ޑެލިވަރީ ކޮތަޅުތަކާ ހަވާލުވުމުގައި ސަމާލުވާން އެދިއްޖެ

މާލެ ލޮކްޑައުންގެ ހާލަތުގައި، ދިރިއުޅުމުގެ ޒަރޫރީ ބޭނުންތަކަށް ބޭނުންވާ ސާމާނު ޑެލިވަރީކުރި ނަމަވެސް ކޮރޯނާވައިރަސް ފެތުރުން ހުއްޓުވުމުގެ މުހިއްމު ފިޔަވަޅެއްގެ ގޮތުން، ސާމާނާ ހަވާލުވުމުގައި ވެސް ވަރަށް ބޮޑަށް ސަމާލުކަންދޭން ޓެކްނިކަލް އެޑްވައިޒަރީ ގްރޫޕް (ޓެގް) އިން މިރޭ އެދިއްޖެ އެވެ.

ރާއްޖޭގައި ކޮވިޑް-19 އިން ރައްކާތެރިވާން އަޅާ ފިޔަވަޅުތަކުގެ ލަފާ ކަމާބެހޭ އިދާރާތަކަށް ދޭ ޓެގުގައި ހިމެނިވަޑައިގަންނަވާ ޕީޑިއޮޓްރިކް އިންފެކްޝަސް އެކްސްޕާޓް، ޑރ. ނަޒްލާ މުސްތަފާގެ މިރޭގެ މެސެޖް ޚާއްސަ ކުރެއްވީ ޑެލިވަރީގެ ޚިދުމަތުގައި އެންމެންގެ ސަލާމަތަށް އަމަލު ކުރެވިދާނެ ގޮތްތަކަކާ ގުޅޭ ގޮތުންނެވެ.

މާލޭގައި އިއްޔެ 16 ބިދޭސީއަކު އަދި މިއަދު ވެސް ގިނަ ބަޔަކު ބައްޔަށް ޕޮޒިޓިވްވި އިރު މީގެ ތެރޭގައި، ގޭގެ އަށް ޑެލިވަރީ ކޮށްދޭ މީހުން ހިމެނެ އެވެ. މި ކޭސްތަކުން އެނގެނީ މާލެ ލޮކްޑައުންކޮށް، ގިނަ ބަޔަކު ގޭގައި ތިއްބަސް ގިނަ ގެތަކަށް ޑެލިވަރީކުރާ އިރު އެކަކުގެ ގައިިން އެނަކުގެ ގަޔަށް ބަލި ޖެހި އާއްމުންގެ ތެރޭގައި ވައިރަސް ފެތުރުމުގެ ފުރުސަތު ބޮޑު ކަމެވެ. ވޭތުވެދިޔަ ދެ ދުވަހު ޕޮޒިޓިވްވި ޑެލިވަރީގެ ޚިދުމަތް ދިން އެންމެން ދިޔަ ގިނަ އިމާރާތްތައް ވެސް މިހާރު ވަނީ މޮނިޓަރިން އަށް ލައިފަ އެވެ.

ރައްކާތެރިވުމުގެ އެންމެ މުހިއްމު ފިޔަވަޅެއްގެ ގޮތުގައި، ނަޒްލާ އެދިވަޑައިގަތީ ޑެލިވަރީ ކުރާއިރު އިރު ވެސް ފިޒިކަލް ޑިސްޓެންސް ނުވަތަ ދެ މީހުންގެ ދޭތެރޭގައި އެކަށީގެންވާ ދުރުމިނެއް ބެހެއްޓުމަށެވެ.

"ބޮޑަށް ރަނގަޅީ އޮންލައިން ޓްރާންސެކްޝަން ހެދިއްޖިއްޔާ. ފައިސާ ދައްކާއިރު ވެސް ގޮނޑިމަތީގައި ބެހެއްޓުން އެންމެ ރަނގަޅު ގޮތަކީ،" މިރޭގެ މީޑިއާ ބްރީފިންގައި ނަޒްލާ ވިދާޅުވި އެވެ.

ޑެލިވަރީކުރި ކޮތަޅުތަކުގައި ހުންނަ ސާމާނުގައި ވެސް ރައްކާތެރިކަމުގެ ފިޔަވަޅުތައް އަޅައިގެން އަތްލައި، ކޮތަޅުތައް އުކާލަން އެދިވަޑައިގަތެވެ. އެއާއެކު މޭވާ އާއި ތަރުކާރީ އެ ނޫން ވެސް ޕެކެޓްގައި ބަންދުކޮށްފައި ހުންނަ ކަހަލަ ދޮވެވޭ ކަހަލަ އެއްވެސް ބާވަތެއް ނަމަ، ސައިބޯނިލައިގެން ދޮވުމަށް އިލްތިމާސް ކުރެއްވި އެވެ.

"މި ވައިރަހަކީ ހޫނުން ނެތިގެންދާ އެއްޗެއް، އެހެންވީމަ ރަނގަޅަށް ކައްކާފައި ހުންނަ އެއްޗެހީގައި ރަނގަޅަށް ވައިރަސް ފިލާނެ،" ނަޒްލާ ވިދާޅުވި އެވެ.

ގޭގައި ގެންގުޅޭ، އާއްމުކޮށް ބޭނުންކުރާ ކަޓިން ބޯޑު ފަދަ ސާމާނުތައް ވެސް ސައިބޯނިލައިގެން ދޮވެ ސާފުކުރުމަކީ ރައްކާތެރިކަމަށް ކުރެވޭ މުހިއްމު ކަންކަން ކަން ނަޒްލާ ހަނދާން ކޮށްދެއްވި އެވެ.

މާލެ އިން މިހާތަނަށް ޕޮޒިޓިވްވެފައިވާ ގިނަ މީހުންނަކީ ނަޒްލާ ވިދާޅުވި ގޮތުގައި، ގޭތެރޭގައި ބަންދު ކޮޓަރިއެއްގައި އެއްކޮށް އުޅޭ މީހުންނެވެ. އެހެންވެ، އޭސީ ޖައްސައި އަބަދު ކޮޓަރީގެ ދޮރު ލައްޕާފައި ބެހެއްޓުމުގެ ބަދަލުގައި، ކިޔައިދެއްވީ ގޭގައި ކަރަންޓީންވެގެން ހުންނަ އިރު ވެސް އަމަލުކުރަން މުހިއްމު ގޮތްތަކެކެވެ. ކޮޓަރީގެ ދޮރު ހުޅުވައި ރަނގަޅަށް ވައިދައުރުވާ ގޮތަށް ބެހެއްޓުމަކީ ތަނުގެ ތެރޭގައި ވައިރަސް ހުންނަ މިންވަރު މަދުވެ ރައްކާތެރިކަން އިތުރުވާނެ ކަމެއް ކަމަށް އޭނާ ވިދާޅުވި އެވެ.

ނަޒްލާ މިރޭ ވެސް ތަކުރާރުކޮށްދެއްވީ އެންމެ މުހިއްމު ފަރުވާއަކީ ގޭގައި މަޑުކޮށް، ސައިބޯނިލައިގެން ގިނަ އިން އަތްދޮވުން ކަމަށެވެ. އޯޑަރުކޮށްގެން ގެއަށް އެއްޗެއް ގެނަޔަސް، އަތް ނުދޮވެ މޫނުގައި އަތް ނުލަން ހަނދާންކޮށްދެއްވި އެވެ.

އޭނާ ވިދާޅުވި ގޮތުގައި ވައިރަސް އަރަނީ އަނގަޔަށް، ނޭފަތަށް ނުވަތަ ލޮލަށް ގޮސްގެން ނުވަތަ ޖެހިގެން ހުރި މީހަކު ކެއްސާއިރު އެ އަންނަ ތިކިތަކުން ކަމަށް ވާތީ މިކަމުގައި ވެސް އެ މީހަކު އަމިއްލަ އަށް ޚާއްސަ ސަމާލުކަން ބަހައްޓަން ޖެހެ އެވެ.

މާލެއިން މިހާތަނަށް 47 މީހަކު ބައްޔަށް ޕޮޒިޓިވްވެފައިވާއިރު މި އެންމެންގެ ޖުމްލަ 468 އަށް ވުރެން ގިނަ ކޮންޓެކްޓުން މިހާތަނަށް ހޯދިފައިވެ އެވެ.