ރާއްޖޭގެ މިނިވަންކަން ނަގާލަން ކުރީގެ ރައީސް މުހަންމަދު ނަޝީދު މަސައްކަތްޕުޅު ކުރައްވަމުން ގެންދަވާ ކަމަށް ބުނެ، އެތައް ބައެއްގެ ފާޑުކިޔުން އެމަނިކުފާނަށް އަމާޒުވެއްޖެ އެވެ. އާންމުންގެ ފާޑުކިޔުން އެމަނިކުފާނަށް އަމާޒު މި ވީ އައްޑު އަތޮޅުގައި ވަކި ދައުލަތެއް އުފެއްދެވުމުގެ ވާހަކަތަކެއް ބަޔަކާ އެކު ކުރެއްވި ކަމަށް ބުނާ އޯޑިއޯއެއް އިއްޔެ ލީކުވުމާ ގުޅިގެންނެވެ.
އައްޑޫގެ ބަޔަކާ އެކު ނަޝީދު ވާހަކަފުޅު ދައްކަވަމުން ގެންދަވަނިކޮށް އޭގެ ތެރެއިން މީހަކު ވަނީ އައްޑޫގައި ވަކި ދައުލަތެއް ހަދަން ހިނގާށޭ ބުނެ އެކަން ނަޝީދަށް ހުށަހަޅައިފަ އެވެ. އެއާއެކު ޖަވާބުގައި ނަޝީދު ވިދާޅުވަނީ ހަތިޔާރު ނެތި ވަކި ނުވެވެނޭ ކަމަށެވެ.
އެހެން ނަމަވެސް "އެކަން ވެދާނެ" ކަމަށް ނަޝީދު ވިދާޅުވެފައިވެ އެވެ. އެގޮތުން އައްޑޫ ގޮތަށް އޮތް އެހެން ގައުމެއް މިސާލު ނަޝީދު ނަންގަވަ އެވެ. އެއީ ކެރީބިއަން ސަރަހައްދުގައި އޮން ބްރިޓިޝިން ވާޖިން އައިލެންޑް ޓޯޓަލޯ އެވެ. އެތަނުގައި އުޅެނީ އައްޑޫގެ އާބާދީއާ އެއްވަރުގެ ބައެއް ކަމަށް އެ އޯޑިއޯގައި ނަޝީދު ވިދާޅުވެ އެވެ.
ގައުމުގެ އެކި ސަރަހައްދުތަކުގައި ވަކި ދައުލަތްތައް އުފެއްދުމަކީ ގައުމުގެ މިނިވަންކަން ގެއްލި ހަމަނުޖެހުންތައް ހިނގަން މެދުވެރިވާނެ ކަމަކަށް ވާތީ އެކަމުގެ ކަންބޮޑުވުން ފާޅުކޮށް އެތައް ބަޔަކު އަންނަނީ ނަޝީދާ ދެކޮޅަށް އަޑުއުފުލަމުންނެވެ. އޭގެ ތެރޭގައި ޕީޕީއެމްގެ ލީޑާޝިޕްގެ ބޭފުޅުން ވެސް ހިމެނެ އެވެ.
ނަޝީދަށް ފާޑުވިދާޅުވެ، ޕީޕީއެމްގެ ޕާލަމެންޓްރީ ގުރޫޕުގެ ލީޑަރު އަހުމަދު ނިހާން ވިދާޅުވީ "ބަޣާވާތް ކުރުން ނޫން ކަމެއް އޭނަ [ނަޝީދު] އަށް ނޭންގޭނެ" ކަމަށެވެ.
ޕީޕީއެމްގެ ސެކްރެޓަރީ ޖެނެރަލް، އަދި ރައްޔިތުންގެ މަޖިލީހުގެ ނިލަންދޫ ދާއިރާގެ މެމްބަރު އަބްދުﷲ ޚަލީލް ވިދާޅުވީ ވެރިކަން ނުލިބުމުން ގައުމު ބައިބައިކުރުމަށް "ކެނެރި އަނދިރިން" އަމާޒު ހިފާފައިވާ ކަމަށެވެ.
"ދިވެހިރައްޔިތުން މި ގައްދާރުންގެ ހަސީލަތާ މެދު ފާރަވެރިވެ ސަމާލުވާން ޖެހޭ. ދިވެހި ފަސްގަނޑުން މި ގައްދާރުންނަށް ޖާގަ ދީގެން ނުވާނެ،" ހަލީލް ވިދާޅުވެފައިވެ އެވެ.
އަމިނަތު ޝަރުމީލާ އަލީގެ ނަމުގައި ފޭސްބުކްގައި ކޮމެންޓް ކުރި މީހަކު ބުނެފައިވަނީ ދެ ކޮރެއާ ވެސް ސުލްހަ ވީއިރު ރާއްޖޭގެ ސިޔާސީ މީހުން މަގާމު ހޯދުމަށް މަސައްކަތް ކުރަމުންދަނީ ގައުމު ފަނާކުރަން ކަމަށެވެ.
ވަކި ދައުލަތެއްގެ ވާހަކަ ދައްކަނީ ވެރިކަން ބޭނުންވެގެން ކަމަށް ބުނެ ވެސް ބައެއް މީހުން ވަނީ ފާޑު ކިޔައިފަ އެވެ. އޭގެ ތެރެއިން މީހަކު ކޮށްފައިވާ ކޮމެންޓެއްގައި ނަޝީދާ ސުވާލުކޮށްފައި ވަނީ "އެހާ ވެސް ވެރިކަން ބޭނުން؟"ތޯ އެވެ.
ސިޔާސީ ލީޑަރުން ހިމެނޭގޮތަށް ނުވަ މީހަކު މިނިވަން ކުރުމަށް ފެބްރުއަރީ 1 ވަނަ ދުވަހު ސުޕްރީމް ކޯޓުން ނެރުނު އަމުރު ތަންފީޒު ކުރުމަށް އިންޑިއާގެ އެހީއަށް ނަޝީދު އެދުމުން ވެސް އެތައް ބަޔަކު އޭރު ނަޝީދަށް ފާޑު ކިޔެވެ. އެ މީހުން ބުނަމުން ދިޔައީ ރާއްޖޭގެ ދާލިހީ ކަންކަމަށް ބާރު ފޯރުމުގެ ފުރުސަތު ނަޝީދު ދެނީ ކަމަށެވެ.
އައްޑު އަތޮޅު ހިމެނޭގޮތަށް ދެކުނުގެ ތިން އަތޮޅު ވަކި ވެގެން ވަކި ދައުލަތެއް އުފެއްދުމުގެ މަސައްކަތް 1959 އަހަރު ކޮށްފައިވެ އެވެ. ޔުނައިޓެޑް ސުވަދީބް އައިލެންޑްސްގެ ނަމުގައި ވަކި ދައުލަތެއް އުފައްދަން އުޅުނީ އިނގިރޭސީން އަޑީގައި އޮވެގެންނެވެ.
އިނގިރޭސީންގެ އަތްދަށުން ރާއްޖެ މިނިވަން ކުރެއްވި ކުރީގެ ރައީސް އިބްރާހިމް ނާސިރު ވަނީ ދެކުނުގެ އަތޮޅުތަކުން ވަކި ދައުލަތެއް ހެދުމަށް ކުރި މަސައްކަތް ބާރުގެ ބޭނުންކޮށްގެން ހުއްޓުވައިފަ އެވެ.