ޚަބަރު / މަސްތުވާތަކެތި

ޑްރަގަށް ފަރުވާދޭ މަރުކަޒުގައި ބައިތިއްބަންޖެހޭ މީހުންގެ ބަންދު މުއްދަތު ޖެހުން ކްރިމިނަލް ކޯޓުން ހުއްޓާލައިފި

ކްރިމިނަލް ކޯޓުގެ ފަނޑިޔާރުންގެ މަޖިލީހުން ނިންމާފައި ވަނީ މަރުކަޒުތަކަށް ގެންދާ މީހުންގެ ބަންދު ޖެހުމުގެ އިހްތިސާސް އެ ކޯޓަށް ނެތް ކަމަށް

މަސްތުވާތަކެތި ބޭނުންކުރާ ބަޔަކު ހުއްޓުވައި ފާސްކުރަން: މަސްތުވާތަކެތި ބޭނުންކުރާ މީހުން ރިމާންޑް ސެންޓަރަށް ގެންދިއުމުގެ އަމުރު ނެރެދެވެން ނެތް ކަމަށް ކްރިމިނަލް ކޯޓުން ވަނީ ނިންމާފައި. -- ފައިލް ފޮޓޯ: ނިޝާން އަލީ/މިހާރު

މުއިއްޒު އިބްރާހިމް، މިހާރު

15 އޯގަސްޓް 2021 - 11:48

2 comments

މަސްތުވާތަކެއްޗަށް ފަރުވާ ދޭ މަރުކަޒުތަކުގައި ބައިިތިއްބަންޖެހޭ މީހުންގެ ބަންދާ މެދު ގޮތެއް ނިންމުމުގެ ބާރު ކްރިމިނަލް ކޯޓަށް ލިބިގެންނުވާ ކަމަށް އެ ކޯޓުން ނިންމައި ބަންދު ޖެހުން ހުއްޓާލައިފި އެވެ.

ކްރިމިނަލް ކޯޓުގެ ފަނޑިޔާރުންގެ މަޖިލީހުން މިދިޔަ ހަފުތާގައި ނިންމާފައިވަނީ މަސްތުވާތަކެއްޗާބެހޭ ގާނޫނުގެ 103 ވަނަ މާއްދާގެ ދަށުން ޑްރަގް އޮފެންޑާސް ރިމާންޑް ސެންޓަރުތަކުގައި ބަންދުކުރަން ޖެހޭ މީހުންގެ ބަންދާ މެދު ގޮތެއް ނިންމުމުގެ މައްސަލަތައް ބެލުމުގެ އިހްތިސާސް އެ ކޯޓަށް ލިބިގެންނުވާ ކަމަށެވެ. އެހެންވެ، އެފަދަ މީހުންގެ ބަންދު މުއްދަތު އިތުރުކުރަން ހުށަހަޅާ މައްސަލަތައް އެ ކޯޓުން ދެން ނުބަލަން ނިންމައި، އެކަން ފުލުހުންނަށް އަންގާފައިވާ ކަމަށް އެނގިފައިވެ އެވެ.

މަސްތުވާތަކެއްޗަށް ފަރުވާ ހޯދާ މީހުންގެ ބަންދު ޖެހުން ކްރިމިނަލް ކޯޓުން ހުއްޓާލީ އެކަން ކުރަމުން އަންނަތާ ހައެއްކަން މަސް ފަހުންނެވެ.

މިކަމާ ގުޅިގެން ފުލުހުންގެ ބަހެއް އަދި ލިބޭ ގޮތެއް ނުވެ އެވެ.

މަސްތުުވާތަކެއްޗާބެހޭ ގާނޫނުގެ 103 ވަނަ މާއްދާ ބުނާގޮތުން މަސްތުވާތަކެތި ބޭނުންކޮށްގެން ހައްޔަރު ކުރެވޭ މީހަކީ ފަރުވާ ދޭންޖެހޭ މީހެއް ކަމަށް ފުލުހުންނަށް ގަބޫލު ކުރެވިއްޖެ ނަމަ، އޭނާ ޖަލުގައި ބަންދު ކުރުމުގެ ބަދަލުގައި ބަންދު ކުރަން ޖެހޭނީ ޑްރަގް އޮފެންޑާސް ރިމާންޑް ސެންޓަރެއްގަ އެވެ. ނަމަވެސް އެގޮތަށް ބަންދުކުރާ ކުރުމަކީ ފުލުހުންގެ ބަންދުގައި ހުންނަ ހުރުމެއް ކަމަށް ބެލެވޭނެ ކަމަށް އެ މާއްދާގައިވެ އެވެ.

މަސްތުވާތަކެއްޗާބެހޭ ގާނޫނު އޮންނަ ގޮތުން މަސްތުވާތަކެއްޗަށް ދެވިހިފާފައިވާ މީހުންނަށް ދޭންޖެހޭ ފަރުވާއާ ބެހޭ ކަންކަން ބެލުމުގެ ބާރު އޮންނަނީ ޑްރަގް ކޯޓަށެވެ. ނަމަވެސް މަސްތުވާތަކެތި ޓްރެފިކް ކުރުން ފަދަ ކުށުގެ މައްސަލަތައް ބަލާނީ ކްރިމިނަލް ކޯޓާއި އަތޮޅު ތެރޭގެ މެޖިސްޓްރޭޓް ކޯޓުތަކުންނެވެ.