މިދިޔަ ހޮނިހިރު ދުވަހު ބޭއްވި ލޯކަލް ކައުންސިލްތަކުގެ އިންތިހާބުގެ އެމްޑީޕީގެ ކެންޕެއިން ބައްދަލުވުމެއްގައި، މަރުގެ އަދަބު ދިނުމާ ގުޅޭ ގޮތުން އުނގޫފާރު ދާއިރާގެ މެމްބަރު މުހައްމަދު ވަހީދު ދެއްކެވި ވާހަކަތާއެކު، އޭނާގެ ފުރާނަ އަށް ގެއްލުން ދިނުމަށް ގޮވަމުންދާ ކަމަށް ބުނެ، އެ ޕާޓީން އެކަން ކުށްވެރިކޮށްފި އެވެ.
އެމްޑީޕީގެ ބައެއް އިސްބޭފުޅުން ވެސް ބައިވެރިވެވަޑައިގެންނެވި އެ ބައްދަލުވުމުގައި ވަހީދު ވަނީ ކުރީގެ ރައީސް އަބްދުﷲ ޔާމީންގެ ވެރިކަމުގައި މަރަށް މަރުހިފުމުގެ ގޮތުން ލީތަލް އިންޖެކްޝަން ބޭނުންކުރަން ކެބިނެޓްގައި މަޝްވަރާ ކޮށްފައިވާ ކަމަށް ވިދާޅުވެ، އެއީ "ސިކު" ބައެއްގެ ގޮތުގައި ސިފަ ކުރައްވައިފަ އެވެ.
"މީހުން މަރަން ވެގެން ގިސާސް ހިފާނަމޭ ކިޔައިގެން ކެބިނެޓަށް، މިއޮތް ގަރުނުގައި ކެބިނެޓަށް، އެ އިންޖެކްޝަން ޖަހާލީމާ މަރުވާން ދާއިރު ހަށިގަނޑަށް ވާންވާ ގޮތް ޕްރެޒެންޓޭޝަން ހަދައިގެން ދެއްކި ބައެއް. ސިކު ބައެއްގެ ވާހަކަ މި ދައްކަނީ،" އާންމުވެފައިވާ ވީޑިއޯގައި ވަހީދު، ވިދާޅުވެ އެވެ.
އެ ވީޑިއޯ އާންމުވެ، ދީނީ އިލްމުވެރިންނާއި ބައެއް އާންމުން ވެސް ދަނީ ވަރަށް ބޮޑަށް ވަހީދަށް ފާޑުކިޔަމުންނެވެ.
އެހެންވެ، އޭނާ ދިފާއުކޮށް، އެމްޑީޕީގެ ޕާލަމެންޓްރީ ގްރޫޕުން ނެރުނު ބަޔާނެއްގައި ބުނީ ވަހީދު، ކެމްޕެއިން ތަގްރީރެއްގައި ދެއްކެވި ވާހަކައަކާ ގުޅުވައިގެން އޭނާގެ ފުރާނަ ނުރައްކަލަށް ހުށަހެޅުމުގެ ނިޔަތުގައި ބައެއް ފަރާތްތަކުން ހިންގަމުންދާ އަމަލުތައް ކުށްވެރިކުރާ ކަމަށެވެ. އެ މައްސަލަ ތަހުގީގުކޮށް ފިޔަވަޅު އެޅުމަށް ވެސް ކަމާބެހޭ މުއައްސަސާތަކަށް އެމްޑީޕީން ގޮވައިލި އެވެ.
މި ސަރުކާރު ހިންގާ ކޯލިޝަންގެ މައި ޕާޓީން ބުނީ، ވަހީދު އެ ބައްދަލުވުމުގައި ފާހަގަކުރެއްވި ނުކުތާ އަމާޒުކުރައްވާފައި ވަނީ ދީނަށް ނުވަތަ ދީނީ ހުކުމަކަށް ނޫން ކަމަށެވެ. އޭނާގެ ވާހަކަ ބިނާކުރެއްވީ އެމްޑީޕީން ބުނިގޮތުގައި، މަރުގެ އަދަބު ދިނުމުގެ ނަމުގައި ޔާމީންގެ ސަރުކާރުގައި "ތިބި ބަޔަކު" ކަންކުރި ގޮތަކަށެވެ.
އެ ވާހަކަ ގަސްދުގައި އޮޅުވާލައިގެން ބައެއް ދީނީ އިލްމުވެރިންނާއި ބައެއް ސިޔާސީ މީހުންނާއި އަދި ބައެއް މީޑިއާތަކުން އެކަން ފިތުނައަކަށް ވާ ގޮތަށް ހެދުމުގެ ސަބަބުން، އޭނާގެ ފުރާނަ އަށް ނުރައްކާކުރުވުމަށް ބައެއް ފަރާތްތަކުން ގޮވާލަމުންދާކަން ކަންބޮޑުވުމާއެކު ފާހަގަކުރަމެވެ."
އުނގޫފާރު ދާއިރާގެ ގޮނޑި ކުރިން ތަމްސީލު ކުރެއްވި، ދީނީ އިލްމުވެރިޔާ، ޑރ. އަފްރާޝީމް އަލީ ވެސް ވަނީ އަވަހާރަކޮށްލައިފަ އެވެ. އޭނާ އަވަހާރަކޮށްލާފައި ވަނީ ދީނުގެ ނަމުގައި ހައްދު ފަހަނައަޅާފައިވާ ބަޔަކު ހިންގަމުންދާ ހަރަކާތްތަކެއްގެ ތެރެއިން ކަމަށް ތަހުގީގަށް ވަނީ ފާހަގަކުރެވިފަ އެވެ.
އެމްޑީޕީން ބުނީ މުރުތައްދުވެ، ދީނުން ބޭރުވެއްޖެ ކަމަށް ބުނެ އަމިއްލަ އަށް ގޮތްތައް ނިންމައިގެން ދީނުގެ ނަމުގައި އެހެން ފަރާތްތަކެއް ވެސް ރާއްޖޭގައި ގަތުލުކޮށްފައިވާ ކަމަށެވެ. މިހެންވެ، ވަހީދު ދެއްކެވި ވާހަކައެއްގެ ހަގީގަތް ގަސްދުގައި އޮޅުވާލައި ފިތުނަ އުފައްދައިގެން އޭނާގެ ފުރާނަ ނުރައްކަލަށް ހުށަހެޅުމުގެ ނިޔަތުގައި އަމަލުކުރާ ފަރާތްތަކުން އެކަން ވަގުތުން ހުއްޓާލުމަށް އެމްޑީޕީން ގޮވައިލަ އެވެ. އެ ކަމުގައި ހުރި ނުރައްކާ ބޮޑުކަމުން، އެ ފަދަ މައްސަލަތައް ވަގުތުން ތަހުގީގުކޮށް ފިޔަވަޅު އެޅުމަށް ދައުލަތުގެ ކަމާބެހޭ މުއައްސަސާތަކަށް އެ ޕާޓީން ގޮވައިލި އެވެ.