ސަރުކާރު ވައްޓާލަން ކުރާ މަސައްކަތުގެ ތެރޭގައި ފުލުހުންގެ ސަފުތައް ރޫޅާލައި ބައިބައިކޮށްލަން ރާވާ "ދަންތޫރައެއްގައި" ނުޖެހި، މާދަމާގެ އެއްވުން ވެސް ހުއްޓުވާނެ ކަމުގެ އިންޒާރު ފުލުހުން މިއަދު ވެސް ދީފި އެެވެ.
ރައީސް އަބްދުﷲ ޔާމީން "ހުއްޓުވާ" ނަމުގައި އިދިކޮޅު ފަރާތްތަކުން މާލޭގައި މާދަމާ ބާއްވަން އުޅޭ އެއްވުމާ ގުޅޭ ގޮތުން ފުލުހުން މިއަދު ބޭއްވި ޕްރެސް ކޮންފަރެންސްގައި ވެސް ފުލުހުންގެ ތަރުޖަމާން އަހްމަދު ޝިފާން ވިދާޅުވީ އެއީ ގާނޫނާ ޚިލާފު އެއްވުމެއް ކަމަށެވެ. އެ އެއްވުން ބޭއްވުމުގެ ހުއްދައެއް، ކަމާބެހޭ އެއްވެސް އިދާރާއަކުން މިހާތަނަށް ހޯދާފައި ނުވާ ކަމަށް އޭނާ ވިދާޅުވި އެވެ.
އެހެންކަމުން، މާދަމާ ވެސް އިދިކޮޅުގެ އެއްވުން ކުރިއަށް ގެންދަން ފުލުހުން ފުރުސަތު ނުދީ، ހުއްޓުވާނެ ކަމަށް ޝިފާން ވިދާޅުވި އެވެ.
"ޣައިރު ގާނޫނީ އެއްވުމެއް ކަމަށް ފުލުހުން ބުނެފައިވާއިރު ވެސް އެއްވުމަށް މީހުން އެއްކުރަން އަންނަނީ މަސައްކަތް ކުރަމުން. ގާނޫނީ ސަރުކާރު ހުއްޓުވައި، ވައްޓާލައި، ނިންމާކަށް ފުލުހުން ފުރުސަތެއް ނުދޭނަން،" ޝިފާން ވިދާޅުވި އެވެ.
އޭނާ ވިދާޅުވި ގޮތުގައި ގާނޫނާ ޚިލާފަށް ސަރުކާރު ވައްޓާލަން ކުރާ މަސައްކަތާ އެކު ފުލުހުންގެ ތެރޭގައި ބައިބައިވުން އުފައްދަން ވެސް އަންނަނީ މަސައްކަތް ކުރަމުންނެވެ. ފުލުހުންގެ ނަމުގައި، ސަރުކާރަށް އިންޒާރުދީ ޔޫޓިއުބުގައި ރޭ އަޕްލޯޑްކުރި ވީޑިއޯ އަށް އިޝާރާތް ކުރައްވައި ވިދާޅުވީ، އެފަދަ ވީޑިއޯތަކާއި ސޯޝަލް މީޑިއާގައި ތަފާތު ވާހަކަތައް ފެތުރި ނަމަވެސް ފުލުހުންނަށް އެއްވެސް އަސަރެއް ނުކުރާނެ ކަމަށެވެ.
އެފަދަ އެއްވެސް ދަންތޫރައެއްގައި ފުލުހުން ނުޖެހޭނެ ކަމަށާއި ފުލުހުންގެ ސަފުތައް އެއަށްވުރެން މާ ބަދަހި ކަމަށް ވެސް ޝިފާން ވިދާޅުވި އެވެ.
"ދިވެހި ފުލުހުން ހަމަގައިމު ވެސް މިއަދަކު އެފަދަ ދަންތޫރައެއްގައި ނުޖެހޭނެ. ފުލުހުންގެ ގައުމީ އަދި ގާނޫނީ ވާޖިބު ދިވެހި ފުލުހުންނަށް ވަރަށް ސާފު،" އޭނާ ވިދާޅުވި އެވެ.
މަޖީދީ މަގުގައި މަދު ބަޔަކު އެއްވުންތައް ކުރިއަށް ގެންދިއުމުގެ ސަބަބުން އިޖްތިމާއީ ގޮތުންނާއި އިގްތިސާދީ ގޮތުން ވެސް އާއްމުންނަށް ބޮޑެތި ދަތިތަކެއް ކުރިމަތިވަމުންދާ ކަމަށާއި މިއީ ގިނަ ބައަކަށް ބޮޑެތި އުނދަގޫތަކެއް ގެއްލޭ ކަމަކަށް ވާތީވެ ވިސްނަން ޖެހޭ ކަމަށް ޝިފާން ވިދާޅުވި އެވެ.
އޭނާ މިއަދު ވެސް ގޮވާލެއްވީ، އިދިކޮޅު އެއްވުމަށް އެއްވެސް ރައްޔިތަކު ނުނިކުތުމަށެވެ. އެ އެއްވުމުގައި ބައިވެރިވުމުގެ ސަބަބުން ރައްޔިތަކަށް ލިބޭ އެއްވެސް ގެއްލުމެއްގެ ޒިންމާ ފުލުހުން ނުނަގާނެ ކަމަށް ޝިފާން ވިދާޅުވި އެވެ.