ފޮޓޯގްރާފަރުން ތަމްރީންކުރަން ހިންގި ޕްރޮގްރާމްގެ ބައިވެރިންނާ އެކު ރައީސް ޔާމީން ފޮޓޯއަކަށް ހުއްޓިވަޑައިގެން. --ފޮޓޯ: ނިޝާން އަލީ/މިހާރު
25 ސެޕްޓެމްބަރ 2017 - 00:46
10 comments
ހަމައެކަނި ދިވެހިންނަށް ވަޒީފާ އަދާކުރެވޭ ދާއިރާއެއްގެ ގޮތުގައި ކަނޑައަޅާފައިވާ ފޮޓޯގްރަފީ އަށް 400 އަށް ވުރެ ގިނަ މީހުން ތަމްރީނު ކޮށްފި އެވެ.
އިކޮނޮމިކް މިނިސްޓްރީ އާއި އެޑިއުކޭޝަން މިނިސްޓްރީ ގުޅިގެން ފޮޓޯގްރާފަރުން ތަމްރީނުކުރަން ހިންގި ދެ ވަނަ ޕްރޮގްރާމްގައި ބައިވެރިވި 414 މީހަކަށް މިރޭ ވަނީ ސެޓްފިކެޓްދީފަ އެވެ.
އެ ރަސްމިއްޔާތުގައި އެޑިއުކޭޝަން މިނިސްޓަރު ޑރ. އައިޝަތު ޝިހާމް ވިދާޅުވީ މިދިޔަ އަހަރު އޭޕްރީލް މަހު ފެށި ޕްރޮގްރާމްގައި 249 ޒުވާނަކު މިހާރުވެސް ތަމްރީނު ހޯދަމުން އަންނައިރު 100 އަށް ވުރެ ގިނަ ޒުވާނުން އެ ދާއިރާގެ ވަޒީފާތަކުގައި ހަރަކާތްތެރިވަމުން އަންނަ ކަމަށެވެ. މީގެ ކުރިން ޒުވާނުން ސިފަކޮށްފައިވަނީ މުޖުތަމައުއަށް ބުރައަކަށް ވެފައިވާ ބައެއްގެ ގޮތުގައި ކަމަށާއި ނަމަވެސް ރައީސް ޔާމީން ވަނީ އެ ތަސައްވަރު ބަދަލުކޮށްފައި ކަމަށް މިނިސްޓަރު ވިދާޅުވި އެވެ.
"ޒުވާނުން ތިބީ ހައްގު މަގާމް ހޯދައިދޭން ވެރިއަކަށް ބަލަބަލާ، ހުޅުވާލި ކޮންމެ ފުރުސަތެއް ބޭނުންކުރުމަށް ތައްޔާރަށް،" ރައީސް އަބްދުﷲ ޔާމީން ބައިވެރިވެވަޑައިގެންނެވި ހަފުލާގައި މިނިސްޓަރު ވިދާޅުވިއެވެ.
އިކޮނޮމިކް މިނިސްޓަރު މުހައްމަދު ސައީދު ވިދާޅުވީ ފޮޓޯގްރަފީގެ ދާއިރާއަކީ ހަމައެކަނި ދިވެހިން ހަރަކާތްތެރިވާ ދާއިރާއަކަށް މިސަރުކާރުން ހަދާފައިވާއިރު އެ ދާއިރާގައި ހަރަކާތްތެރިވާ ޒުވާނަކަށް މަހެއްގެ މައްޗަށް 2000 ޑޮލަރު (ގާތްގަނޑަކަށް 30،840ރ.) އާއި 3000 ޑޮލަރު (ގާތްގަނޑަކަށް 46،260ރ.)ގެ އާމްދަނީއެއް ލިބެމުން އަންނަ ކަމަށެވެ.
އެއްވެސް މަސައްކަތަކީ އާދައިގެ މަސައްކަތެއް ކަމަށް ނުދެކި މަސައްކަތް ކުރަންވީ ވަގުތު ޖެހިއްޖެ ކަމަށާއި މިއަށްވުރެ ބޮޑަށް ގައުމު ތަރައްގީ ކުރަން އުޅުން ޒަމާނެއް ނެތް ކަމަށް ވެސް މިނިސްޓަރު ސައީދު ވިދާޅުވި އެވެ.
ޒުވާނުން ތަމްރީނު ކުރަން ހިންގާ ޕްރޮގްރާމްތަކުގެ ތަފްސީލް ދެއްވަމުން އެޑިއުކޭޝަން މިނިސްޓަރު ވިދާޅުވީ ފެނަކަ އާއި އެޑިއުކޭޝަން ގުޅިގެން އިލެކްޓީޝަން ކޯހަށް 1600 ޒުވާނުން ބައިވެރިވެފައިވާއިރު ސްކޫލު ކުދިންގެ ތެރެއިން ވޭތުވެދިޔަ ދެ އަހަރު ތެރޭގައި 2700 އަށްވުރެ ގިނަ ދަރިވަރުން ވަޒީފާތަކާއި މަސައްކަތްތަކަށް ތަމްރީނު ކޮށްފައިވާ ކަމަށެވެ.
ދަސްވާރު ޕުރޮގުރާޕުގައި ބައިވެރިވި 83 ޕަސެންޓް ކުދިން އުޅެނީ ވަޒީފާގައި ނުވަތަ އިތުރަށް ތައުލީމް ހޯދުމުގައި ކަމަށާއި ޓިވެޓު އޮތޯރިޓީ މެދުވެރިކޮށް މިދިޔަ އަހަރުން ފެށިގެން 6484 މީހުން ތަމްރީންކޮށްފައިވާ ކަމަށް ވެސް މިނިސްޓަރު ވިދާޅުވި އެވެ.
އިތުރު ލިޔުންތައް
މަގްބޫލް ލިޔުންތައް
Mihaaru Print Edition
Download Mihaaru News App
Offline Alerts
SMS 'sub mihaaru' to 5454
ކޮމެންޓްތައް
އަހްމަދުު1546
25 September 2017
ކޮންމެ އާއިލާއަކަށް ފެމިލީ ފޮޓޯގްރާފާރ އެއް، ޝުކުރިއްޔާ ރައީސް
ރާއިޒް
25 September 2017
ދެން ފޮޓޯ ނަގާ ވަރުން ސަލާމަތް ނުވާނެ
އުމަރު
25 September 2017
ފޮޓޯގްރާފަރުން ތަމްރީންކުރީ 2018 ވަނަ އަހަރު ޕީޕީއެމްއިން ކެމްޕޭން ހިންގަން
މަރިޔަން
25 September 2017
ފޮޓޯގްރާފަރުން މުޒާހިރާ ފޮޓޯ ނެގުން ހުއްދަބާ؟ އަދި ނުވިތާކަށް ދަންނަވާލަން އޮތީ އެއްވެސް ވަޒީފާއެއް އަދާ ކުރެވޭނީ ދުނިޔޭގަ ތިބެގެން. ކިތައް ޒުވާނުންތޯ ކޮންމެ މަހަކުހެން ކަތިލަމުން މަރަމުން މިދަނީ؟ މިކަމާ ރައީސް ވިދާޅުވާނެ އެއްވެސް ބަސްފުޅެއް ނެތް ދެއްތޯ؟
ޅިޔަންބެ
25 September 2017
ކޮންމެ ގެއަކައް ފޮޓޯނަގާ މީހެއް. ސާބަހޭ ޕިންކީ ރައީސް. އަތްޖަހާ އަތްޖަހާ އަތްޖަހާ މަމިއޮއް އަތް ބިނދެނީ.
ލަތީފް ދިއްދޫ
25 September 2017
ތަމުރީނު ކުރި ފޮޓޯ ގުރާފަރުން ނަގަނީ ކޮންބައެއްގެ ފޮޓޯއެއްބާ؟ އިރުއޮއްސޭ މަންޒަރާ މޫދު އަދި ގަސްގަހާގެހި ނަގައިގެން ފޭސްބުކަށް ފޮޓޯ ލިޔަކަސް ޖީބަށް ބަރެއްނުވޭ. ހުރިހާ ރިސޯޓެއްގައި ފޮޓޯނަގަން ބޭރުމީހުން ނަމެއްގައި ތަންތަނަށް ކެމަރާޔާ ސުޓޭޑުން އުފުލަން ދިވެހި ކުއްޖާ އެވެސް އެންމެ ދެ ދުވަހަށް ދެން ބުނާނެ ސާޅީޙާސް ވަޒީފާ އުފައްދާފީމޭ.
އާމިނަ
25 September 2017
މަރުހަބާ ސަރުކާރު. 400 ވަޒީފާ އުފައްދައިދިނީތީ. ކިޔަވައިގެން ތިބި ބަޔަކު އަދިވެސް ދަނީ މަހަށް.
ފަތައްސީލާ
25 September 2017
ސާބަސް ސަރުކާރަށް. ޓިޔަމީހުންނަށް ދެނެއް ހަރަދު ކުރާނެ ފައިސާ ނުލިބި ނުހުންނާނެ. މުޅި ރއްޔަރުން ތިމީހުންފަހާދުވާނެ ފޮޓޯނަގުވަން. ބާރަށް އަތްޖަޙާ.
އަސްލުވެސް
25 September 2017
ކިތަންމެ ވަރަކަށް ފޮޓޯގްރާފަރުން ތަމަރީނު ކުރިޔަކަސް ބޮޑެތި އަދި ގިނަ ރިސޯޓްތަކުގައި އަދިވެސް ފޮޓޯގްރަފީ މަސައްކަތުގައި އިސްކޮށް ތިބެނީ ބިދޭސީން. ނުވަތަ އެފަދަ ގިނަ ކޮމްޕެނީ ތަކަކީ ބިދޭސީން ހިންގާ ކޮމްޕެނީތައް. މިކަން ރަނގަޅަށް މޮނިޓާ ކުރެވެންޖެހޭ.
އެދުރުބެ
25 September 2017
މިއީ ވަރަށް ރަގަޅަށް ފެށި ރަގަޅައް ހިންގޭ ޕްރޮގްރާމެއް. އެކަމަކު އަދިވެސް ބިދެސީ ޓީޗަރުންނާއި ބިދޭސީ ނަރުހުން އެކަށީގެންވާ ވަރަށް މަދު ނުކުރެވޭ. މިކަން މުޅިން ކާމިޔާބު ވާނީ އާބާދީ މަދު ކުދި އާބާދީ ބަލާފައި އަހަރަކު މަދުވެގެން 5 ރަށް މަދު ކުރެވިގެން.