މާލެ އާއި ހުޅުލެއާ މެދު އަޅާ ބްރިޖުގެ ކޮންކްރީޓް މަސައްކަތާއި ދަގަނޑު ބޭނުންކޮށްގެން ކުރަމުން އަންނަ މަސައްކަތްތައް އަންނަ އަހަރުގެ ޖުލައި މަހުގެ ފުރަތަމަ ހަފްތާގައި ނިމޭނެ ކަމަށް ހައުސިން މިނިސްޓަރު ޑރ. މުހައްމަދު މުއިއްޒު މިއަދު ވިދާޅުވެއްޖެ އެވެ.
ބްރިޖުގެ މަސައްކަތް ކުރާ ކޮންޓްރެކްޓަރާއެކު ބޭއްވި ބައްދަލުވުމަކަށް ފަހު، މިނިސްޓަރު މުއިއްޒު ކުރެއްވި ޓުވީޓެއްގައި ވިދާޅުވީ، މަސައްކަތް ކުރިއަށް ގެންދަނީ ކަނޑައަޅާފައިވާ ތާވަލާ އެއްގޮތަށް އަދި ބްރިޖުގެ ފެންވަރު ބަލަހައްޓާ އަރުުޕްގެ ބެލުމުގެ ދަށުން ކަމަށެވެ.
ސަރުކާރުން އިއުލާން ކޮށްފައިވާ ގޮތުގައި އަންނަ އަހަރުގެ މިނިވަން ދުވަސް، ޖުލައި 26 ގައި ބްރިޖް ހުޅުވާނެ އެވެ.
ބްރިޖުގެ އައިބީމްތައް ނުވަތަ ކޮންކްރީޓުން ހަދާފައިވާ ބޮޑެތި ބެރިތައް އެޅުމުގެ މަސައްކަތް މިހާރު އަންނަނީ ކުރަމުންނެވެ. މާލޭ ކޮޅުން ބްރިޖު ފެށޭ ހިސާބުން ބެރިއަޅަން މި ފެށީ ޑެކު އެޅުމަށްޓަކަ އެވެ. ބެރިތައް ނިމުމުން، ޑެކު އަޅައި، ޗައިނާގައި މިހާރު ތައްޔާރުކުރަމުން އަންނަ ސުޕަ ސްޓްރަކްޗާ ގެނެސް އަތުރާލާނީ އެވެ.
ބްރިޖްގެ މަސައްކަތަށް 200 މިލިއަން ޑޮލަރު ޚަރަދު ވާއިރު އޭގެ ތެރެއިން 116 މިލިއަން ޑޮލަރަކީ ޗައިނާ ސަރުކާރުގެ ހިލޭ އެހީ އެވެ. އަދި 72 މިލިއަން ޑޮލަރަކީ ޗައިނާގެ ލޯނު އެހީ އެވެ. މި މަޝްރޫއަށް ދިވެހި ސަރުކާރުން 12 މިލިއަން ޑޮލަރު ހޭދަކުރެ އެވެ.