އިސްލާމީ މަރުކަޒުގެ މާބްލް ޖެހުމުގެ މަސައްކަތް ކުރަނީ: ބައެއް މަސައްކަތްތައް ހައުސިން މިނިސްޓްރީން ކޮށްފައި ވަނީ މާލިއްޔަތު ގާނޫނާ ހިލާފަށް ކަމަށް އޮޑިޓް ރިޕޯޓުގައި ބުނޭ. --ފޮޓޯ: މިހާރު
10 ޖެނުއަރީ 2017 - 06:34
39 comments
އުމްރާނީ ތަރައްގީ އަށް މި ސަރުކާރުން ކަނޑައެޅި ވައުދުތައް ފުއްދުމުގައި ހައުސިން މިނިސްޓްރީގެ ސްޕީޑު އަވަހެވެ؛ މިހާތަނަށް ނިންމާފައި ހުރި މަސައްކަތްތަކާއި ކުރިއަށްދާ މަޝްރޫއުތަކަށް ބަލާއިރު މިކަމަކާ ދެބަސްވެވޭކަށް ނެތެވެ. އެކަމަކު މައްސަލައަކީ މި މަސައްކަތްތަކުގެ ތެރެ އަށް ވެސް ކަންބޮޑުވާން ޖެހޭ މިންވަރަށް ކޮރަޕްޝަންގެ މޫތައް ފެތުރިފައި ވުމެވެ.
އޮޑިޓަ ޖެނެރަލް ހަސަން ޒިޔަތު މީގެ ހަފުތާއެއްހާ ދުވަސް ކުރިން ނެރުއްވި ހައުސިން މިނިސްޓްރީގެ 2014 ވަނަ އަހަރުގެ އޮޑިޓް ރިޕޯޓުގައި އެކަންކަން ވަނީ ތަފްސީލްކޮށްދެއްވައިފަ އެވެ.
ދައުލަތުގެ ބަޖެޓުން މިނިސްޓްރީ އަށް ކަނޑައެޅި ފައިސާ ހޭދަކުރުމުގައި މާލިއްޔަތު ގާނޫނާއި ގަވާއިދަށް ބެލުމެއް ނެތެވެ. ދަރުބާރުގެ ކުއްޔަށް ދީގެން ދައުލަތަށް ލިބެން ޖެހޭ ފައިސާތައް ވަނީ ނުލިބި އެވެ. ތިޖޫރީގެ ހިސާބު ވެސް ބަލަހައްޓާފައެއް ނުވެ އެވެ.
ދައުލަތުގެ ބަޖެޓުން ހަރަދުކުރާ ވަރަށް ބޮޑު ޕަސެންޓެއްގެ މަޝްރޫއުތައް ހިންގަނީ ހައުސިން މިނިސްޓްރީގެ ތެރެއިން ކަމަށް ވާއިރު، އެ މިނިސްޓްރީގެ އޮޑިޓުން ފާހަގަވެފައި ވަނީ ވަރަށް ސީރިއަސް، އަދި ކަންބޮޑުވާން ޖެހޭ މައްސަލަތަކެކެވެ. މިކަމުގައި ރައްޔިތުންނަށް ޖަވާބުދާރީވާން ޖެހުނު ނަމަވެސް ހައުސިން މިނިސްޓްރީ އޮތީ "ހިމޭނުންނެ"ވެ.
އޮޑިޓަ ޖެނެރަލްގެ ބައެއް ކަންބޮޑުވުންތައް:
- ހަތް ރަށެއްގެ މަގު ހަދަން ގަވާއިދާ ހިލާފަށް 120 މިލިއަން ރުފިޔާ ބަޔަކަށް ދިނުމާއި ބަޖެޓުގައި ހިމަނާފައި ނުވާ ޕްރޮޖެކްޓަކަށް 12 މިލިއަން ރުފިޔާ ހަރަދުކޮށްފައިވުން.
- ދަރުބާރުގެ ކުއްޔަށް ދީގެން 2014 ގެ ނިޔަލަށް ދައުލަތަށް ލިބެން ޖެހޭ 1.5 މިލިއަން ރުފިޔާ ހޯދާފައި ނުވުން.
- މިނިސްޓްރީގެ ތިޖޫރީގައި ހުންނަން ޖެހޭ ފައިސާގެ ސައްހަ އަދަދު ކަށަވަރު ނުކުރެވުން.
- އެއްބަސްވުން ތައްޔާރުނުކޮށް، މާލިއްޔަތު ގަވާއިދާ ހިލާފަށް 500،000 އަށް ވުރެ ގިނަ ރުފިޔާ ހަރަދުކޮށްފައިވުން.
- ސިވިލް ސާވިސްގެ ގަވާއިދާ ހިލާފަށް މުވައްޒަފަކު ގެންގުޅެ، މުސާރަ އާއި އެހެނިހެން އެލަވަންސްގެ ގޮތުގައި 52،000 އަށް ވުރެ ގިނަ ރުފިޔާ ހަރަދުކޮށްފައިވުން.
- އެ މިނިސްޓްރީ އަށް ކަނޑައެޅި ބަޖެޓުން ހަރަދުކުރި ގޮތާއި ލިބުނު އާމްދަނީ އާއި ހަރަދުގެ ހިސާބު މާލިއްޔަތު ގާނޫނާ އެއްގޮތަށް އޮޑިޓް އޮފީހަށް ހުށަހަޅާފައި ނުވުން.
- މިނިސްޓްރީގެ ހަރު މުދަލާއި ހަރު މުދަލުގެ ރެކޯޑުތައް ގަވާއިދާ އެއްގޮތަށް ބަލަހައްޓާފައި ނުވުން.
މި ކަންކަން އިސްލާހުކުރަން ދިން ލަފާގައި ވެސް އޮޑިޓަ ޖެނެރަލްގެ އެންމެ ބޮޑު އެއް ކަންބޮޑުވުމެއްގެ ގޮތުގައި ފާހަގަކުރައްވާފައި ވަނީ ހައުސިން މިނިސްޓްރީގެ މާލީ ބަޔާންތައް އެ އޮފީހަށް ހުށަނާޅާ މައްސަލަ އެވެ. ތަކުރާރުކޮށް އެދިގެން މިދިޔަ އަހަރު ވެސް މާލީ ބަޔާން ހުށަހަޅާފައި ނުވާއިރު 2012 ވަނަ އަހަރާއި 2013 ވަނަ އަހަރު ވެސް މާލީ ބަޔާން ހުށަހަޅާފައި ނުވާ ކަމަށް އޮޑިޓަ ޖެނެރަލް ވިދާޅުވެފައިވެ އެވެ.
ހައުސިން މިނިސްޓްރީގެ ބެލުމުގެ ދަށުން މަޖީދީ މަގު އަލުން ހަދާފައި: އުމްރާނީ ތަރައްގީގެ ގިނަ މަޝްރޫއުތަކެއް ހައުސިން މިނިސްޓްރީން ހިންގާއިރު، އެ މިނިސްޓްރީން މާލިއްޔަތު ގާނޫނާ ހިލާފުވުމަކީ ސީރިއަސް މައްސަލައެއްގެ ގޮތުގައި އޮޑިޓް އޮފީހުން ދެކޭ. --ފޮޓޯ:މިހާރު
އޮޑިޓް ރިޕޯޓުގައި އޮޑިޓަޖެނަރަލް ލަފާ ދެއްވާފައި ވަނީ ދައުލަތަށް ލިބެން ޖެހޭ ފައިސާ ހޯދުމަށެވެ. އެއީ ގާނޫނުގައި ވެސް ލިއެފައި އޮންނަ ގޮތެވެ. އެކަމަކު ސުވާލަކީ، އޮޑިޓަ ޖެނެރަލް އެންގެވިއަސް ގަވާއިދާ ހިލާފަށް ހަރަދުކޮށްފައިވާ އެ ފައިސާ ދެން ހޯދާނީ ކިހިނެއް ހެއްޔެވެ؟
އޮޑިޓް އޮފީހުގެ މެނޭޖަ ޓެކްނިކަލް މުހައްމަދު ނަސީމް "މިހާރު" އަށް އިއްޔެ ވިދާޅުވީ ހައުސިން މިނިސްޓްރީގެ އޮޑިޓުން ފާހަގަވެފައި ވަނީ ވަރަށް ސީރިއަސް މައްސަލަތަކެއް ކަމަށެވެ. އެހެންވެ ރައްޔިތުންގެ މަޖިލީހުގެ މާލިއްޔަތު ކޮމިޓީ އާއި ފިނޭންސް މިނިސްޓްރީގެ ތެރެއިން، އެ އޮންނަ އުސޫލާ އެއްގޮތަށް ހައުސިން މިނިސްޓްރީން ޖަވާބުދާރީވާނެ ކަމަށް އުންމީދު ކުރައްވާ ކަމަށް އޭނާ ވިދާޅުވި އެވެ.
"ދައުލަތުގެ ބަޖެޓުގެ ކެޕިޓަލް ހަރަދުގެ ވަރަށް ބޮޑު ބައެއް މި ގެންދަނީ ހައުސިން މިނިސްޓްރީގެ ތެރެއިން. ރާއްޖޭގެ ތަރައްގީ އަށް ހިންގާ އުމްރާނީ ތަރައްގީގެ ގިނަ މަސައްކަތްތައް ހިންގަނީ އެ މިނިސްޓްރީން. މިގޮތަށް އެފަދަ މުހިންމު މިނިސްޓްރީއަކުން މިސް މެނޭޖްމަންޓްކޮށް ކަންތައް ހިންގާ ނަމަ އެއީ މި ތަރައްގީގެ މަޝްރޫއުތައް ވެސް ލަސްވާނެ ކަމަށް،" ނަސީމް ވިދާޅުވި އެވެ.
"އޭގެ މާނަ އަކީ ރައްޔިތުންނަށް ތަރައްގީގެ މަޝްރޫއުތަކުން ލިބޭ ފައިދާއެއް އެ ލިބެން ޖެހޭ އަވަސް މިނެއްގައި ނުލިބޭނެއޭ. ދޯހަޅިކޮށް ހިންގާ ކަންތައްތަކުން ގެއްލުން ރައްޔިތުންނަށް ވާނެއޭ."
އޭނާ ވިދާޅުވީ ސަރުކާރުގެ އޮފީހެއްގެ މުވައްޒަފުންނަށް މިސާލަކަށް މަދުން މުސާރަ ދެވުމުން، ޖެހިގެން އަންނަ މަހު ބަޖެޓުގެ ތެރެއިން އެކަން އެޖެސްޓް ކުރެވުނަސް، ބިޔަ މަޝްރޫއުތަކަށް ހަރަދުކުރާ ފައިސާ ދޯހަޅިކޮށް ހަރަދު ކުރުމުން، ލިބޭނެ ގެއްލުން އިންތިހާ އަށް ބޮޑުވާނެ ކަމަށެވެ.
"އޭގެ ނަތީޖާ އަކީ އެކަމާ ގުޅިގެން ރައްޔިތުންނަށް ހަގީގީ ފައިދާ ނުލިބުން،" ހައުސިން މިނިސްޓްރީގެ އޮޑިޓުން ފާހަގަވި ކަންތައްތައް ވަރަށް ސީރިއަސްކަން ފާހަގަކުރައްވަމުން ނަސީމް ވިދާޅުވި އެވެ.
ކޮރަޕްޝަންގެ މައްސަލަތަކަށް ޖަވާބުދާރީ ނުވުމާއި ކަމާ ގުޅޭ އިދާރާތަކުން ފިޔަވަޅު ނޭޅުމަކީ ކުޑަ ކަމެއް ނޫނެވެ؛ އޮޑިޓް ރިޕޯޓުން ކިތަންމެ ބައިވަރު މައްސަލަތަކެއް ވެސް ފެންމަތިކުރެވިދާނެ އެވެ. އެކަމަކު މުހިއްމީ ކޮރަޕްޝަން ހުއްޓުވަން ފިޔަވަޅު އެޅުމެވެ.
އިތުރު ލިޔުންތައް
މަގްބޫލް ލިޔުންތައް
Mihaaru Print Edition
Download Mihaaru News App
Offline Alerts
SMS 'sub mihaaru' to 5454
ކޮމެންޓްތައް
ހާޞިލް
15 January 2017
މި ތަނުގައި މުށި ޖަހާ މިތަނުން ދުއްވާ ތަކެތި ނުދުއްވާ ގޮތަށް ހެދުމުން ދަތުރުކުރަން ޖެހެނީ މާލެވަށާލާފަ ނަމަވެސް މުށިތައް ހަލާކުވިޔަސް މުށި ޖެހުމުގެ ބޭނުން އެބަ ފުދޭ އެއީ މުޒާހަރާކުރުމަށް މިސަރަހައްދަށް މީހުން ވަނަ ނުދިނުން
ޝިފާޒް
10 January 2017
ކޮބާތަ މައްސަލައަކީ. ތީ ހުރިހާ ސަރުކާރެއްގައިވެސް ކިރާ ކަމެއް. ޑިމޮކްރެޓިކް ބޯޑް އަޅުވަަގެން ތިބި މީހުންވެސް ވަރަށް ފާޅުގައި ކޮށް ނިންމާފައި އޮތް ކަމެއްތީ.
ވިދާޅުވިގޮތެއް
10 January 2017
އެހެންވެ ރައްޔިތުންގެ މަޖިލީހުގެ މާލިއްޔަތު ކޮމިޓީ އާއި ފިނޭންސް މިނިސްޓްރީގެ ތެރެއިން، އެ އޮންނަ އުސޫލާ އެއްގޮތަށް ހައުސިން މިނިސްޓްރީން ޖަވާބުދާރީވާނެ ކަމަށް އުންމީދު ކުރައްވާ ކަމަށް އޭނާ ވިދާޅުވި އެވެ. މިއޮތީ މިކަން ނިމިފައެއްނޫންތޯ.
ޢަލީ
10 January 2017
ޖެހީމާބުލް ރެނދުލީ ތަށިމުށީގަ
ޢަބްދުﷲނާފިޒު
10 January 2017
އޮޑިޓް ރިޕޯޓުން ދައްކަނީ ކޮރަޕްޝަން، އެކަމަކު ހިމޭނުން! ކޮރަޕްޝަން ހުއްދަވީމަ ދެން މަޑުން ނުތިބެ ފުމެނެގުމަކީ، ފޫނެތް ފަޔަށް ފެންފުރުންކަހަލަ ކަމެއް ނޫންތޯ.
ސުޒީ
10 January 2017
ކޮރަޕްޝަން ހުއްޓުވުމައް ރައްޔިތުން ހޭލުންތެރި ބަޔަކައް ވާންޖެހޭކަމުގަ ދެކެން! އަތުގަ އޮންނަނީ މިޒަމާނުގެ އެއްމެ ތޫނުފިލި ފޯނު އެކަމަކު އެއްވެސްކަމެއް ބުއްދިން ވިސްނާލުމެއްނޯވޭ! އިހައްދުވަހު ދެމަފިރިއަކު އެއްތަނެއްގަ މަރުވެފަ ތިއްބަފެނުމަވެސް ބުނަނީ ހާދަރީތި މަރެކޭ ހަމަ ހީވަނީ ނިދާލާފަ ތިހެނޭ ! ރައްޔަތުންގެ ތިޖޫރިން އެތައްބިލިއަން ފައިސާއެއް ގެއްލި، ތިޖޫރި ބަލަހައްޓަން ހަވާލުވެގެން އުޅޭމީހުންގެ އެކައުންތަކުން އެތައްބައިވަރު ފައިސާފެނި އެކަމާ އެއްވެސް ސުވާލެއް ނުއުފައްދަ ތިބުމަކީވެސް ހަމަޖާހިލުކަން ކަމުގަދެކެން!
ބެންކޮކް މަންޖެ
10 January 2017
އަސްލު ކޮރަޕްޝަން/ވައްކަން ގިނަވެގެން މިއުޅެނީ އިކޮނޮމިސްޓެއްގެ ކުލަޖެހިގެން އުޅޭ އިކޮނޮގޭނޭމިސްޓެއް ހުރުމުން. އަތުޖެހުނުހާ އެއްޗެއް ކަޓެއްލާފަ ވިއްކާލުން ކަމަކީ.
ބޫ
10 January 2017
ދޫތައް ހިމޭންވެފައެވެ. ގަލަންތައް ހުއްޓިފައެވެ. ނޫސްތައް ނުދެނެހުރި ޙާލުގައެވެ. ކެމެރާތަކުގެ ފޯކަސް ގެއްލިފައެވެ. އެނގުނަސް ނުދެނެހުރި މީހުންނެވެ. ކަމެއް ނުކުރިޔަސް ނަންފުޅު ރީތިކުރުމާއި ޚުޝާމަދު ކުރުމުގައި އަވަދިނެތިއުޅޭ މީހުންނެވެ. ތިޖޫރީ ހުރިތާނގައި ވަޅުގަނޑެއް ހުއްޓަސް، އެއީ ހައިބަ ބޮޑު ތިޖޫރީއެއް ކަމުގައި ރައްޔިތުންނަށް ދެއްކުމަށް އަވަދިނެތި އުޅޭ މީހުންނެވެ. ކުރާނީ ކީއްތޯއެވެ. ހިޓްލަރުގެ ދުވަސްވަރު ގަންނަން ޖެހިފައިވާ ބިރަށްވުރެ ބޮޑު ބިރަކާ ކުރިމަތިވެ، ޙައްޖާޖު ބުނު ޔޫސުފަށްވުރެ އަނިޔާވެރި ވީމާ ދެން ވާނެ ހައެތި ވީއެވެ. އަދި 2018ގެ ވޯޓުވެސް މިހާރުގެ ރައީސަށް ދޭށެވެ. އެހެނީ ޤައުމު މިވަނީ އެމަނިކުފާނަށް ދަރަނިވެރިވެފަޔޯލައެވެ.
އެފެންނަނީ
10 January 2017
ހައުސިންގް މިނިސްޓްރީގެ އޮޑިޓް ރިޕޯރޓްގައި އެއޮތީ އެއީ ސިޔާސީ މަގާމް ތަކުގައި ތިބި މީހުން ކުރަން ޖެހޭނެ ކަންކަމެއް ނޫނެވެ. އެއީ އަކީ އެއްގޮތަކަށް ވެސް ސިޔާސީ މަގާމް ތަކުގައި ތިބި މީހުން ކުރަން ޖެހޭނެ ކަމެއް ނޫނެވެ. އެއީ ސިވިލް ސާރވެންޓުން ޒިންމާ ނަގަން ޖެހޭނެ ކަންކަން ކަން އެއޮތީ ފެންނާން އޮޑިޓް ރިޕޯރޓް އިން ވަަރަށް ސާފުކޮށް ފެންނާން އެވެ.
1234
10 January 2017
މުއިއްޒުއަށް ޖަލުގެ ކުޑަގޮޅިތައް އިންތިޒާރުކުރާހެން ވަރަށް ހީވޭ އެބަ. އަދީބުގެ ގޮޅިއާ ޖެހިގެން އިންގޮޅި އެބަ ހުސްވޭ. ބުރިޖު ހަދާ ނިމުމާއެކީ މުއިއްޒު ގެއްލޭނެކަން ޔަގީން.