މި ސަރުކާރުގެ ވައުދުތަކުގެ ތެރެއިން 30،000 އާއިލާ އަށް ބޯހިޔާވަހިކަން ނުވަތަ ގެ އަޅައިދޭނެ ކަން އިއުލާން ކުރިޔަސް އެއީ ހަގީގަތެއް ނެތް ވާހަކައެއް ކަމަށް ކުރީގެ ރައީސް އަދި އިދިކޮޅު ލީޑަރު އަބްދުﷲ ޔާމީން ކ. ދިއްފުށީގައި މިއަދު ވިދާޅުވެއްޖެ އެވެ.
ސަރުކާރު ޖަވާބުދާރީ ކުރުވުމަށާއި އިދިކޮޅު ޕީޕީއެމަށް މެމްބަރުން އިތުރުކުރަން އެ ޕާޓީން ސިލްސިލާކޮށް ކުރާ ދަތުރުތަކުގައި ދިއްފުއްޓަށް ވަޑައިގެން ޔާމީން ވިދާޅުވީ އިންތިޚާބެއް ކައިރިވުމުން ނުވަތަ ސަރުކާރަށް އުނދަގޫތަކެއް ކުރިމަތިވުމުން ކޮންމެވެސް އާ ވާހަކަތަކެއް އިއުލާން ކުރާ ކަމަށެވެ. އެފަދަ ވާހަކަތަކެއް ރޭ އިވިވަޑައިގަތް ކަމަށް ވިދާޅުވެ އިޝާރާތް ކުރެއްވީ ރައީސް އިބްރާހިމް މުހައްމަދު ސޯލިހް އިފްތިތާހްކޮށްދެއްވި މި ސަރުކާރުގެ ފަސް އަހަރުގެ އެކްޝަން ޕްލޭނަށެވެ.
ވަރުގަދަ ވާހަކަތަކެއް އިއުލާން ކުރަމުން ދިޔަ ނަމަވެސް އެއިން އެއްވެސް ކަމަކީ، ޔާމީން ވިދާޅުވި ގޮތުގައި، ތަންފީޒު ވަމުން އަންނަ ކަންކަމެއް ނޫނެވެ.
އެމަނިކުފާނު ވިދާޅުވީ ބޯހިޔާވަހިކަމުގެ ވައުދު ފުއްދަން 30،000 ގެ ބޭނުންވާ ކަމަށް ހިސާބު ޖަހައި ފަސް އަހަރުގެ ތެރޭގައި 20،000 ގެ އަޅާނެ ކަމަށް މި ސަރުކާރުން ބުންޏަސް އެއީ ހަގީގަތެއް ނޫން ކަމަށެވެ. އެ ވާހަކަ ގަބޫލުކުރުމުގެ ކުރިން ރައްޔިތުން ވިސްނާލަން ޖެހިފައި އޮތީ ދައުލަތުގެ ދަރަނި އޮތް މިންވަރާއި ދައުލަތަށް ލިބޭ އާމްދަނީ ދެކޮޅު ނުޖެއްސޭ މިންވަރުގެ އިތުރުން ސަރުކާރުގެ އޮފީސްތަކުގެ ބަޖެޓް ހުސްވެ މެދުވެރިވެފައިވާ ހާލަތަށް ކަަމަށް ވިދާޅުވި އެވެ.
ޔާމީން ވިދާޅުވި ގޮތުގައި މިއަދުގެ ހަގީގަތަކީ ސަރުކާރުގައި މިހާރު މުސާރަ ދޭނެ ލާރިއެއް ވެސް ނެތުމެވެ. އެ ފައިސާ އިތުރަށް ހޯދޭނެ ގޮތްތަކެއް ވެސް ސަރުކާރަށް ނުފެންނަ ކަމަށް ވިދާޅުވެ ފާޑުވިދާޅުވި އެވެ.
"މި އަހަރުގެ ތިން މަސް އަދި ނުނިމި އެބައޮތް، ރައީސުލް ޖުމްހޫރިއްޔާ އޮފީހުގެ ބަޖެޓް ހުސްވެއްޖެ. އެ ބަޖެޓަށް އިތުރަށް ފައިސާ ބޭނުންވެއްޖެ. މިހާ ހާލުގައި ރާއްޖެ އޮތް އިރު ތިޔަބޭފުޅުން ވިސްނަވާ 30،000 އާއިލާ އަށް ބޭނުންވާ ފްލެޓް އުފައްދާނީ ކިހިނެއްތޯ؟" ޔާމީން ސުވާލު އުފެއްދެވި އެވެ.
ރައްޔިތުންނަށް ބޯހިޔާވަހިކަމުގެ އެންމެ ބޮޑު ލުޔެއް ހޯދައިދީފައި ވަނީ އެމަނިކުފާނުގެ ވެރިކަމުގައި ކަން ފާހަގަކުރެއްވި އެވެ.
ރައީސް ޔާމީން ވިދާޅުވި ގޮތުގައި ރާއްޖޭގެ އެއްވެސް ސަރަހައްދަކުން ތަރައްގީގެ އާ މަޝްރޫއެއް ނުފެނެ އެވެ. ސިއްހީ ދާއިރާ އާއި ތައުލީމީ ދާއިރާ ކުރިއަރާނެ ކަމަށް ބެލެވޭ ފަދަ މަސައްކަތްތަކެއް މިހާތަނަށް ނުފަށާ ކަމަށް ވިދާޅުވި އެވެ.
މި ސަރުކާރުގެ ޚާރިޖީ ސިޔާސަތުގެ މިސްރާބާ ދޭތެރޭ ކަންބޮޑުވުންފާޅުކުރައްވައި އެ ސިޔާސަތު ކާމިޔާބުވަނީ ވަޒީރު "ދެކޮޅަށް ދެކޮޅަށް އުދުހުނީމަ" އެކަނި ނޫން ކަމަށް ވިދާޅުވެ އަބްދުﷲ ޝާހިދަށް ވެސް ބަހުގެ ހަމަލާއެއް ޔާމީން އަމާޒު ކުރެއްވި އެވެ. އެ ސިޔާސަތު ކާމިޔާބު ކަމަށް ވާނީ ރައްޔިތުންނަށް މަންފާއެއް ލިބޭތަން ފެނުމުން ކަމަށް ޔާމީން ވިދާޅުވި އެވެ.
ޚާރިޖީ ސިޔާސަތު ކާމިޔާބު ކަމަށް ކަށަވަރު ވާނީ އިސްލާމްދީނާއި ރާއްޖޭގެ މިނިވަންކަމާއި އިސްތިގްލާލް ރައްކާތެރިކޮށް ހިމާޔަތްކޮށް ގައުތަކުން ފޯރުވާ ނުފޫޒުގައި ނުޖެހި ތިބެވޭނެ ކަމުގެ ޔަގީންކަން ލިބިގެން ކަމަށް ވެސް ވިދާޅުވި އެވެ.
"އެއްގޮތަކަށް ވެސް ކުރެވޭ ދަތުރުގެ އަދަދަކުން ރާއްޖެ އިން ބޭރުގައި ހޭދަކުރާ ވަގުތުގެ އަދަދަކުން ނޫނިއްޔާ ރައީސް ރާއްޖެ އިން ބޭރަށް ކުރައްވާ ދަތުރުގެ އަދަދަކުން މި ކަންކަން ކަށަވަރުވެގެނެއް ނުދޭ. މި ދަތުރުތަކަކީ ޝައްކެއް ވެސް ނެތް ގޮތުގައި ކުރަން ޖެހޭ ދަތުރުތަކެއް. އެހެން ނަމަވެސް ނަތީޖާ އަޅުގަނޑުމެންނަށް ފެންނަން ވާނެ،" ރައީސް ވިދާޅުވި އެވެ.
މާލޭގައި އެންމެ ފަހުން ކުރިމަތިވި އަލިފާނުގެ ދެ ހާދިސާ އަކީ ހިތާމަވެރި ކަމެއް ކަން ފާހަގަކުރައްވައި ޔާމީން ވިދާޅުވީ ހާލުގައި ޖެހުނު މީހުންނަށް އެހީވާން މި ސަރުކާރުން ކަންތައްތަކެއް ކުރާ ކަން ގަބޫލުފުޅު ކުރައްވާ ކަމަށެވެ. އެކަމަކު މި ސަރުކާރުގެ ޚާރިޖީ ސިޔާސަތު ކާމިޔާބު ނަމަ އެ ހާދިސާގައި ލިބުނު ގެއްލުންތަކާ ގުޅިގެން ބޭރުގެ ގައުމުތަކުން އެހީ އޮހެން ވާނެ ކަމަށް ވިދާޅުވި އެވެ.
"ސުނާމީ ރާއްޖެ އަށް ދިމާވީމާ ރާއްޖެ އަށް އެހީ އޮހުނު. ފެނުގެ ކާރިސާ މާލެ އަށް ދިމާވީމާ އަޅުގަނޑުމެންނަށް ބޭރުގެ އެހީ އޮހުނު. އެހެންވީމާ މިހެން ހުރި ކަންތައްތައް މީ،" ޔާމީން ވިދާޅުވި އެވެ.
ދަރަނި އެތައް ގުނައެއް ބޮޑުވެ، ރާއްޖޭގެ ހާލަތު ވަރަށް ބޮޑަށް ދަށަށް ގޮސްފައިވާ ކަމަށް ވިދާޅުވެ މިސާލެއްގެ ގޮތުން ދެއްކެވީ ރާއްޖޭގެ އިމްޕޯޓާއި އެކްސްޕޯޓް ދަށްވެފައި އޮތުމެވެ. އެންމެ ބާރަށް ކުރިއަރާ ކޮންސްޓްރަކްޝަން ދާއިރާ ގާތްގަނޑަކަށް ހުއްޓިފައިވާ ކަމަށް ވެސް ވިދާޅުވި އެވެ.
އެކަމަކު ރިޔާސީ ކެމްޕޭންގައި ކުރި ދަތުރުތަކުގައި ރައްޔިތުންނަށް ވިސްނައިދިނީ އެންމެ ހެޔޮވެރިކަމަކަށް ވާނީ ރައީސް އިބްރާހިމް މުހައްމަދު ސޯލިހްގެ ވެރިކަން ކަން ކަމަށާއި އެއީ ރައްޔިތުންނަށް ވަރަށް ބޮޑު އޮޅުވާލުމެއް ކަމަށް ޔާމީން ވިދާޅުވި އެވެ.
