ރައީސް މުއިއްޒު އާދިއްތަ ދުވަހު އިންޑިއާއަށް ފުރާވަޑައިގަންނަވަނީ

އިންޑިއާގެ ރައީސް ދުރޫޕަދީ މުރުމޫގެ ދައުވަތަކަށް ރައީސް ޑރ. މުހައްމަދު މުއިއްޒު އަންނަ އާދިއްތަ ދުވަހު އެ ގައުމަށް ފުރަމާނަ ދަތުރުފުޅެއް ފައްޓަވަން ނިންމަވައިފި އެވެ.

ރައީސް އޮފީހުގެ ތަރުޖަމާން ހީނާ ވަލީދު މިއަދު އިއުލާން ކުރެއްވި ގޮތުގައި ރައީސް އެ ދަތުރުފުޅު ކުރައްވާނީ އާދިއްތަ ދުވަހުން ބުދަ ދުވަހުގެ ނިޔަލަށެވެ.

"ރައީސުލްޖުމްހޫރިއްޔާގެ މި ދަތުރުފުޅުގައި އިންޑިއާގެ ރައީސާއި ބޮޑުވަޒީރާއި އަދި އެ ގައުމު އިސް މަސްއޫލުވެރީންނާ ބައްދަލުކުރައްވައި، ދެ ގައުމުގެ ގުޅުން އިތުރަށް ބަދަހިކުރެއްވުމަށް މަޝްވަރާ ކުރައްވާނެ،" އެކްސްގައި ހީނާ ކުރެއްވި ޕޯސްޓެއްގައި ވެ އެވެ.

ރައީސް އޮފީހުން ބުނީ، ރައީސް މުއިއްޒުގެ އަރިހުގައި ދިވެހި ސަރުކާރުގެ މަތީ ފެންވަރުގެ ވަފުދެއް ބައިވެރި ކުރައްވާނެ ކަމަށެވެ.

"މި ދަތުރުފުޅުގައި، ދިވެހި ވަފްދުގެ މެހުމާންދާރީގެ ހުރިހާ ކަންކަން ވެސް ހަމަޖައްސަވައި ދެއްވާނީ އިންޑިއާ ސަރުކާރުގެ ފަރާތުންނެވެ،" ރައީސް އޮފީހުގެ ވެބްސައިޓުގައި ވެ އެވެ.

މިއީ މިދިޔަ އަހަރުގެ ނޮވެމްބަރު 17 ގައި މަގާމާ ހަވާލުވެވަޑައިގެންނެވި ފަހުން، އިންޑިއާ އަށް އެ މަނިކުފާނު ކުރައްވާ ދެވަނަ ދަތުރުފުޅެވެ. އެކަމަކު، މިދިޔަ ޖޫން މަހު އެ މަނިކުފާނު އެ ދަތުރުފުޅު ކުރެއްވީ އެ ގައުމުގެ ބޮޑުވަޒީރު ނަރެންދުރަ މޮދީ މަގާމުގެ ހުވާކުރެއްވުމުގެ ރަސްމިއްޔާތަށެވެ. އެހެންވެ، މިއީ ރައީސް މުއިއްޒު އިންޑިއާ އަށް ކުރައްވާ ފުރަތަމަ ފުރަމާނަ ދަތުރުފުޅެވެ.

އިންޑިއާގެ ބޮޑުވަޒީރު މޯދީ ތިން ވަނަ ދައުރަކަށް މަގާމުގެ ހުވާކުރައްވަން މިދިޔަ ޖޫން މަހު ބޭއްވި ރަސްމިއްޔާތަށް ރައީސް މުއިއްޒު ވަޑައިގެން މޯދީއާ އެކު މަޝްވަރާ ކުރައްވަނީ.---ފޮޓޯ: ރައީސް އޮފީސް

އިންޑިއާގެ ބައެއް ނޫސްތަކުން ބުނެފައިވާ ގޮތުގައި ރައީސް މުއިއްޒުގެ ދަތުރުފުޅުގައި ދިއްލީގެ އިތުރުން މުމްބާއި އާއި ބެންގަލޫރަށް ވެސް ވަޑައިގަންނަވާނެ އެވެ.

ރައީސް މުއިއްޒާއި މޯދީ ވަނީ މޯދީ މަގާމުގެ ހުވާކުރެއްވުމުގެ ރަސްމިއްޔާތުގެ އިތުރުން މިދިޔަ އަހަރުގެ ޑިސެމްބަރު މަހު ދުބާއީގައި ބޭއްވި ކޮޕް ސަމިޓުގެ ހަވާސާގައި ވެސް ބައްދަލުކުރައްވައިފަ އެވެ.

ރައީސް އިންޑިއާ އަށް މި ވަޑައިގަންނަވަނީ ދެ ގައުމުގެ ގުޅުން ކުރިން ގޯސްވެފައިވީ ނަމަވެސް އެ ގުޅުން ވަރަށް ބޮޑަށް ރަނގަޅު ކޮށްފައިވާ ދަނޑިވަޅެއްގަ އެވެ.

އިންޑިއާގެ އެކްސްޓާނަލް އެފެއާޒް މިނިސްޓަރު ޖައިޝަންކަރު މިދިޔަ އޮގަސްޓް މަހު ރާއްޖެ އަށް ކުރެއްވި ދަތުރުގައި ރައީސް މުއިއްޒާ ބައްދަލުކުރައްވަނީ.---ފޮޓޯ: ރައީސް އޮފީސް

އެ ގުޅުން ބޮޑަށް ގޯސްވީ، ރާއްޖޭގައި ތިބި އިންޑިއާގެ ސިފައިން ފޮނުވާލަން ނިންމައި، އެކަމުގެ މަޝްވަރާތައް ކުރިއަށް ދަނިކޮށް، ރާއްޖޭގެ ދެ ޑެޕިއުޓީ މިނިސްޓަރަކު ބޮޑުވަޒީރު މޮދީ އާއި އިންޑިއާގެ އަގު ވެއްޓޭ ގޮތަށް ސޯޝަލް މީޑިއާގައި ދެއްކެވި ވާހަކަތަކަކާ ގުޅިގެންނެވެ.

ދެ ގައުމުގެ މަސްރަހު ހޫނުވާ ގޮތަށް ވާހަކަ ދެއްކެވި ޔޫތު މިނިސްޓްރީގެ ޑެޕިއުޓީ މިނިސްޓަރުކަމުން މަލްޝާ ޝަރީފާއި މަރިޔަމް ޝިއުނާ ސަސްޕެންޑްކުރި އެވެ. އެ ދެ ބޭފުޅުން ވަނީ މިދިޔަ ސެޕްޓެމްބަރު 10 ގައި އެ މަގާމުން އިސްތިއުފާ ދެއްވައިފަ އެވެ.

ރާއްޖޭގައި ތިބި އިންޑިއާގެ ސިފައިން އަނބުރާ ފޮނުވައިލުމަކީ ރައީސް މުއިއްޒުގެ ރިޔާސީ ވައުދަކަށް ވާތީ، އެކަން ފުރިހަމަކޮށް، އެ ގައުމުގެ މަދަނީ މީހުން ސިފައިންގެ ބަދަލުގައި ގެނައީ ދެ ސަރުކާރުން އެއްބަސްވި ގޮތުގެ މަތިންނެވެ.