ޝަރީއަތަކަށްފަހު އުއްތަމަ ފަނޑިޔާރު ޖަލަށް ގެންދަނީ -- ފޮޓޯ: ހުސެއިން ވަހީދު/ މިހާރު
26 އެޕްރީލް 2018 - 12:36
14 comments
އުއްތަމަ ފަނޑިޔާރު އަބްދުﷲ ސައީދުގެ މައްޗަށް ދައުލަތުން އުފުލާފައިވާ ދައުލަތުގެ މަސައްކަތަށް ހުރަސް އެޅުމުގެ ދައުވާ ކުރިއަށް ނުގެންދެވޭނެ ކަމަށް ކަނޑައަޅައި ދިނުމަށް ވަކީލުން މިއަދު ހުށަހަޅައިފި އެވެ.
އުއްތަމަ ފަނޑިޔާރުގެ މައްޗަށް ދައުލަތުން ކުރާ ދައުވާތަކުގެ ތެރެއިން، ލިޔެކިޔުން ބަދަލު ކުރުމަށް ސަރުކާރުން ގާއިމު ކޮށްފައިވާ ނިޒާމު، ގަވަމެންޓް އީ ލެޓާ މެނޭޖްމަންޓް ސިސްޓަމް (ޖެމްސް) ހުއްޓުމަކަށް ގެނައުމަށް އެންގެވި ކަމަށް ބުނެ އެ މަނިކުފާނާ ދެކޮޅަށް ދައުލަތުން ކުރާ ދައުވާގެ އިބްތިދާއީ އަޑުއެހުމުގައި ވަނީ ދެ ފަރާތުން ބޭނުންވާ ހުށަހެޅުންތައް، ހުށަހެޅުމުގެ ފުރުސަތު ދީފަ އެވެ. އެގޮތުން ދައުލަތުގެ ވަކީލުންނާއި ދިފާއީ ވަކީލުން ގިނަ ކަންތައްތަކެއް ހުށަހަޅާފައިވެ އެވެ.
ދައުލަތުން ވަނީ އުއްތަމަ ފަނޑިޔާރުގެ މައްޗަށް ކުށް ސާބިތުކުރަން ސިއްރު ތިން ހެއްކަކާއި ސިއްރު ލިޔެކިޔުންތައް ހުށަހަޅުއްވައިފަ އެވެ. ދައުލަތުގެ ވަކީލު ޝަމްލާ ޝަމީމް ވިދާޅުވީ ޖިނާއީ އިޖުރާއާތުގެ ގާނޫނު އޮތީ ހެކި ބަސް ދޭ މީހާ އަށް ހިމާޔަތް ދިނުމާއި އެ މީހާ ސިއްރުކޮށް ދެވިދާނެ ކަމަށެވެ. އެހެންވެ، އެފަދަ އަމުރެއް ނެރެ ދިނުމަށް ދައުލަތުގެ ވަކީލު ވަނީ އެދިވަޑައިގެންފަ އެވެ.
މީގެ އިތުރުން ހެކި ބަސް ދޭ މީހާ ސިއްރު ނުކުރާ ނަމަ، ހެކި ނައްތާލުމުގެ ބިރު އޮތުމުން ހެކިންނާ ގުޅޭ މައުލޫމާތު ސިއްރު ކުރަން ޖެހޭ ކަމަށް ވެސް އޭނާ ވިދާޅުވި އެވެ. އަދި އެމީހުންގެ މައުލޫމާތު ހާމަކޮށްފިނަމަ، ޖިސްމާނީ ގޮތުން އެމީހުންނަށް އަނިޔާއެއް ދީފާނެ ކަމަށް ވެސް ޝަމްލާ ވިދާޅުވި އެވެ.
މި މައްސަލައިގައި އުއްތަމަ ފަނޑިޔާރުގެ ވަކީލުންގެ ޓީމުން ވަނީ 11 ހުށަހެޅުމެއް ހުށަހަޅައިފަ އެވެ. އޭގައި މައިގަނޑު ގޮތެއްގައި ހިމެނެނީ ގާނޫނުތަކުގެ ދަށުން މައްސަލަ ކުރިއަށް ނުގެންދެވޭނެ ކަމަށް ބުނާ ހުއްޖަތްތަކެކެވެ. އެގޮތުން އުއްތަމަ ފަނޑިޔާރާ ދެކޮޅަށް ދައުވާ އުފުލީ ފުރިހަމަ ނުވާ ކަންތައްތަކެއްގެ މައްޗަށް ބިނާކޮށް ކަމަށާއި ޖިނާއީ އިޖުރާއާތުގެ ގާނޫނާ މުޅިން ހިލާފަށް ކަމަށް ވަކީލު ނޫރުއްސަލާމް ވިދާޅުވި އެވެ.
މީގެ އިތުރުން، މި މައްސަލައިގައި ދައުވާ ކުރި އިރު، ޕްރޮސެކިއުޓާ ޖެނެރަލް (ޕީޖީ)ގެ ހުއްދަ ލިޔުމަކުން ދިން ކަން އެނގެން ނެތް ކަމަށާއި ދައުވާ އަށް ނަން ދީފައި އޮތީ ވެސް ގާނޫނާ ހިލާފަށް ކަމަށް ވެސް އޭނާ ވިދާޅުވި އެވެ. އަދި ކުށުގެ އަމަލު ހިނގި ވަގުތެއް ބަޔާންކޮށްފައި ނެތުމާއި ދައުލަތުން އުއްތަމަ ފަނޑިޔާރުގެ މައްޗަށް ސާބިތު ކުރަން ހުށަހެޅި ހެކިތައް ބަލައިނުގަތުމަށް ވެސް ނޫރުއްސަލާމް ވިދާޅުވި އެވެ.
ނޫރުއްސަލާމް ވިދާޅުވި ގޮތުގައި ދައުލަތުން ހުށަހެޅި ވީޑިއޯ/އޯޑިއޯ ރިކޯޑިންތައް ދިފާއީ ވަކީލުންނާ ހިއްސާ ކޮށްފައެއް ނުވެ އެވެ. ޖިނާއީ އިޖުރާއާތުގެ ގާނޫނުގެ ދަށުން މި ތަކެއްޗަކީ ދިފާއީ ވަކީލުންނަށް ލިބެން ޖެހޭ އެއްޗެއް ކަމަށް ވެސް ނޫރުއްސަލާމް ވިދާޅުވި އެވެ. އެހެންވެ، އޭނާ އެދިވަޑައިގަތީ އެ ތަކެތި ދިފާއީ ވަކީލުންނަށް ހާމަކޮށް ދިނުމަށް އެކަށީގެންވާ މުއްދަތެއް ދިނުމަށެވެ.
މި މައްސަލަ ބައްލަވާ ގާޒީ އިބްރާހިމް އަލީ ވިދާޅުވީ އަންނަ ހޯމަ ދުވަހު ބާއްވާ އަޑުއެހުމެއްގައި ރައްދު ދިނުމުގެ ފުރުސަތު ދައުލަތުގެ ވަކީލުންނާއި ދިފާއީ ވަކީލުންނަށް އޮންނާނެ ކަމަށެވެ.
އެކަމާ ގުޅިގެން، އުއްތަމަ ފަނޑިޔާރުގެ ވަކީލު ހިސާން ހުސައިން ވަނީ އެ ދުވަހު ތަފްސީލްކޮށް ވާހަކަ ދެއްކުމުގެ ފުރުސަތު ލިބޭނެތޯ ސުވާލު ކުރައްވައިފަ އެވެ. އޭގެ ޖަވާބުގައި ގާޒީ ވިދާޅުވީ "އިރު އޮއްސެންދެން" ވެސް ތަފްސީލްކޮށް ވާހަކަ ދެއްކުމުގެ ފުރުސަތު އޮންނާނެ ކަމަށެވެ.
އުއްތަމަ ފަނޑިޔާރުގެ މައްޗަށް ދައުވާ ކުރަނީ، ޖެމްސްގެ ހިދުމަތް، މިދިޔަ ފެބްރުއަރީ 4 އަދި 5 ގައި ސުޕްރީމް ކޯޓުގައި ހުއްޓުމަކަށް ގެނައުމަށް އެންގެވި ކަމަށް ބުނެ އެވެ.
މި މައްސަލަ އެމަނިކުފާނުގެ މައްޗަށް ސާބިތުވެއްޖެ ނަމަ، ހަތަރު މަހާއި 24 ދުވަހުގެ ޖަލު ހުކުމެއް އަންނާނެ އެވެ. މިއަދު ބޭއްވި އަޑުއެހުމުގައި އުއްތަމަ ފަނޑިޔާރު އެއްވެސް ވާހަކައެއް ނުދައްކަވަ އެވެ.
އިތުރު ލިޔުންތައް
މަގްބޫލް ލިޔުންތައް
Mihaaru Print Edition
Download Mihaaru News App
Offline Alerts
SMS 'sub mihaaru' to 5454
ކޮމެންޓްތައް
ރާޖާ
27 April 2018
ފޯނަށް ޖަވާބު ނުދިން އަރީފަށް ވެސް މިދަޢުވާބާ؟
ުުޔނ
27 April 2018
ދައުލަތަށް މި ޝަރީޢަތް ކުރިއަށްގެންދަން އުނދަގޫވެގެން އުޅެނީ އުތަ؟ ބަޔަކުމީހުން ވެރިކަމާހެދި ހަޑިހޭވިޔަސް ފުކެއްބޮޑުވަރު!
ޢަބްދުﷲނާފިޒް
27 April 2018
"އުއްތަމަ ފަނޑިޔާރުގެ މައްޗަށް ދައުވާ ކުރަނީ، ޖެމްސްގެ ހިދުމަތް، މިދިޔަ ފެބްރުއަރީ 4 އަދި 5 ގައި ސުޕްރީމް ކޯޓުގައި ހުއްޓުމަކަށް ގެނައުމަށް އެންގެވި ކަމަށް ބުނެ އެވެ". ދެން އެންމެ ރަނގަޅޭ، ތިޔަބުނާ ފެބްރުއަރީ މަހުގެ 4 އަދި 5 އައީ ފެބްރުއަރީ 1 ގެ ފަހުން ނޫންބާ! އެދުވަހުން ފެށިގެން ފެބްރުއަރީ ހަތަރެކާ ހަމަޔަށް ، އެންމެ ފަހުބަސް ބުނާ ފަރާތްކަމުގަވާ ސްޕްރީމް ކޯޓުން ނެރުނު އަމުރެއް އޮވެމެ އެއަމުރަށް ތަބާނުވެ އެއަމުރަށް ގޮންޖަހާ އެއަމުރު ތަންފީޒު ނުކުރުމުގެ އެއްވެސް އިހްތިސާސެއް ދައުލަތުގެ އެއްވެސް ފަރާތަކަށް ލިބިގެން ވޭތޯ.
ކެޓް
26 April 2018
ސްޕްރީން ކޯޓްގެ 5 ފަނޑިޔާރުންގެ އިއްތިފާގުން ނެރުއްވި ހުކުމަށްބަލާއިރު އެކަމަށް ނުފޫޒު ފޯރުވޭނެ ފަދަ އެއްވެސް ކަމެއް ކުރަން އުޅުމާއި ފަރުވާކުޑަ ކުރުމަކީވެސް ، އެއްވެސް ފަރާތަކަށް ކުރުމަށް ހުއްދަ ނުކުރާ ކަމަކެވެ. ވީއިރު މެއިލް މެދުވެރިކޮށްވެސް އެފަދަ ކަމެއް ކޮށް މަޝްވަރާ ކުރެވޭކަށް ނެތެވެ. އަދި އެހުކުމުގެ ފަހުން ހުރި ކަންބޮޑު ވުންތަކަށް ސްޕްރީންކޯޓުން ވަނީ ޖަވާބު ދެއްވާފައެވެ. އެ ހުކުމް ތަންފީޒު ކުރުމަށް އެއްވެސް ހުރެހެއް ނެތްކަމަށާއި ވަކިވަކި ބޭފުޅުންގެ މައްސަލަ ބެލުމުގެ ފުރުސަތު އޮތްކަމަށެވެ.
ހަނަމި
26 April 2018
އިރުއޮއްސުމުން ދެންވާނީ ކިހިނެއް؟
ޠަޔާޠީޞް
26 April 2018
ޢިއްތިފާގަކުން ނަމަވެސް އަބަދުވެސް އަޑުއިވެނީ ސަރުކާރާ އިދިކޮޅު ފަރާތްކަށް ޖިސްމާނީ އަނިޔާ ލިބޭ އަޑު. އެހެންވީމަ ހެކިން ސިއްރުކުރުމުގެ މާކަ ބޮޑު ބޭނުމެއް އޮތްހެނެތް ހިޔެއްނުވޭ.
އަހުމަދުބެ
26 April 2018
ޕީޖީ އޮފީހުގެ އާބާދީގެ ގިނަ މުވައްޒަފުންނަކީ އަންހެން ބޭކަނބަލުނެވެ. ތިޔަކަނބަލުން ކޯޓުގައި ތިޔަ ކުރައްވާ މަސައްކަތައް ސާބަހެވެ. ކުރިއަށް ގެންދަވާށެވެ. އަދި ދައުލަތުން ބޭނުންވާ ގޮތައް މައްސަލަ ތައް ނިންމުމުގައި ބޮޑަށް މުރާލި ވާން ވީއެވެ. އިދި ކޮޅުގަ މާބޮޑު ބާރެއް ނެތެވެ.
ފައިސަލް ދީދީގެ ހުވަފެނީ ދުނިޔެ
26 April 2018
އުއްތަމަ ފަނޑިޔާރު ވަގަށް ނަގާގެން ދައުވާތަށް ހަދަ ހަދާގެން ތުއްތު ކުދިން ތަކެއް ލައްވާ ބަޔަކު އަޑީގައި ތިބެގެން ހަދަ ފިލުވާ ޤައުމެެއްގެ ޖުޑީޝަރީ މީގެފަހުން އަބަފު ވެސް އޮންނާނީ މިހާލުގައެވެ.
މޮޑަފްް
26 April 2018
ޖެމްސް ހުއްޓުވިޔަސް ދައުވާއެއް ކުރެވިގެންނުވާނެ. އުއްތަމަ ފަނޑިޔާރަށް އޮންނާނެ އެކޯޓުގެ ހުރިހާ ކަންތަކެއް ހުއްޓުވުމާ ނުހުއްޓުވުމެގެ ބާރު. ތިޖެމްގެ މިސާލަކީ ތަނެއްގަ ބަހައްޓާފަ ހުންނަ މެއިލްބޮކްސްއެއްގެ މިސާލު. އެ މެއިލްބޮކްސް ތަޅުލުމާ ނައްޓާލުމާ ހުޅުވުމާ މިއީ އެތަނެއްގެ އެޑްމިނިސްޓްރޭޝަނުން ބަލަހައްޓާ ކަންތައްތައް. އެކަމަކާ ރައީސަކާ ބެހޭ ކަމެއްނޫން.
އާދަނު
26 April 2018
ވާނުވާ. ކަލެއަށް ތިއޮތީ ޖެމްސް އަކީ ކޯޗެއްކަން އެނގިފައި.
ޝަރުމް
26 April 2018
މަގޭ ހިތަށް އަރަނީ ތިދިފާއީ ހެކިތަކާއި އެހެނިހެންތަކެތި ކޯޓަށް ހުށަހަޅަނީ ކީއްވެގެންހޭ. މިގައުމުގެ ޝަރުއީނިޒާމުގައި ސިޔާސީ މައްސަލަ ނިނިދަނީ ކިހިނަކުންކަން އެންމެންނަށް އެނގޭ. ދެން ކީއްކުރަން ކުރާ ކަމެއްބާ ތިއީ.
ޖެމްސް
26 April 2018
ހުކުމާގުޅޭ ގޮތުން އުއްތަމަ ފަނޑިޔާރު ކުރިންވެސް ސަރުކާރަށް ޖަވާބެއް އެރުވި. އެ ހުކުމް ތަންފީޒު ކުރުމުގައި އެއްވެސް ހުރަހެއް ނެތް ކަމަށް. ހަމަހަމަ ކަމާއެކު ޝަރީޢަތް ކުރާނަމަ ފުރަތަމަ ކުރަންޖެހޭނީ ޓެރަރިޒަމް ދަޢުވާގެ ޝަރީޢަތް އެހެނީ އެ މައްސަލަ ސާބިތު ނުވެއްޖެނަމަ ޖެމްސްގެ މައްސަލަ އަކީ ބެލޭނެ މައްސަލައެއް ނޫން. އަދި ހަމައެހެންމެ ޖެމްސް މެދުވެރިކޮށް ރައީސް އެއްޗެއް ފޮނުވާކަށް ނުވެސްޖެހޭނެ. 5 ފަނޑިޔާރުން ސޮއި ކުރި ހުކުމަކާގުޅޭގޮތުން ރައީސް ސްޕްރީމް ކޯޓަށް އެއްޗެއް ފޮނުވައި ފިއްޔާ އޭ ޝަރުޢީ ހުކުމަކަށް ނުފޫޒު ފޯރުވުން (އޮބްސްޓަރަކްޝަން އޮފް ޖަސްޓިސް). ޖެމްސް މައްސަލަ ސާބިތު ވެއްޖެނަމަ ދެ މީހުންވެސް ކުށްވެރިވާނެ. ރާއްޖޭގެ ޖިނާޢީ ޢަދުލުގެ ތެރޭގައި އުޅޭ މީހުނަށް މިވަރު ނޭނގުމަކީ ހިތާމަކުރަންޖެހޭ ކަމެއް.