި ވެސް ނިޔާވެދާނެ ކަމުގެ ބިރު މަތީގައި ދެ ރޭ ވެސް އަޅުގަނޑުމެން ތިބީ،" މިޝްވާރު ވިދާޅުވި އެވެ.
ހާލަތު ދަށްކަމުން މުތީއު އަށް ފަރުވާ ދޭން ހާއްސަ ޓީމެއް އެކުލަވާލި އެވެ. އެ ޓީމުގައި ހިމެނުނީ ކަށީގެ ޑޮކްޓަރުންގެ އިތުރުން އައިސީޔޫގެ ހާއްސަ ޑޮކްޓަރަކާއި ފުއްޕާމޭގެ ހާއްސަ ޑޮކްޓަރަކާއި ހޭނައްތާ ޑޮކްޓަރެކެވެ.
ފުއްޕާމެއަށް ކުރިމަތިވި ނުރައްކާތެރި ހާލަތުން މުތީއު އެންމެ ފަހުން، ސަލާމަތްވި އެވެ. އޭރު ވެންޓިލޭޓަރުގައި އޮންނަތާ ހަތަރު ދުވަސް ވެއްޖެ އެވެ.
"އޮޕަރޭޝަނާ ހަމައަށް ގެންދެވުނީ އަނިޔާވިތާ ހަފްތާއެއް ފަހުން،" މިޝްވާރު ވިދާޅުވި އެވެ.
ބިނދުނު ތަންތަން ރަނގަޅުކުރަން ދޮޅު ގަޑިއިރުގެ އޮޕަރޭޝަން ކުރީ މިޝްވާރުގެ އިތުރުން ކަށީގެ އެހެން ޑޮކްޓަރެއް ކަމަށްވާ ހުސެން ޝަކީލް އެވެ. އަދި މުތީއުގެ ފުއްޕާމެއަށް ލިބުނު ގެއްލުން ވެސް މިހާރު ވަނީ ރަނގަޅުވެފަ އެވެ.
މިހާރު މުތީއު އޮތީ ކޮޓަރީގަ އެވެ. އޭނާގެ ހާލު ވެސް ރަނގަޅެވެ. އޮކްސިޖަން މާސްކާ ނުލައި ނޭވާ ވެސް ލެވެ އެވެ.
އޭނާ ބުނީ ކޮންމެވެސް ވަރަކަށް ހަށިގަނޑުގައި ރިހުން ހުރި ނަމަވެސް ހާލަތު ރަނގަޅު ކަމަށެވެ.
މުތީއުގެ މަންމަ ހައްވާ މޫސާ ބުނި ގޮތުގައި އޭނާގެ ދަރިފުޅުގެ ފުއްޕާމެއަށް އެވަރުގެ ގެއްލުމެއް ލިބިފައި އޮތް ކަން ފުރަތަމަ ނޭނގެ އެވެ. އެންމެން ވެސް ހީކުރީ ތަންތަން ބިނދުން ނޫން އަނިޔާއެއް ވެފައި ނެތް ކަމަށް، ކަމަށް ހައްވަ ބުންޏެވެ.
އެކަމަކު "އަޅުގަނޑުމެން އެއްވެސް ވަރަކަށް އުންމީދެއް ކަނޑައެއް ނުލަން،" ހައްވަ ބުންޏެވެ.
"އަސްލު އައިއިރު އަޅުގަނޑުމެންނަކަށް ނޭނގެ މިހާ ވަރު ވެފައި އޮތް ކަމެއް. ފެންނަން ހުރީ ފައި ބިންދައިގެން ގޮސް، ދެން ކޮނޑަށް ލިބިފައިވާ ގެއްލުން."
އޭޑީކޭ އިން ބުނި ގޮތުގައި މީގެ ކުރިން ވެސް އެފަދަ އޮޕަރޭޝަންތައް އެ ހޮސްޕިޓަލްގައި ކޮށްފައި އެބަ ހުއްޓެވެ. ނަމަވެސް އެހާ ހާލަތު ދަށްކޮށް އޮތް ބަލިމީހަކު ރަނގަޅު ކުރެވުން އެ ހޮސްޕިޓަލުން ދެކެނީ ބޮޑު ކާމިޔާބީއެއްގެ ގޮތުގަ އެވެ.
އޭޑީކޭއިން ބުނީ މުތީއު ގެނައި އިރު އޮތް ހާލަތާއި އޭގެ ފަހުން ވެންޓިލޭޓަރުގައި ބާއްވަން ޖެހުނު ނަމަވެސް އޮޕަރޭޝަންކޮށް ރަނގަޅު ކުރެވިފައިވާތީ އެއިން އެނގެނީ އެފަދަ ބޮޑެތި ކޭސްތަކުގައި ވެސް އެކަށީގެންވާ ފަރުވާ އެ ހޮސްޕިޓަލުން ލިބެން ހުރި ކަމެވެ.
