ރާއްޖޭގައި މަސައްކަތް ކުރަމުން އަންނަ އިންޑިއާ ރައްޔިތުންނަށް ވިސާ އާއި ވޯކް ޕާމިޓް އާނުކޮށްދޭ މައްސަލަ ހައްލުކޮށް ދިނުމަށް ކެރަލާގެ ޗީފް މިނިސްޓަރު ޕިނަރަޔީ ވިޖަޔަން އިންޑިޔާ ސަރުކާރަށް ގޮވާލައްވައިފި އެވެ.
އިންޑިއާގެ އެކްސްޓާނަލް އެފެއާޒް މިނިސްޓަރު ޝުޝްމާ ސުވަރާޖް އަށް ފޮނުއްވި ސިޓީއެއްގައި ވިޖަޔަން ވިދާޅުވީ އިންޑިއާގެ 30،000 އަށް ވުރެ ގިނަ މީހުން ރާއްޖޭގެ އެކި ދާއިރާތަކުގައި މަސައްކަތް ކުރަމުން އަންނަ ކަމަށެވެ. އޭގެ ތެރޭގައި ގިނައީ ކެރަލާ ރައްޔިތުން ކަމަށް އޭނާ ވިދާޅުވި އެވެ.
އިންޑިއާ ރައްޔިތުން ރާއްޖޭގައި މަސައްކަތް ކުރާ ދާއިރާތަކުގެ ތެރޭގައި ސިއްހީ ދާއިރާ އާއި ތައުލީމީ ދާއިރާ އާއި ޓޫރިޒަމް ދާއިރާ ހިމެނޭ ކަމަށް ވެސް ޗީފް މިނިސްޓަރު ވިދާޅުވި އެވެ.
ރާއްޖޭގައި އުޅޭ އިންޑިއާގެ ރައްޔިތުންނަށް ފިއްތުންތަކެއް ކުރިމަތި ކުރަމުން އަންނާތީ އެކަމާ ކަންބޮޑުވެވަޑައިގަންނަވާ ކަމަށް ވެސް ވިޖަޔަންގެ ސިޓީގައި ވިދާޅުވި އެވެ.
އޭނާ ވިދާޅުވި ގޮތުގައި މީގެ ކުރިން އިންޑިއާ ރައްޔިތުންނަށް ހަފުތާއެއްގެ ތެރޭގައި ވޯކް ޕާމިޓް ލިބެ އެވެ. އެކަމަކު ވޯކް ޕާމިޓް މިހާރު ނުލިބޭ ކަމަށް އޭނާ ވިދާޅުވި އެވެ.
އެހެންވެ، ޗީފް މިނިސްޓަރު، ސުޝްމާ އަރިހުން އެދިވަޑައިގަތީ، އިންޑިއާ ރައްޔިތުންނަށް ވިސާ އާއި ވޯކް ޕާމިޓް ނުލިބޭ މައްސަލަ ގައުމީ ކަމެއްގެ ގޮތުގައި ދެކިގެން އެކަމަށް ހައްލެއް ހޯއްދަވައި ދެއްވުމަށެވެ.
އިންޑިއާ ރައްޔިތުންނަށް ވިސާ އާއި ވޯކް ޕާމިޓް ނުލިބެނީ ފަހަކަށް އައިސް ރާއްޖޭގެ ސިޔާސީ މަސްރަހުގައި ހިނގަމުން އަންނަ ކަންކަމާ ގުޅިގެން ކަމަށް ވެސް ވިޖަޔަން ވިދާޅުވި އެވެ.
ރާއްޖޭގައި އުޅޭ އިންޑިއާ މީހުންނަށް ވިސާ އާއި ވޯކް ޕާމިޓް ނުލިބޭ ކަމަށް އިންޑިއާ އިން ބުނަމުން އަންނަ މައްސަލާގައި ރާއްޖޭގެ އިމިގްރޭޝަންގެ ބަހެއް އަދި ނުލިބެ އެވެ.
ރާއްޖޭގެ ސިޔާސީ މަސްރަހު ހަލަބޮލިވެ، ރާއްޖެ-އިންޑިއާގެ ޚިޔާލު ތަފާތުވުން ވަނީ ބޮޑުވެފަ އެވެ. ރާއްޖޭގެ ސިޔާސީ ކަންކަމަށް ހައްލު ހޯދަން އެދި އިންޑިއާ އިން ހަރުކަށި، ބަޔާންތައް ނެރެފައިވާ މައްސަލައިގައި، ދިވެހި ސަރުކާރުން ހިތްހަމައެއް ނުޖެހެ އެވެ. ސަރުކާރުން ތަކުރާރުކޮށް ދޭ ޖަވާބަކީ، ބޭރުގެ ބާރުތަކާ އެކު ކިތަންމެ އެކުވެރި ގުޅުމެއް އޮތަސް ރާއްޖޭގެ ކަންކަން އަމިއްލަ އަށް ނިންމަން ފުރުސަތު ދޭން ޖެހޭ ކަމަށެވެ.
ރާއްޖޭގައި ހިނގަމުން އަންނަ ކަންކަމާ މެދު ކަންބޮޑުވުން ފާޅުކޮށް، އެންމެ ފަހުން އިންޑިއާ އިން ނެރުނު ބަޔާނުގައި ވަނީ މިނިވަން މުއައްސަސާތަކާއި ސުޕްރީމް ކޯޓާއި ރައްޔިތުންގެ މަޖިލީހުގެ މަސައްކަތްތައް މިނިވަންކަމާ އެކު ކުރެވޭނެ މަގު ފަހިކޮށް ދިނުމަށް ދިވެހި ސަރުކާރަށް ގޮވާލައިފަ އެވެ.
ކުރީގެ ރައީސް މައުމޫން އަބްދުލްގައްޔޫމާއި އުއްތަމަ ފަނޑިޔާރު އަބްދުﷲ ސައީދު ޖަލަށް ލީ އިންސާފުވެރިކަމާ އެކު ބޭއްވި ޝަރީއަތަކުން ނޫން ކަމަށާއި އެ ޝަރީއަތް ދިޔަ ގޮތުން މިނިވަން ރިޔާސީ އިންތިހާބަކާ މެދު ސުވާލު އުފެދޭ ކަމަށް، އިންޑިއާ އިން އެންމެ ފަހުން ނެރުނު ބަޔާނުގައިވެ އެވެ.