ޓޫރިސްޓު ވިސާގައި ރާއްޖެ އައިސް ވިޔަފާރިކުރުމުގައި އުޅުނު ސީރިއާ މީހަކާއި ޖޯޑަން މީހަކު ޑީޕޯޓްކުރަން ނިންމައިފި އެވެ.
މޯލްޑިވްސް އިމިގްރޭޝަނުން މިއަދު އެކްސްގައި ކުރި ޕޯސްޓެއްގައި ބުނީ އެ މައްސަލަ ބެލީ އެ އިދާރާއަށް ލިބުނު ރިޕޯޓަކާ ގުޅިގެން ކަމަށެވެ.
އިމިގްރޭޝަނުން ހިފަހައްޓާފައި ވަނީ ސީރިއާގެ 19 އަހަރުގެ އަންހެނަކާއި ޖޯޑަންގެ 24 އަހަރުގެ ފިރިހެނެކެވެ. އެ މީހުން ރާއްޖެ އައި ދުވަހެއް އިމިގްރޭޝަނުން އަދި ނުބުނެ އެވެ.
ނަމަވެސް، އެ ދެމީހުންނަކީ ޓޫރިސްޓު ވިސާއާ ހިލާފުވެ، ރާއްޖޭގައި ވިޔަފާރިކުރުމަށް އުޅުނު ދެ މީހުން ކަމަށް އިމިގްރޭޝަނުން ބުންޏެވެ.
އެ ދެމީހުން ޑީޕޯޓްކުރުމުގެ މަސައްކަތް ކުރަމުން އަންނަ ކަމަށް ބުނެ އިމިގްރޭޝަނުން ބުނީ މިގޮތަށް ގާނޫނާ ހިލާފަށް ރާއްޖޭގައި އުޅޭ ބިދޭސީންގެ މައްސަލަތައް އެ އިދާރާއަށް ރިޕޯޓްކުރުމަށް އެދޭ ކަމަށެވެ.
ޓޫރިސްޓް ވިސާގައި ރާއްޖެ އެތެރެވެ، މާލެ ތެރޭގައި ވިޔަފާރިކޮށް، އާއްމު ތަންތަނުގައި ނިދައި އުޅުނު ޗައިނާގެ ޓޫރިސްޓަކު ވެސް އިމިގްރޭޝަނުން ވަނީ މިދިޔަ މަހު ހިފަހައްޓައިފަ އެވެ.
އިމިގްރޭޝަނުން ކުރިން ވެސް ބުނެފައި ވަނީ ވިސާއާ ހިލާފުވާ ނަމަ ހަރުކަށި ފިޔަވަޅު އަޅާނެ ކަމަށެވެ.
ރާއްޖޭގައި ގަވާއިދާ ހިލާފަށް އުޅޭ ބިދޭސީން ހުއްޓުވުމަށް އިމިގްރޭޝަނުން އަންނަނީ ގިނަ މަސައްކަތްތަކެއް ކުރަމުންނެވެ. އިމިގްރޭޝަންގެ އޮޕަރޭޝަންތަކުގައި ގިނަ އަދަދެއްގެ ބިދޭސީން ހިފަހައްޓައި، 5،000 އަށް ވުރެ ގިނަ މީހުން ޑީޕޯޓްކޮށްފައިވެ އެވެ