ޔުނިފޯމް އެޅި މުއައްސަސާތަކަށް އިތުބާރު ކޮށްގެން ތިބެވޭކަށް ނެތް: ނާޒިމް

ޔުނިފޯމް އެޅި މުއައްސަސާތަކާ މެދު ވެސް އިތުބާރު ކޮށްގެން ބަލަން ތިބެވެން ނެތް ކަމަށާއި 241 ކޮމިޓީން ބަލަމުންދާ މައްސަލަތައް ނިމުމުން، މަސްތުވާތަކެތީގެ މައްސަލަ ފަދަ ކަންކަމުގައި ހައްލުތަކެއް ހުށަހަޅުއްވާނެ ކަމަށް ރައްޔިތުންގެ މަޖިލީހުގެ ނައިބު ރައީސް އަހްމަދު ނާޒިމް މިއަދު ވިދާޅުވެއްޖެ އެވެ.

މަޖިލީހަށް ހުށަހަޅާފައިވާ މަސްތުވާތަކެއްޗާ ބެހޭ ގާނޫނަށް އިސްލާހު ގެނައުމުގެ ބިލަށް ބަހުސް ކުރައްވަމުން ނާޒިމް ވިދާޅުވީ މަސްތުވާތަކެތި އެތެރެވުމުގައި ކަސްޓަމްސްގެ އިހުމާލު ވެސް ވަރަށް ބޮޑު ކަމަށެވެ.

"އަޅުގަނޑުމެންނަށް ފެނިފައި އެބަހުރި ކަސްޓަމްސްގެ އިހުމާލު ވެސް ވަރަށް ބޮޑަށް އޮތް މަންޒަރު. އިރާދަކުރެއްވިއްޔާ 241 ކޮމިޓީން މިހާރު ބަލަމުންދާ މައްސަލަތައް ނިމުނީމާ އެކަށީގެންވާ ހަރުކަށި އަދި ތަންފީޒު ކުރެވޭ ފަދަ ހައްލުތަކެއް ސަރުކާރަށް ހުށަހަޅާނަން. އަޅުގަނޑުމެންނަށް ނެތް ޔުނިފޯމް އެޅި މުއައްސަސާތަކާ މެދު ވެސް އިތުބާރު ކޮށްގެން ބަލަން ތިބެވޭކަށް،" ނާޒިމް ވިދާޅުވި އެވެ.

ނާޒިމް ވިދާޅުވީ ވެލާނާ އިންޓަނޭޝަނަލް އެއާޕޯޓްގައި ބެގެޖް ބާލައި، އަރުވާ މީހުންގެ ތެރޭގައި މަސްތުވާތަކެތި އެތެރެކުރަން އެހީވެދޭ މީހުން އުޅޭ ކަމުގެ އަޑުތައް އިވޭ ކަމަށެވެ.

"އިންޓަނޭޝަނަލް ފްލައިޓްތަކުން އަންނަ ވަކި ފާހަގައެއް ޖަހާފައި ހުންނަ ސުއިޓްކޭސްތައް ނަގާފައި އެ ޑޮމެސްޓިކް ޓާމިނަލްގެ ބެލްޓަށް ލީމާ އެއްވެސް އެކްސްރޭއެއް ނުކުރެވި އެ މާލެ ތެރެއަށް އެތެރެވެ ދާ ތަން. އެ ރިންގް ވެސް މިހާރު ވަނީ ނިމިފައި،" ނާޒިމް ވިދާޅުވި އެވެ.

ނަމަވެސް، އެއާޕޯޓްގެ ކުނި އުކާލުމުގެ ތެރެއިން އެ ފަދަ ސުއިޓްކޭސްތައް ބޭރުކުރަން މަސައްކަތްކުރާ ކަމުގެ ވާހަކަ ވެސް މިހާރު ދެއްކެވޭ ކަމަށް ނާޒިމް ވިދާޅުވި އެވެ.

ނާޒިމް، މަޖިލީހުގެ 241 ކޮމިޓީގައި: އެއާޕޯޓުން ކުނި އުކާލުން ވެސް ޑްރަގު އެތެރެކުރުމާ ގުޅިފައިވާ ކަމުގެ ތުހުމަތު ކުރެއްވި - ފޮޓޯ: ނިޝާން އަލީ / މިހާރު

"ޑްރަގަސް އެތެރެ ކުރަން ބޭނުންވާ މީހުން މިހާރު ބޭނުންވަނީ އެއާޕޯޓްގެ ކުނި އުކާލުމާ ވެސް ހަވާލުވާން، އޭރަށް ދެން މި ދެންނެވި ސުއިޓްކޭސްތައް ހުންނާނީ ގޮނޑުގައި. ގޮނޑުން ނަގައިގެން އެ އެއްޗެހިތައް އެތެރެވާ ގޮތަށް ހަމަޖެހެން އެ މީހުން ބޭނުންވެގެން ކަންކަން މިގޮތަށް މި ދަނީ،" ނާޒިމް ވިދާޅުވި އެވެ.

ވެލާނާ އެއާޕޯޓްގެ ކުނި މިދިޔަ އަހަރު އޮކްޓޯބަރު މަހާ ހަމައަށް އުކާލަމުންދިޔައީ ސަރުކާރުގެ ކުންފުނި، ވެމްކޯއިންނެވެ. ނަމަވެސް، ހިދުމަތަށް ކުރަން ޖެހޭ މަސައްކަތާއި ލިބޭ އަގު ދެކޮޅު ނުޖެހޭ ކަމަށް ބުނެ ވެމްކޯ އިން ވަނީ ވެލާނާ އެއާޕޯޓުން ކުނި ނެގުމުގެ މަސައްކަތް ދޫކޮށްލައިފަ އެވެ.

ވެމްކޯއިން މަސައްކަތް ހުއްޓާލުމުން އެއާޕޯޓް ހިންގާ، އެމްއޭސީއެލް އިން ވަނީ އަމިއްލަ ކުންފުންޏަކާ އެ މަސައްކަތް ހަވާލުކޮށްފަ އެވެ. ބޮޑު އަގުގައި އަމިއްލަ ކުންފުންޏަކުން އެއާޕޯޓްގެ ކުނި އުކާލަމުންދާ މައްސަލަ ފެންމަތިވުމާ އެކު ފިނޭންސް މިނިސްޓްރީ މެދުވެރިވެގެން ވެމްކޯއިން ވަނީ ކުނި އުކާލުމުގެ މަސައްކަތް އަލުން ފެށުމަށް އެއްބަސްވެފަ އެވެ. އަދި ހުޅުލެ އިން ތިލަފުއްޓަށް ކުނި އުކައިދޭނެ ބަޔަކު ހޯދަން ގެޒެޓްގައި އެމްއޭސީއެލް އިން ކުރި އިއުލާނު ވެސް މިހާރު ވަނީ ބާތިލްކޮށްފަ އެވެ.

މަޖިލީހުގެ ނައިބު ރައީސް ނާޒިމް ވިދާޅުވީ ރާއްޖޭގައި މަސްތުވާތަކެތީގެ މައްސަލަ ހައްލު ކުރަން އިހުލާސްތެރި މަސައްކަތްތަކެއް ކުރަންޖެހޭ ކަމަށާއި މިހާރު މިއޮތް ހާލަތަށް ދިޔައީ ދައުލަތުގެ މުއައްސަސާތަކުގެ ވެސް އިހުމާލު އޮވެގެން ކަމަށެވެ.

ނާޒިމް ވިދާޅުވީ ރާއްޖޭގެ ބޯޑަރުތަކުން މަސްތުވާތަކެތި އެތެރެވެގެން ނާންނާނެ ކަމުގެ ޔަގީންކަން ރައްޔިތުންނަށް ދޭންޖެހޭ ކަމަށެވެ. އަދި އެފަދަ އަމަލުތައް ހިންގައިގެން މުއައްސަސާތަކުގައި ތިބޭ މީހުން ނުހައްގު މުއްސަނދިކަން ނުހޯދޭނެކަން ވެސް ޔަގީންކުރަން ޖެހޭ ކަމަށް އޭނާ ވިދާޅުވި އެވެ.