މާލޭގައި ތޮއްޖެހިގެން ބިދޭސީން ދިރިއުޅޭ 18 ތަނެއް ފުލުހުން ބަހައްޓަން ފަށައިފި އެވެ.
ނޭޝަނަލް އެމަޖެންސީ އޮޕަރޭޝަން ސެންޓަރު (އެންއީއޯސީ) ގައި ބޭއްވި މީޑިއާ ބްރީފިންގައި، އެސިސްޓެންޓް ކޮމިޝަނާ އޮފް ޕޮލިސް އިސްމާއިލް ނަވީން މިއަދު ވިދާޅުވީ ކޮވިޑް-19 ފެތުރޭ ގޮތަށް ބެލުމަށްފަހު ބިދޭސީން އުޅޭ 18 ތަނެއް ފުލުހުން މޮނީޓަކުރަމުން އަންނަ ކަމަށެވެ. އެ ތަންތަނުގައި ޖުމްލަ 837 ބިދޭސީން ދިރިއުޅޭ ކަމަށް އޭނާ ވިދާޅުވި އެވެ.
ހަލުވިކަމާ އެކު ބަލި ފެތުރޭތީ މާލެ ލޮކްޑައުންކޮށްފައި އޮތުމާއެކު ދިރިއުޅޭ ތަންތަނުން އެ މީހުން ނުކުމެ އުޅޭތޯ ބަލައި ބޭނުންވާ ޒަރޫރީ ބޭނުންތަކުގައި އެހީތެރިކަން އަންނަނީ ފޯރުކޮށްދެމުންނެވެ.
ކޮވިޑް-19 އިން ރައްކާތެރިވާން ސަރުކާރުން އަންނަނީ ގިނަ މަސައްކަތްތަކެއް ކުރަމުންނެވެ. މީގެތެރޭގައި ބިދޭސީންނަށް އަމާޒުކޮށްގެން ވެސް ފިޔަވަޅުތަކެއް އަޅަ އެެވެ. ދިރިއުޅުމުގެ އާދަކާދަ ހުންނަ ގޮތުން ބިދޭސީންގެ މެދުގައި ބަލި ފެތުރުމުގެ ފުރުސަތު ބޮޑު ކަމަށް ބެލެވޭތީ ކަމާބެހޭ އިދާރާތަކުން ވަނީ ހުޅުމާލޭގައި ހުންނަ ފެސިލިޓީއަކަށް އޭގެ ތެރެއިން ބައެއް މީހުން ބަދަލުކޮށްފަ އެވެ.
މާލެއިން، މި މަހުގެ 15 ވަނަ ދުވަހު ކޮވިޑް-19 އަށް ފުރަތަމަ މީހާ ޕޮޒިޓިވްވި ފަހުން އެ ބަލި ޖެހުނު މީހުންގެ އަދަދު މިހާރު ވަނީ 170 އިން މައްޗަށް އަރައިފަ އެވެ. އޭގެ ދިވެހިންގެ އިތުރުން ބަންގްލަދޭޝް އާއި އިންޑިއާ އަދި ސްރީލަންކާގެ މީހުން ހިމެނެ އެވެ.
ހެލްތު ޕްރޮޓެކްޝަން އެޖެންސީ (އެޗްޕީއޭ) އިން ބުނިގޮތުގައި، މާލެއިން މިހާތަނަށް ފެނުނު ކޭސްތަކުގެ ކޮންޓެކްޓްވި މީހުންގެ އަދަދު ވަރަށް ގިނަ އެވެ. އެގޮތުން މިހާތަނަށް 2،000 އަށް ވުރެ ގިނަ ޑައިރެކްޓް ކޮންޓެކްޓް ވަނީ ހޯދިފަ އެވެ.
