ކުރިއަށް އޮތް ރިޔާސީ އިންތިހާބަށް އެމްޑީޕީންް ކެމްޕޭން ކުރާނެ އެއްވެސް ފުރުސަތެއް ނުލިބޭ ކަމަށާއި އެކަން ކުރުމަށް ލިބިފައި އޮތީ ހަމައެކަނި އެ ޕާޓީގެ ހަރުގޭގެ ހަތަރު ފާރުން އެތެރެ ކަމަށް އެމްޑީޕީން މިއަދު ބުނެފި އެވެ.
ހަރުގޭގައި މިއަދު ބޭއްވި ނޫސްވެރިންގެ ބައްދަލުވުމުގައި އެމްޑީޕީގެ ޑެޕިއުޓީ ޗެއާޕާސަން އަލީ ނިޔާޒު ވިދާޅުވީ އިންތިހާބު ބޯމަތިވެ، ސަރުކާރުން ފޯރިއާއެކު ކެމްޕޭން ކުރި ނަމަވެސް އެމްޑީޕީއަށް އެ ފުރުސަތު ނެތް ކަމަށެވެ. އަދި އެކަން ކުރަން، ހަރުގޭގެ ޕޭވްމަންޓާ ހަމައަށް ވެސް އެ ޕާޓީގެ މެމްބަރުންނަށް ބޭރަށް ނުނިކުމެވޭ ކަމަށް އޭނާ ވިދާޅުވި އެވެ.
"އަޅުގަނޑުމެން މަގުމައްޗަށް ނިކުތަސް ޓްރެފިކަށް އުނދަގޫވޭ. ނޫނީ ކޮންމެވެސް ގާނޫނަކާ އެބަ ހިލާފުވޭ. ޖަލްސާއެއް ބޭއްވިޔަސް، އެހެން ކަމެއް ކުރިޔަސް ކުރަން މި ޖެހެނީ މި ހަރުގޭގެ ހަތަރު ފާރުން އެތެރޭގައި،" ނިޔާޒް ވިދާޅުވި އެވެ.
އެމްޑީޕީން އިއްޔެ ވަނީ ހަމަ މި ޝަކުވާތައް އިލެކްޝަންސް ކޮމިޝަން (އީސީ)އަށް ވެސް ހުށަހަޅާފަ އެވެ.
ނިޔާޒް ވިދާޅުވީ އެ ޝަކުވާތައް ބަލައިދޭނެ ކަމަށް އީސީން އެ ވަގުތު ބުނި ކަމަށާއި އެކަމަކު އިއްޔެ ހަވީރު ވެސް، ޕާޓީގެ ހަރަކާތްތަކާ ދެކޮޅަށް ފުލުހުން ނިކުތް ކަމަށެވެ.
އެމްޑީޕީން މިދިޔަ ހަފުތާގައި ބާއްވަން އުޅުނު ދުވުމަކަށް ވެސް ފުލުހުން ހުރަސްއަޅައި އެ ޕާޓީގެ އިސް ބޭފުޅުންތަކެއް ހައްޔަރުކުރި އެވެ. އަދި ޕޯސްޓަރު ހިއްޕަން އުޅުމުން، ފުލުހުން ވަނީ އެކަން ވެސް ހުއްޓުވައިފަ އެވެ.
އެމްޑީޕީން ވަނީ ރިޔާސީ އިންތިހާބަށް އީސީން އެކުލަވާލާފައިވާ ގައުމީ ލަފާ ދޭ ކޮމެޓީގެ ބައްދަލުވުންތައް ވެސް، މިކަމާ ގުޅިގެން ބޮއިކޮޓްކޮށްފަ އެވެ. އަދި އެކަމަށް ހައްލެއް ނާންނަނީސް، އިންތިހާބުގެ ކަންކަމުގައި އެ ކޮމިޝަނަށް އެއްބާރުލުން ނުދޭނެ ކަމަށް ވެސް އެ ޕާޓީން ބުންޏެވެ.
އޭގެ ފަހުން އީސީން ވަނީ، އެކަންކަމާ ގުޅޭގޮތުން ފުލުހުންނާ މަޝްވަރާކޮށްފަ އެވެ.
ނިޔާޒް ވިދާޅުވީ ބައްދަލުވުންތަކުގައި އިލެކްޝަންސް ކޮމިޝަނުން ވާހަކަ ދައްކަނީ ވަރަށް ރީތިކޮށް ކަމަށާއި އެކަމަކު، ބައްދަލުވުން ނިންމައި ނިކުންނަ ހިސާބުން އަމަލުތައް ހުންނަނީ އެއާ އިދިކޮޅަށް ކަމަށެވެ. އެހެންވެ، އީސީން އެ ތަންފީޒު ކުރަނީ ކޮންތަނަކުން އަންނަ އަމުރުތަކެއްތޯ އޭނާ ސުވާލު ކުރެއްވި އެވެ.
"އަޅުގަނޑުމެން ގުޅިއްޔާ މިހާރު ވެސް ޝަރީފް (އީސީގެ ރައީސް އަހުމަދު ޝަރީފް) ފޯނު ނަންގަވާނެ. އެޕޮއިންޓްމެންޓް ވެސް ދެއްވާނެ. އެކަމަކު ދައްކަވާ ވާހަކައެއްގެ ނަތީޖާއެއް ނުނިކުންނާނެ. އަޅުގަނޑުމެންނަށް އެނގޭ އީސީއަށް ކުރިމަތިވެފައިވާ ނުފޫޒުތައް. އެހެންވެ، ފުލުހުންނަށާއި އީސީއަށް ވެސް ދަންނަވަން ނުފޫޒުތަކުން އެއްކިބާވެ ރައްޔިތުންނަށް ހިދުމަތް ކުރުމަށް،" ނިޔާޒް ވިދާޅުވި އެވެ.
އޭނާ ވިދާޅުވީ އިންތިހާބާ ދެމެދު އޮތީ ވަރަށް މަދު ދުވަސްކޮޅެއް ކަމަށާއި އެހެންވެ، ކެމްޕޭން ކުރުމަށް ހުރި ދަތިތަކާ ގުޅޭ ގޮތުން މަޝްވަރާ ކުރަން އަދިވެސް ބޭނުންވެ ވަޑައިގަންނަވާ ކަމަށެވެ. އަދި އެކަމަށް އީސީ އާއި ފުލުހުންގެ ކިބައިން ނިޔާޒް އެދިވަޑައިގެންނެވި އެވެ.
