މުކުރިމަގު ސްކޫލުގައި ދެ ކްލާސްރޫމް އަޅަން ޖަޕާނުން 1.2 މިލިއަން ރުފިޔާ ދީފި

ޖަޕާނުން ރާއްޖެއަށް ކަނޑައަޅުއްވާފައި ހުންނަވާ ސަފީރު ޓަކުޗީ މިޑޯރީ (ވ) އާއި މުކުރިމަގު ސްކޫލްގެ ޕްރިންސިޕަލް އަބްދުﷲ ޝަރީފު (ކ) އެހީ އެއްބަސްވުމުގައި ސޮއި ކުރުމަށްފަހު ފޮޓޯއަކަށް ހުއްޓިގެން-- ފޮޓޯ: ޖަޕާަން އެމްބަސީ

އިދުހާމް ނައީމް، މިހާރު

07 މާޗް 2022 - 14:49

1 comments

ލ. ގަމު މުކުރިމަގު ސްކޫލުގައި ދެ ކްލާސްރޫމް އަޅަން ޖަޕާނު ސަރުކާރުން 79،425 ޑޮލަރު (1.2 މިލިއަން ރުފިޔާ) ހަދިޔާކޮށްފި އެވެ.

މިއީ ހިލޭ އެހީގެ ގޮތުގައި އެ ގައުމުގެ "ގްރާސް ރޫޓްސް ހިއުމަން ސެކިއުރިޓީ ޕްރޮޖެކްޓް" (ޖީޖީޕީ) ގެ ދަށުން ދޭ ފައިސާ އެވެ.

މި އެއްބަސްވުމުގެ ދަށުން މުކުރިމަގު ސްކޫލުގައި އެލްކޭޖީ އާއި ޔޫކޭޖީ އަށް ހާއްސަ ދެ ކްލާސްރޫމް އިމާރާތް ކުރާނެ އެވެ. އަދި ގުދުރަތީ ކާރިސާތަކުގައި އިވެކުއޭޝަން ޝެލްޓަރެއް ހަދަން ވެސް އެ އެހީ ބޭނުން ކުރެވޭނެ ކަމަށް ރާއްޖޭގައި ހުންނަ ޖަޕާނުގެ އެމްބަސީން ބުންޏެވެ.

އެ އެހީގެ އެއްބަސްވުމުގައި ޖަޕާނުގެ ފަރާތުން ސޮއިކުރެއްވީ އެ ގައުމުން ރާއްޖެ އަށް ކަނޑައަޅާފައި ހުންނަވާ ސަފީރު ޓަކުޗީ މިޑޯރީ އެވެ. މުކުރިމަގު ސްކޫލްގެ ފަރާތުން ސޮއިކުރެއްވީ ޕްރިންސިޕަލް އަބްދުﷲ ޝަރީފެވެ.