ކުރީގެ ރައީސް މައުމޫން އަބްދުލްގައްޔޫމުގެ ދިިގު 30 އަހަރުވީ ވެރިކަން ނިމުމަކަށް ގެނައުމަށް ކުރި މަސައްކަތުގެ ތެރޭގައި އެންމެ ބޮޑު ގެއްލުމެއް ދީފައިވަނީ ދިވެހި ދައުލަތަށް ކަމަށް ރައީސް އަބްދުﷲ ޔާމީން މިރޭ ވިދާޅުވެއްޖެ އެވެ.
މިނިވަން ދުވަސް ފާހަގަ ކުރުމަށް ޖުމްހޫރީ މައިދާނުގައި މިރޭ ބޭއްވި ޖަލްސާގައި ވާހަކަފުޅު ދައްކަވަމުން ރައީސް ވިދާޅުވީ ދެހާހުގެ އަހަރުތަކުގެ ކުރީކޮޅުއްސުރެ ގައުމުގައި އުފެއްދި ހިޔާލުތަފާތުވުންތަކާއި ބައިބައިކުރަނިވި ވިސްނުންތަކުން ދައުލަތަށް ބޮޑެތި ލޮޅުންތަކެއް އަރާފައިވާ ކަމަށެވެ. އަދި "ރާއްޖޭގައި އޮތް ދުވަސްވީ ވެރިކަމެއް" ބަދަލުކުރުމަށް ކުރި މަސައްކަތުގެ ތެރޭން ދައުލަތަށް ބޮޑު ގެއްލުމެއް ލިބިފައިވާ ކަމަށް ވެސް ވިދާޅުވި އެވެ.
ރައީސް ވާހަކަފުޅު ދެއްކެވި އިރު، އެ ވެރިކަން ކުރެއްވި ރައީސް މައުމޫންގެ ނަމެއް ވިދާޅެއް ނުވެ އެވެ. އަދި ވެރިކަން ބަދަލު ކުރުމަށް މަސައްކަތް ކުރީ ކޮން ބައެއް ކަމެއް ވެސް ވިދާޅެއް ނުވެ އެވެ. އެކަމަކު އެ މަސައްކަތުގެ ތެރެއިން ގައުމަށް ލިބުނު ގެއްލުންތައް ވަރަށް ތަފްސީލުކޮށް ވިދާޅުވި އެވެ.
ރައީސް ޔާމީން ވިދާޅުވި ގޮތުގައި ވެރިކަން ބަދަލުކުރުމަށް ހިންގި ހަރަކާތްތަކުގެ ތެރެއިން، ދައުލަތުގެ އެންމެ މަތީ މަސްލަހަތުތައް ރައްކާކުރަން ހުރި މުއައްސަސާތަކަށް ވަނީ ހަމަލާދީފަ އެވެ. ހާއްސަކޮށް، ގައުމުގެ ސަލާމަތީ ކަންކަން ޔަގީންކުރަން ހުރި ތަންތަނާއި ގާނޫނު ތަންފީޒު ކުރާ މުއައްސަސާތަކަށް ފާޅުގައި ހަމަލާތައް އަމާޒުކޮށްފައިވާ ކަމަށް ވިދާޅުުވި އެވެ.
އެ މަނިކުފާނު ވިދާޅުވީ މައުމޫންގެ ވެރިކަން ބަދަލުކުރުމުގެ ތެރެއިން ދިވެހި ދައުލަތް ވަރަށް ބޮޑަށް ބަލިކަށިކޮށްފައިވާ ކަމަށެވެ. އަދި ގާނޫނާ އެއްގޮތަށް އުޅުމަކީ މަދަނީ ޒިންމާއެއް ކަމަށް ޒަމާނުއްސުރެ ދިވެހިން ދެކެމުން އައި ވިސްނުން ދޫކޮށް، ގާނޫނުގެ ބޭރުން އުޅުމަކީ މިނިވަން ވިސްނުން ކަމަށް އާއްމުކޮށްފައިވާ ކަމަށް ވެސް ވިދާޅުވި އެވެ. ރައީސް ތުހުމަތު ކުރެއްވި ގޮތުގައި މިއީ އަމާންކަމާއި މަޑުމައިތިރިކަން ދޫކޮށްލައި، އިޖްތިމާއީ އިންތައް މުގުރާލުމަށް ރާވައިގެން ހިންގާފައިވާ ކަންކަމެވެ.
"އެ މަސައްކަތްތުގެ ތެރޭގައި، ފުލުހުންނާއި ސިފައިންނަކީ ފަނޑިޔާރުންނަކީ އިހްތިޔާރެއް ނެތް ބައެއް ކަމަށް ވަނީ ދައްކުވައިދީފައި. އަލިފާންބޯޅަ އާއި މިރުސްފެން ބޭނުންކޮށްގެން ސިފައިންނާއި ފުލުހުންނަށް ހަމަލާދީ ގަޔަށް އަތްލާން ވަނީ ދަސްކޮށްދީފައި." މިއީ އެންމެ ޑިމޮކްރަޓިކް ގައުމުތަކުގައި ވެސް ޖިނާއީ ކުށްތައްކަން ފާހަގަ ކުރައްވައި ރައީސް ވިދާޅުވި އެވެ.
އެ މަނިކުފާނު ވިދާޅުވި ގޮތުގައި 2013 ވަނަ އަހަރުގެ އިންތިހާބު ކާމިޔާބުކުރައްވައި، ވެރިކަން ހިންގުމާ ހަވާލުވެ ވަޑައިގެންނެވި އިރު ދައުލަތް ފުނޑުފުނޑުވެ، މުޖުތަމައު އޮތީ ބައިބައިވެފަ އެވެ. އެ ހާލަތު ރައީސް ސިފަކުރެއްވީ ދާހިލީ ހަނގުރާމައެއް ފަށަން ތައްޔާރަށް އޮތް ގޮތަށެވެ.
ދައުލަތުގެ އިސްވެރިންނާއި ގިނަ ބަޔަކު ބައިވެރިވި އެ ޖަލްސާގައި ވާހަކަފުޅު ދައްކަވަމުން ރައީސް ޔާމީން ވިދާޅުވީ ދުނިޔޭގެ މައިދާނުގައި ރާއްޖެ މިހާރު ކުރާ ދަތުރުގައި އެކި ފިކުރުތަކާ ބައްދަލުވާނެ ކަން ދަންނަން ޖެހޭ ކަމަށެވެ. އޭގެ ތެރޭގައި އަރަބި އިސްލާމީ ފިކުރާއި ހުޅަނގުގެ މިނިވަން ފިކުރުތަކާއި ދުނިޔޭގެ އަދި ސަރަހައްދީ ބާރުވެރިކަމަށް ބިނާވެފައިވާ ފިކުރުތައް ވެސް ހުންނާނެ ކަމަށާއި އެކަމަކު ކޮންމެ ކަމެއްގައި ވެސް ފަހު ގޮތް ނިންމަން ޖެހޭނީ ދިވެހިން އަމިއްލައަށް ކަމަށް ވިދާޅުވި އެވެ.
އަދި ދިވެހިންނަކީ ބަޔަކު ފުރުސަތު ދިނީމައި ބަސް ބުނާ ބައެއްގެ ބަދަލުގައި، އަމިއްލަ ހައިސިއްޔަތުން ދިވެހިންގެ ބަސް އެހެން މީހުން ވެސް ހޯދުމަށް ދަތުރު ކުރާ ބަޔަކަށް ވާން ޖެހޭ ކަމަށް ރައީސް ވިދާޅުވި އެވެ.
"ރާއްޖޭން މި ފަދަ ކަންކަމުގައި އަމަލު ކުރަން ޖެހޭނީ ރާއްޖެއަށް އެންމެ ފައިދާ ހުންނާނެ ގޮތަށް. އެއްވެސް ހާލެއްގައި ފޮރުވިފައި ތިބެގެން، ދިވެހިންގެ މިނިވަންކަމަށް އެއްވެސް ގެއްލުމެއް ދީފާނެ ކަމަށް ހޭލާ ތިބެން ޖެހޭ. ގައުމުގެ މިނިވަންކަން ބިނާވެފައިވަނީ ދައުލަތުގަިއ ހުރި ފަންވަރެއްގެ މައްޗަށް. މުއައްސަސާތަކުގެ ހަރުދަނާކަމުގެ މައްޗަށް،" ރައީސް ޔާމީން ވިދާޅުވި އެވެ.
ރާއްޖޭގެ ހާރިޖީ ސިޔާސަތާއި ވިޔަފާރީގެ ގުޅުންތަކުގައި އާ ބާބެއް ފަށާފައިވާކަން ފާހަގަ ކުރައްވައި ރައީސް ވިދާޅުވީ މިއީ ކުރީގެ ގުޅުންތައް ނައްތާލުމަށް ފަހު ގާއިމުކުރި ގުޅުންތަކެއް ނޫން ކަމަށެވެ. އަދި ހާރިޖީ ސިޔާސަތުތަކާއި ދާހިލީ ސިޔާސަތުތައް ބަދަލުކުރުމަށް އުފެއްދި ގުޅުންތަކެއް ވެސް ނޫން ކަމަށާއި މިއީ ދުނިޔޭގެ ތަރައްގީ އާއި ތަހުޒީބުގައި ދިވެހިންގެ ފައިތިލަ ސާބިތުކޮށް، "ހަމަ އިސްކޮޅަށް ދެމިލުމަށް" ގާއިމު ކުރާ ގުޅުންތަކެއް ކަމަށް ވެސް އެ މަނިކުފާނު ވިދާޅުވި އެވެ.
