ތިޖޫރިއެއް ވަގަށް ނެގި ކަމުގެ ތުހުމަތުގައި ދެ މީހަކު ހައްޔަރުކޮށްފި

ގއ. ކޮލަމާފުށީ ގެއެއްގެ ތިޖޫރި ވަގަށް ނެގި ކަމުގެ ތުހުމަތުގައި ދެ މީހަކު ހައްޔަރު ކޮށްފި އެވެ.


ފުލުހުން ބުނީ، އެ މައްސަލައިގައި ހައްޔަރުކުރީ އުމުރުން 28 އަހަރާއި 32 އަހަރުގެ ދެ ފިރިހެނުން ކަމަށެވެ. އެ ދެ މީހުން ވަގަށް ނެގި ކަމަށް ތުހުމަތު ކުރެވޭ ތިޖޫރި ހަލާކުކޮށްލުމަށް ފަހު، ވަލުތެރެއަށް އެއްލާލާފައި އޮއްވައި ފުލުހުން ވަނީ ހޯދައިފަ އެވެ.

ފުލުހުން ބުނިގޮތުގައި ތިޖޫރިގައި ހުރި ފައިސާ ހޯދަމުން ދަނިކޮށް، އެ ރަށުގެ ސަރަހައްދެއްގައި ވަޅުލާފައި ހުރި 11،000 ރުފިޔާ ވަނީ ފެނިފަ އެވެ. އަދި މައްސަލައިގައި ހައްޔަރުކުރި އެކެއްގެ އަތުން ވެސް 1،000 ރުފިޔާ ފެނިފައިވާ ކަމަށް ފުލުހުން ބުންޏެވެ.

ތިޖޫރި ވަގަށް ނެގީ ކިހާ އަދަދެއްގެ ފައިސާއާ އެކު ކަމެއް ފުލުހުން ނުބުނެ އެވެ. އެ މައްސަލަ އަންނަނީ ތަހުގީގު ކުރަމުންނެވެ.