މީހަކަށް ގުޅައި މަކަރާއި ހީލަތުން ދޮޅު ލައްކަ ރުފިޔާ ހޯދާފައިވާ މައްސަލައަކާ ގުޅިގެން މީހަކު ހޯދަން ފޮޓޯ އާއި އޭނާގެ މައުލޫމާތު އާންމުކޮށްފި އެވެ.
ފުލުހުން ހޯދަން އިއުލާނުކޮށްފައިވަނީ ކ. ކާށިދޫ މީހެއް ކަމަށްވާ މުހައްމަދު އުނައިސް އެވެ.
ފުލުހުން ބުނި ގޮތުގައި އުނައިސް، 31، އަކީ މަކަރާއި ހީލަތުން މީހެއްގެ އަތުން ގިނަ އަދަދެއްގެ ފައިސާ ހޯދާފައިވާ މައްސަލައެއްގެ ތަހުގީގަށް ހާޒިރުކުރުމަށް ބޭނުންވެ، އުޅޭ ވަކިތަނެއް ނޭނގުމުގެ ސަބަބުން ތަހުގީގަށް ހާޒިރުވުމަށް ޗިޓު ނުދެވިފައިވާ މީހެކެވެ.
އުނައިސްގެ މައުލޫމާތު އާންމުކޮށް ފުލުހުން އަންގާފައި ވަނީ އަންނަ މަހުގެ ފަސް ވަނަ ދުވަހުގެ ކުރިން ތ. ގުރައިދޫ ޕޮލިސް ސްޓޭޝަނަށް ނުވަތަ އެންމެ ކައިރީގައި ހުރި ޕޮލިސް ސްޓޭޝަނަކަށް އޭނާ ހާޒިރުވުމަށެވެ.
މިމަހުގެ ކުރީކޮޅު ވެސް ފުލުހުން ވަނީ މަކަރާއި ހީލަތުން މީހެއްގެ އަތުން 60،000ރ. އަތުލި މީހަކު ހޯދަން އިއުލާންކޮށްފަ އެވެ.
ރާއްޖޭގައި މަކަރާއި ހީލަތުން މީހުންގެ އަތުން ފައިސާ ހޯދުމުގެ މައްސަލަތައް އިތުރުވެފައިވާއިރު މިދިޔަ އަހަރުން ފެށިގެން މި އަހަރުގެ މިހާތަނަށް މީހުންގެ އަތުން 7.4 މިލިއަނަށް ވުރެ ގިނަ ރުފިޔާ އަތުލާފައިވާ ކަމަށް ފުލުހުން ބުނެ އެވެ. މިދިޔަ އަހަރު ފުލުހުންނަށް އެފަދަ 226 މައްސަލައެއް ހުށަހަޅާފައިވާއިރު މިއަހަރުގެ ފުރަތަމަ ހަ މަސް ދުވަހު އެކަނި ވެސް 259 މައްސަލައެއް ހުށަހަޅާފައިވާ ކަމަށް ފުލުހުން ބުންޏެވެ.
މިކަހަލަ ސްކޭމްތައް ހިންގުމަށް، މައުލޫމާތު އޮޅުވާލައިގެން ނަގާފައިވާ 1،300 އަށް ވުރެ ގިނަ މޯބައިލް ފޯނު ނަމްބަރު ފުލުހުން ވަނީ ބްލޮކް ކޮށްފަ އެވެ.