މަކަރާއި ހީލަތުން، އޮޅުވާލައިގެން މީހުންގެ އަތުން ހޯދާފައިވާ ފައިސާ ޖަމާކުރި ހަ އެކައުންޓެއްގެ ނަމްބަރު ފުލުހުން މިއަދު އާންމުކޮށްފި އެވެ.
ފުލުހުން ބުނީ އެކި މީހުންގެ ފޭސްބުކް އެކައުންޓްތައް ހެކްކޮށް، އެ އެކައުންޓްތަކުގެ ވެރިފަރާތުގެ ނަމުގައި އެކި މީހުންނާ މުއާމަލާތުކޮށް، މަކަރާއި ހީލަތުން ފައިސާ ހޯދަމުންދާ މައްސަލަތަކެއް މިހާރު ތަހުގީގު ކުރަމުން އަންނަ ކަމަށެވެ.
މިއަދު އާންމުކުރި އެކައުންޓް ނަންބަރުތަކަކީ ފުލުހުން ތަހުގީގު ކުރަމުން އަންނަ މައްސަލަތަކުގައި އޮޅުވާލައިގެން ފައިސާ ޖަމާކުރުވާފައިވާ ކަމަށް ފާހަގަކުރެވޭ އެކައުންޓްތަކެއް ކަމަށް ވެސް ފުލުހުން ބުންޏެވެ.
ހެކްކޮށްފައިވާ ފޭސްބުކް އެކައުންޓެއް މެދުވެރިކޮށް ނުވަތަ އެ ނޫން ވެސް ގޮތަކުން ކުރެވުނު މުއާމަލާތެއްގެ ތެރެއިން، މިއިން އެކައުންޓަކަށް ފައިސާ ފޮނުވައި، މި ކުށުގެ ޝިކާރަކައަކަށް ވެފައިވާ މީހެއް ހުރި ނަމަ، އެކަން ފުލުހުންގެ އިކޮނޮމިކް ކްރައިމް ޑިޕާޓްމަންޓްގެ ނަންބަރު، 9790048 އަށް ގުޅާއި، ހިއްސާކުރުމަށް ފުލުހުން އެދިފައިވެ އެވެ
ވައްކަމުގެ އިތުރުން މަކާރާ ހީލަތުން، އެކި ގޮތްގޮތުން މީހުން އަތުން މުދަލާއި ފައިސާ ހޯދާ މައްސަލަތައް މިހާރު ވަނީ ވަރަށް ބޮޑަށް އިތުރުވެފަ އެވެ. އެފަދަ ކަން ކަމަށް ސަމާލުވުމަށް ފުލުހުން އަންނަނީ އިލްތިމާސްކުރަމުންނެވެ.
މިދިޔަ އަހަރުން ފެށިގެން މި އަހަރުގެ ޖޫން މަހުގެ ނިޔަލަށް، އެކި ސްކޭމްތަކުން މަކަރާއި ހީލަތުން މީހުންގެ އަތުން 7.4 މިލިއަނަށް ވުރެ ގިނަ ރުފިޔާ އަތުލާފައިވާ ކަމަށް ފުލުހުން ވަނީ ކުރިން ބުނެފަ އެވެ. އަދި އެ ސްކޭމް ކޯލްތައް ހިންގަން 800 އަށް ވުރެ ގިނަ ފޭކް ނަންބަރުތައް ބޭނުންކުރާ ކަމަށް ވެސް ބުނެފައިވެ އެވެ.
މި ނުބައި އަމަލު ހިންގަނީ ރާއްޖޭގެ ޖަލުތަކުގައި ތިބޭ ގައިދީންނާއި މުޖުތަމައުގެ ތެރެއިން ބަޔަކު ގުޅިގެން ކަމަށް ފުލުހުން ބުނެ އެވެ.
މިފަދަ 226 މައްސަލައެއް މިދިޔަ އަހަރު ހުށަހަޅާފައި ވާއިރު، މިއަހަރުގެ ފުރަތަމަ ހަ މަސް ދުވަހު އެކަނި ވެސް 259 މައްސަލައެއް ހުށަހަޅާފައިވެ އެވެ.