ކުރީގެ ރައީސް އަބްދުﷲ ޔާމީންގެ ސަރުކާރުގައި ހިންގި އެމްއެމްޕީއާރުސީގެ ބޮޑު ޚިޔާނާތުގެ ތަހުގީގު ވަކި ގޮތަކަށް އަނބުރައިލަން، އެންޓި ކޮރަޕްޝަން ކޮމިޝަން (އޭސީސީ)ގެ އިންވެސްޓިގޭޓަރެއްގެ ގޮތުގައި ހުންނަވައިގެން 100،000 ޑޮލަރުގެ ރިޝްވަތު ނެގި ކަމުގެ ދައުވާ އުފުލާފައިވާ އައިލެންޑް އޭވިއޭޝަން ސާވިސް (އައިއޭއެސް)ގެ ބޯޑު މެމްބަރު އަބްދުﷲ އާޒިމް އިސްތިއުފާ ދެއްވައިފި އެވެ.
މި ސަރުކާރުގައި އައިއޭއެސްގެ ބޯޑު މެމްބަރު ކަމަށް އައްޔަން ކުރި އާޒިމް އިސްތިއުފާ ދެއްވި ކަން އެ ކުންފުންޏާއި ފިނޭންސް މިނިސްޓްރީން މިއަދު ކަށަވަރު ކޮށްދިނެވެ.
"އާޒިމްގެ އިސްތިއުފާގެ ސިޓީ ޕީސީބީ އަށް ލިބިފައި އޮތީ،" ފިނޭންސް މިނިސްޓްރީގެ މީޑިއާ އޮފިޝަލް ވިދާޅުވި އެވެ.
ޚިޔާނާތުގެ ދައުވާކުރުމުން އާޒިމް އިސްތިއުފާ ދެއްވިއިރު، އެސްއޯއެފުން ފައިސާ ޖަމާވި މީހުންގެ ލިސްޓެއް އޭސީސީން ކުރިން އާއްމުކުރިއިރު އޭނާގެ ނަން އޮތުމުން ސަސްޕެންޑް ވެސް ކުރި އެވެ. އެކަމަކު ފަހުން ސަސްޕެންޝަން އުވާލީ އެވެ.
އެސްއޯއެފުން ފައިސާ ޖަމާވި ލިސްޓަށް އޭނާގެ ނަން އެރީ އާޒިމް އޭރު ވިދާޅުވެފައިވާ ގޮތުގައި އޭނާ ހިންގެވި ޑޮލަރުގެ މުއާމަލާތަކާ ގުޅިގެންނެވެ. އެކަމަކު އޭސީސީ އާއި ފުލުހުންނާއި އެސެޓް ރިކަވަރީ ކޮމިޝަން ގުޅިގެން ހިންގާ ތަހުގީގަށް ފަހު ޕްރޮސިކިއުޓަ ޖެނެރަލް ވަނީ އާޒިމްގެ މައްޗަށް ހަތަރު ދައުވާއެއް އުފުލައިފަ އެވެ. އެއީ ރިޝްވަތު ހިފުމުގެ ދެ ދައުވާއަކާއި މަނީ ލޯންޑްރިންގެ ދެ ދައުވާއެކެވެ.
ޕީޖީ އޮފީހުން ބުނެފައިވާ ގޮތުގައި، ދެ ފަހަރެއްގެ މަތިން 100،000 ޑޮލަރު ރިޝްވަތުގެ ގޮތުގައި އާޒިމް ނެގީ އޭސީސީގައި އޭރު ތަހުގީގު ކުރަމުން ދިޔަ އެމްއެމްޕީއާރުސީގެ އިސްކޮށް އުޅުއްވި ކަމަށް ތުހުމަތު ކުރެވޭ ކުރީގެ ނައިބު ރައީސް އަހްމަދު އަދީބާއި އެމްއެމްޕީއާރުސީގެ އޭރުގެ މެނޭޖިން ޑިރެކްޓަރު އަބްދުﷲ ޒިޔަތާއި ކުރީގެ ސަރުކާރުގެ އިސް ވެރިންގެ މައްސަލަތައް ވަކި ގޮތަކަށް އަނބުރައިލުމަށެވެ. މީގެ އިތުރުން ތަހުގީގާ ގުޅޭ މައުލޫމާތު ހިއްސާ ކުރުމަށާއި ކޮމިޝަންގެ ސިއްރު މައުލޫމާތު ދިނުން ރިޝްވަތުގެ ތެރޭގައި ހިމެނޭ ކަމަށް އޭނާގެ މައްޗަށް ތުހުމަތު ކުރެ އެވެ.
ދިގުލައިގެން ގޮސްފައިވާ އެމްއެމްޕީއާރުސީގެ ޚިޔާނާތުގެ ތަހުގީގަށް ފަހު އާޒިމްގެ އިތުރުން ވެސް ބައެއް މީހުންގެ މައްޗަށް މިހާރު ވަނީ ދައުވާ އުފުލައިފަ އެވެ. އޭގެތެރޭގައި، ރައްޔިތުންގެ މަޖިލީހުގެ ވިލިމާލޭ ދާއިރާގެ ކުރީގެ މެމްބަރު އަހްމަދު ނިހާން ހިމެނިވަޑައިގަންނަވަ އެވެ.