އެތެރެހަށީގައި ފޮރުވައިގެން ރާއްޖެއަށް މަސްތުވާތަކެތި އެތެރެކުރަން އުޅުނު ފަސް މީހަކު ކަސްޓަމްސް އިން އަތުލައިގެންފި އެވެ.
ކަސްޓަމްސް އިން ބުނީ މީގެ ތެރެއިން ހަތަރު މީހުންނަކީ ޕާކިސްތާނު މީހުން ކަމަށެވެ. އެއީ އުމުރުން 22 އަހަރުގެ މީހަކާއި 30 އަހަރުގެ މީހަކާއި 34 އަހަރުގެ މީހަކާއި 41 އަހަރުގެ މީހެކެވެ. މި މީހުން ރާއްޖެ އައިސްފައިވަނީ މިދިޔަ މަހުގެ 11 ވަނަ ދުވަހު އެވެ.
އެ މީހުންނަށް ކަސްޓަމްސް އޮފިސަރުންނަށް ޝައްކު ކުރެވިގެން އިތުރަށް ސުވާލުކޮށް ބެލި ބެލުމުން ހަތަރު މީހުން ވެސް އެތެރެހަށީގައި މަސްތުވާތަކެތި ފޮރުވާފައި ހުރިކަން އެނގުނެވެ.
ކަސްޓަމްސް އިން ބުނީ ފުލުހުންނާ ގުޅިގެން އެ މީހުން ހޮސްޕިޓަލަށް ގެންގޮސް ބެލި ބެލުމުން އެތެރެހަށިން މަސްތުވާތަކެތި ފެނިފައިވާ ކަމަށެވެ. ހެރޮއިން އަޅާފައިވާ 81 ބުލެޓު އެ މީހުންގެ އެތެރެހަށިން ފެނިފައިވާ ކަމަށާއި އެތަކެތީގެ ބަރުދަނުގައި ގާތްގަނޑަކަށް 791 ގްރާމް ހުރި ކަމަށް ވެސް ކަސްޓަމްސް އިން ބުންޏެވެ.
އެ ތަކެތީގެ މަގުމަތީ އަގު 6،32،800ރ އަށް އަރާނެ ކަމަށް ވެސް ކަސްޓަމްސް އިން ބުންޏެވެ.
ކަސްޓަމްސް އިން ބުނީ އެތެރެހަށީގައި ފޮރުވައިގެން މަސްތުވާތަކެޔި ގެނައި ފަސް ވަނަ މީހާ އައީ މިދިޔަ މަހު 29 ގައި އައި 27 އަހަރުގެ ކެންޔާ އަންހެނެއް ކަމަށެވެ. އޭނާގެ ހަށިގަނޑުން، ޑްރަގްސް ހުރި 52 ބުލެޓު ވަނީ ފެނިފަ އެވެ.
ކަސްޓަމްސް އިން ބުނީ މި އެންމެން ވެސް މިހާރު ވަނީ ތަހުގީގަށް ފުލުހުންނާ ހަވާލުކޮށްފައި ކަމަށެވެ.