އޭ ލެވެލްގެ ސިލަބަހަށް ގެނައި ބަދަލު ޕްރިންސިޕަލުންނަށް ކަމުދޭ

އޯ ލެވެލްގައި ދަރިވަރުން ހޯދަމުން އަންނަ މަތީ ނަތީޖާއާ އެކު އެއްބަޔަކު ސުވާލު އުފެއްދީ ކެމްބްރިޖު އިމްތިހާނުގެ ފެންވަރާ މެދުގަ އެވެ. އެހެންވެ، އެ ސިލަބަސް ބަދަލުކުރުމަށް ވެސް ގޮވާލި އެވެ. މި ވިސްނުމުގައި ތިއްބައި، އެޑިއުކޭޝަން މިނިސްޓްރީން ވަނީ އޭ ލެވެލްގައި މިހާތަނަށް ހަދަމުން ދިޔަ އެޑެކްސެލް ޓެސްޓުގެ ބަދަލުގައި ކެމްބްރިޖު ސިލަބަހަށް ކިޔަވައިދޭން ނިންމައި އެކަން މިއަދު އިއުލާނުކޮށްފަ އެވެ.

މިއީ، އޭ ލެވެލް އަށް ކިޔަވައިދޭ ސްކޫލުތަކުގެ ޕްރިންސިޕަލުން ވިދާޅުވި ގޮތުގައި ރަނގަޅު ބަދަލެކެވެ.

ވިލާ އިންޓަނޭޝަނަލް ހައި ސްކޫލުގެ ޕްރިންސިޕަލް ސައީދު އަހުމަދު ވިދާޅުވި ގޮތުގައި އޭ ލެވެލްގެ ސިލަބަސް ބަދަލުކުރުމަށް ޕްރިންސިޕަލުންނާ އެކު މިނިސްޓަރު ޑރ. އައިޝަތު އަލީ އިސްވެ ހުންނަވައި ވަރަށް ގިނަ ބައްދަލުވުންތައް ބޭއްވި އެވެ.

ފާއިތުވި އެއް އަހަރުގެ ތެރޭގައި، އެކި ދުވަސްތައް މަތިން ބޭއްވި ބައްދަލުވުންތަކުގައި ބައިވެރިވެވަޑައިގެންނެވި ގިނަ ޕްރިންސިޕަލުން ވެސް އިއްތިފާގުވީ، ސައީދު ވިދާޅުވި ގޮތުގައި، ސިލަބަސް ބަދަލުކުރުމަށެވެ.

އޭނާ ވިދާޅުވީ އެއް ބޯޑެއްގައި އިމްތިހާނު އޮތުން ވަރަށް މުހިއްމު ކަމަށެވެ. އޭގެ ފައިދާ ދަރިވަރުންނަށް ވަރަށް ބޮޑަށް ކުރާނެ ކަމަށް އޭނާ ވިދާޅުވި އެވެ.

"އެޑެކްސެލް އޭ ލެވެލް އަދި ކެމްބްރިޖު އޭލެވެލްގެ ފެންވަރުގައި ތަފާތެއް ނުހުންނާނެ. މި ބަދަލުން ދަރިވަރުންނަށް ވެސް ފަސޭހަވާނެ،" ސައީދު ވިދާޅުވި އެވެ.

"ކެމްބްރިޖު ނިންމާފައި ރަނގަޅު ނަތީޖާ ހޯދާ ކުދިންނަށް އެބަ އުނދަގޫތައް ދިމާވޭ މުގައްރަރުގައި ހުންނަ ތަފާތުތަކާ ހެދި. އަޅުގަނޑު ވަރަށް ތާއިދުކުރާ ކަމެއް މިއީ [ކެމްބްރިޖަށް ސިލަބަސް ބަދަލުކުރުމަކީ]،" އޭނާ ވިދާޅުވި އެވެ.

"އެއް އެގްޒާމް ބޯޑެއް ވީމާ ސިލަބަސް އިންނާނީ ގްރެޖުޑުއަލީ މަތިވެފައި. ފެންވަރު ދަށްވާނެއެކޭ ނުބުނެވޭނެ،"

ސައީދު ވިދާޅުވި ގޮތުގައި އެޑެކްސެލްގައި އިދާރީ ގޮތުން ކުރަންޖެހޭ ކަންތައްތަކުގައި، ކެމްބްރިޖަށް ވުރެ އުނދަގުލެވެ. އިނގިރޭސިވިލާތުގައި ހިންގާ ކެމްބްރިޖުގެ މައި އޮފީހާ ސީދާ ވާހަކަދެއްކުނަސް، އެޑެކްސެލްއާ ގުޅޭ ކަންކަމުގައި މުއާމަލާތްކުރަން ޖެހެނީ ސްރީ ލަންކާގައި އުންނަ އޮފީހެއް މެދުވެރިކޮށެވެ.

އެކަމަކު، އޭ ލެވެލް ވެސް ކިޔަވައިދޭ ސްކޫލެއްގެ ޕްރިންސިޕަލަކު ވިދާޅުވީ، އެޑެކްސެލްއަށް ވުރެ ކެމްބްރިޖުގެ މާކިން ސިސްޓަމް އޮންނަ ގޮތުން ރަނގަޅު ނަތީޖާ ނަތީޖާ ހޯދަން ދަރިވަރުންނަށް ފަސޭހަވާނެ ކަމަށެވެ. ނަމަވެސް އެ ދެ ޔުނިވާސިޓީގެ ޕޭޕަރުގެ ފެންވަރުގައި ވެސް ތަފާތެއް ނުހުންނާނެ ކަމަށް އޭނާ ވެސް ވިދާޅުވި އެވެ.

"ކެމްބްރިޖުގައި މާކިން ސިސްޓަމް ހުންނާނީ ދަރިވަރުންނަށް ފޭވަ ވާނެ ގޮތަކަށް،" އޭނާ ވިދާޅުވި އެވެ.

އޭގެ މިސާލެއްގެ ގޮތުން އޭނާ ދެއްކެވީ، 2000 ގެ ކުރީކޮޅު ކެމްބްރިޖު ސިލަބަހަށް އޯ ލެވެލް އިމްތިހާނު ބަދަލުކުރުމާ އެކު ރާއްޖޭގެ ގަދަ 10 ގައި ހިމެނުނު ދަރިވަރުންގެ އަދަދަށް އައި އިތުރުވުމެވެ.

އެޑެކްސެލްއަށް ކިޔަވައިދޭން ފެށިއިރު ގަދަ 10 އަށް އެރި ދަރިވަރުންގެ އަދަދު މަދުކަން ފާހަގަކުރައްވައި، ނަން ނުޖެހުމަށް ޝަރުތުކޮށް ވާހަކަދެއްކެވި ޕްރިންސިޕަލް ވިދާޅުވި އެވެ.

ރާއްޖޭގެ އެހެން ސްކޫލުތަކުގައި އެޑެކްސެލް ސިލަބަހަށް އޭ ލެވެލް ކިޔަވައިދޭން ފެށިއަސް، އައިލެންޑާސް އެޑިއުކޭޝަނުން ހިންގާ ބިލަބޮންގް އިންޓަނޭޝަނަލް ސްކޫލުގައި މީގެ 12 ވަރަކަށް އަހަރު ކުރިން އޭ ލެވެލް ފެށީ ވެސް ކެމްބްރިޖު ސިލަބަހުންނެވެ.

އެ ސްކޫލުގެ ޑެޕިއުޓީ ޕްރިންސިޕަލް އިސްމާއިލް ޝާނިމް ވިދާޅުވި ގޮތުގައި ދެ ސިލަބަހުގައި ތަފާތުތަކެއް ހުރުމުން ދަރިވަރުންނަށް އުނދަގޫވާ ކަމަށެވެ. ކެމްބްރިޖުގެ އޯ ލެވެލްއަށްވުރެ، އޭ ލެވެލްގެ ކެމްބްރިޖު ވެސް އުނދަގޫވާނެ ކަމަށް އޭނާ ވިދާޅުވި އެވެ.

ކެމްބްރިޖުގައި ބޮޑަށް އޮންނަނީ، ޝާނިމް ވިދާޅުވި ގޮތުގައި، ދަރިވަރުން އަމިއްލަ ވިސްނުމާއި ހުނަރު ބޭނުންކޮށްގެން ކިޔެވުމެވެ.

"އެގޮތަށް އޮތީމަ ކިޔެވުން ނިމޭއިރު ޔުނިވާސިޓީއަށް ދާން ފުރިހަމައަށް ތައްޔާރުވެފައި އޮންނާނީ. އަދި އޭ ލެވެލްއަށް ދާއިރު ވަރަށް ފަސޭހަވާނެ ޕޭޕަރު ސްޓްރަކްޗާތައް އެއްގޮތްވީމަ،" ޝާނިމް ވިދާޅުވި އެވެ.

އޭނާ ގަބޫލުކުރައްވާ ގޮތުގައި އޭ ލެވެލްގެ ސިލަބަސް ކެމްބަރިޖަށް ބަދަލުކުރުމަކީ އެ ސްކޫލުގެ ދަރިވަރުންނަށް ލިބޭނެ މޮޅެކެވެ. އެއީ؛ އޭ ލެވެލްގައި މިނިސްޓްރީން މިހާތަނަށް ވަނަ ދެމުން ދިޔައީ އެޑެކްސެލް އިމްތިހާނުގެ ނަތީޖާ އަށެވެ. އެކަމަކު، ބިލަބޮންގުގެ އޭ ލެވެލްގައި ކެމްބްރިޖަށް ކިޔަވައިދޭތީ، މަތީ ނަތީޖާ ހޯދާ ދަރިވަރުންނަށް ދެމުން ދިޔަ ރައީސްގެ ސްކޮލަޝިޕާއި ހައި އެޗީވާސް ސްކޮލަޝިޕްގެ ފުރުސަތުތައް ވެސް އެ ސްކޫލުގެ ދަރިވަރުންނަށް ލިބިފައިނުވެ އެވެ.

އެޑިއުކޭޝަން މިނިސްޓްރީގެ ދަށުން ހިންގާ، ޑިޕާޓްމަންޓް އޮފް ޕަބްލިކް އެގްޒަމިނޭޝަން (ޑީޕީއީ) ހިންގުމާ ހަވާލުވެވަޑައިގެން ހުންނެވި ޑެޕިއުޓީ މިނިސްޓަރު މުހައްމަދު އިހުސާން ވިދާޅުވީ އޯ ލެވެލްގައި ކެމްބްރިޖު ސިލަބަސް ކިޔެވުމަށް ފަހު އޭ ލެވެލްގައި އާ މަންހަޖަކަށް ބަދަލުވުމުގައި ދަރިވަރުންނަށް އުނދަގޫތައް ދިމާވާ ކަމަށެވެ. އޭގެ ސަބަބުން އޭ ލެވެލްގެ މެދު ތެރެއިން ކިޔެވުން ހުއްޓާލާ ދަރިވަރުން ގިނަ ކަމަށް ވެސް މިނިސްޓްރީން ބުނެ އެވެ.

އެހެންވެ، އެ ބަދަލު ގެނައީ އެ ހުރިހާ ކަމަކަށް ރިއާޔަތްކޮށް، ދަރިވަރުންނަށް ދިމާވާ ދަތިތައް ހައްލުކޮށްދިނުމަށް ކަމަށް އޭނާ ބުންޏެވެ.

މިނިސްޓްރީން ނިންމާފައިވަނީ އަންނަ އަހަރު ގްރޭޑް 11 އަށް ވަންނަ ދަރިވަރުންނަށް ކެމްބްރިޖް ސިލަބަސް ކިޔަވައިދޭން ފަށާށެވެ. އަދި ޖެހިގެން އަންނަ އަހަރުގެ އޮކްޓޯބަރު/ނޮވެމްބަރުގައި އެ ދަރިވަރުންނަށް ކެމްބްރިޖުގެ އިމްތިހާނު ދީ، ގްރޭޑު 12 ގެ ދަރިވަރުންނަށް 2024 ވަނަ އަހަރު އާ ސިލަބަހަށް ކިޔަވައިދޭން ފަށާނެ ކަމަށް އެ މިނިސްޓްރީން ނެރުނު ބަޔާނުގައި ބުންޏެވެ.