ޗައިނާ ސަރުކާރުން ރާއްޖެ އަށް 35 ޖަނަރޭޓަރު މި ރޭ ހަދިޔާކޮށްފި އެވެ.
ޖަނަރޭޓަރުތައް ހަދިޔާކޮށްފައިވަނީ އެކަމަށްޓަކައި ޖުމްހޫރީ މައިދާނުގައި ބޭއްވި ހާއްސަ ހަފުލާގަ އެވެ.
ހަވާއެރުވުމާއެކު ބޭއްވި ހަފުލާގައި ވާހަކަދައްކަަވަމުން އެންވަޔަރްމަންޓް މިނިސްޓަރު ތޯރިގު އިބްރާހިމް ވިދާޅުވީ ޗައިނާ އިން ދިން ޖަނަރޭޓަރުތައް ފޮނުވަން ނިންމާފައިވަނީ އެކި ރަށްރަށަށް ކަމަށެވެ. އެ ޖަނަރޭޓަރުތައް ލިބުމުން، ރަށްރަށުގައި ފެނަކަ އިން ދެމުން އަންނަ ކަރަންޓުގެ ހިދުމަތް މިހާރަށް ވުރެ ރަނގަޅުވާނެ ކަމަށް އޭނާ ވިދާޅުވި އެވެ.
އެ ޖަނަރޭޓަރުތަކަކީ، މީހުން ދިރިއުޅޭ ހުރިހާ ރަށަކަށް 24 ގަޑިއިރުގެ ކަރަންޓު ފޯރުކޮށްދިނުމަށް ކުރަމުން އަންނަ މަސައްކަތްތަކަށް ލިބުނު ބޮޑު އެހީއެއް ކަން ވެސް މިނިސްޓަރު ފާހަގަކުރެއްވި އެވެ.
އޭނާ ވިދާޅުވީ ކަރަންޓު ފޯރުކޮށްދިނުމަށް މީގެ ކުރީ ސަރުކާރުން ޔުޓިލިޓީ ކުންފުންޏެއް އުފެއްދި ކަމަށެވެ. ނަމަވެސް އެ ކުންފުނި އުފައްދައިގެން މަސައްކަތްތައް ދިޔައީ ރަނގަޅަށް ނޫން ކަމަށް އޭނާ ވިދާޅުވި އެވެ.
މިނިސްޓަރު ވިދާޅުވީ މީގެ ކުރިން ސޯލާ ޕެނަލްތައް ބެހެއްޓިފައިވަނީ ވަރަށް މަދު ތަންތަނުގައި ކަމަށެވެ. ނަމަވެސް ފާއިތުވި ފަސް އަހަރުގެ ތެރޭގައި ސޯލާ ޕެނަލް ބެހެއްޓި ތަންތަން އިތުރުވެފައިވާ ކަމަށް ވިދާޅުވި އެވެ.
ރަށްރަށުގައި ޒަމާނީ ފެންވަރުގެ އިތުރު އިންޖީނުގެތައް އަޅައި، ކަރަންޓުގެ ހިދުމަތް އިތުރަށް ރަނގަޅުކުރާނެ ކަމަށް ވެސް މިނިސްޓަރު ވަނީ ވިދާޅުވެފަ އެވެ.