ރާއްޖެ އާއި އެމްޑީޕީ އަށް ވެސް އެންމެ ރަނގަޅު ގޮތަކީ އިދިކޮޅު ޕީޕީއެމާއެކު ކޯލިޝަނެއް ހަދައި، ކުރީގެ ރައީސް އަބްދުﷲ ޔާމީންގެ އެހީތެރިކަމަށް އެދުން ކަމަށް ކުރީގެ ރައީސް އަދި އެމްޑީޕީގެ ރައީސް މުހައްމަދު ނަޝީދު މިއަދު ވިދާޅުވެއްޖެ އެވެ.
ރައީސް އިބްރާހިމް މުހައްމަދު ސޯލިހާއެކު އޮތް ސިޔާސީ ގުޅުން ކަނޑައިލިކަން އިއުލާން ކުރެއްވުމަށް ފަހު، ނަޝީދު މި ހަފުތާގައި ވެސް ކުރިން ވިދާޅުވެފައި ވަނީ އެމްޑީޕީ އަށް އާ ކޯލިޝަނެއް ބޭނުންވާ ކަމަށާއި އެއީ "އިންޑިއާ އައުޓް" ނުގޮވާ، ނަފްރަތުގެ ބިލަށް ތާއީދު ކުރާ، މިއުޒިކް ހަރާމް ނުކުރާ އަދި އިސްލާމް ދީނާއި ރަސޫލާ އަށް ފުރައްސާރަ ނުކުރާ އިއްތިހާދެއް ކަމަށެވެ.
އެކަމާ ގުޅޭ ގޮތުން އެމްޑީޕީގެ ވަޓްސްއެޕް ގްރޫޕެއްގައި ނަޝީދު މިއަދު ވިދާޅުވީ، "އިންޑިއާ އައުޓް" ފަލްސަފާއާ ދުރު، ނަފްރަތުގެ ބިލަށް ތާއީދު ކުރާ އަދި މިއުޒިކަށް އެއްބަސްވެވޭ ބަދަލުތަކެއް ޕީޕީއެމަށް ގެނެސް އެ ހަމަތަކުގައި ސަރުކާރު ހިންގުމަށް ޕީޕީއެމް/އެމްޑީޕީގެ ކޯލިޝަނެއް އުފައްދަން ޖެހޭ ކަމަށެވެ. ޕީޕީއެމާއި އެމްޑީޕީގެ ކޯލިޝަނެއް އުފެއްދުމަށް ޔާމީންގެ އެހީތެރިކަމަށް އެދުމަކީ ރާއްޖެއަށާއި އެމްޑީޕީ އަށް ވެސް އެންމެ ރަނގަޅު ގޮތް ކަމުގައި ދެކެވަޑައިގަންނަވާ ކަމަށް ވެސް އެ މަނިކުފާނު ވިދާޅުވި އެވެ.
އެމްޑީޕީ އާއި ޕީޕީއެމް ގުޅުމަށް ނަޝީދު ގެންގުޅުއްވާ ވިސްނުންފުޅަށް މިހާތަނަށް އެމްޑީޕީގެ ތެރެއިން ފާޅުގައި ތާއީދު ކުރެއްވީ އެ މަނިކުފާނާ އެންމެ އަރިސް ބޭފުޅުންގެ ލިސްޓުގައި ހިމެނޭ، އެ ޕާޓީގެ ޗެއާޕާސަން ހަސަން ލަތީފެވެ.
ޕީޕީއެމާ ގުޅިގެން އިއްތިހާދެއް ހަދަން ބޭނުންފުޅުވާ ކަމަށް ނަޝީދު ތަކުރާރުކޮށް އެކި ގޮތްގޮތަށް ވިދާޅުވިޔަސް ޕީޕީއެމުން ބުނަނީ އެ ކަމެއް ނުވާނެ ކަމަށާއި އެ ދެ ފިކުރެއް ދުވަހަކު ވެސް އެއް ނުވާނެ ކަމަށެވެ.
ނަޝީދާ އެކު މަސައްކަތް ނުކުރާނެ ކަމަށާއި ރާއްޖޭގެ ވެރިކަން ހިންގުމުގެ ނިޒާމު ބަދަލު ކުރުމުގެ މަސައްކަތުގައި ވެސް ޕީޕީއެމް/ޕީއެންސީ ބައިވެރި ނުވާނެ ކަމަށް އިދިކޮޅު ފަރާތްތަކުން ބުންޏެވެ.
އިދިކޮޅު ފަރާތްތަކާ ދިމާލަށް މިސްރާބު ޖަހަން ނަޝީދު ނިންމެވި ސަބަބެއް ކަމުގައި އެ މަނިކުފާނު ވިދާޅުވީ، ގާތް އެކުވެރިޔާ ރައީސް އިބްރާހިމް މުހައްމަދު ސޯލިހާ ސިޔާސީ ގޮތުން ހިޔާލު ތަފާތުވެފައިވާތީ ކަމަށެވެ.
ރާއްޖޭގައި ދެން އޮންނަން ޖެހޭނީ ބަރުލަމާނީ ނިޒާމެއް ކަމަށާއި 2023 ގައި އެ ނިޒާމަށް ބަދަލު ކުރުމުގެ މަސައްކަތް ފައްޓަވާނެ ކަމަށް ނަޝީދު ވިދާޅުވި އެވެ. އަދި އެކަމުގައި އިދިކޮޅު ލީޑަރު އަދި ކުރީގެ ރައީސް ޔާމީން އެހީތެރިވެވަޑައިގަންނަވާނެ ކަމަށް ނަޝީދު އުންމީދު ކުރައްވަ އެވެ.