ރ. ފުރަވެރި ރިސޯޓުގެ ބޭރުގައި ޕާކުކޮށްފައި އޮތް ޓީއެމްއޭގެ ސީޕްލޭނަކުން ވައްކަން ކުރި މައްސަލައެއް ފުލުހުން ތަހުގީގުކުރަން ފަށައިފި އެވެ.
ފުލުސް އޮފީހުން ބުނީ ބޯޓަށް ބަޔަކު އަރައި، އެއިން އެއްޗެހިތަކެއް ގެންދިޔަ ކަމަށް ބުނާ މައްސަލައެއް އިއްޔެ ހެނދުނު ރިޕޯޓު ކޮށްފައިވާ ކަމަށެވެ.
އެނގިފައިވާ ގޮތުގައި އެ ބޯޓުން ވައްކަން ކުރީ، ބޯޓުގެ ހުރިހާ ފަޅުވެރިން ރިސޯޓަށް ފޭބި ފަހުން، އިއްޔެ ރޭގެ ވަގުތެއްގަ އެވެ. އަދި ބޯޓަށް އަރައި، އޭގައި ހުރި ބައެއް އެއްޗެހި ވަނީ ވަގަށް ނަގައިފަ އެވެ.
'ބޯޓު ތެރެ ވަރަށް ބޮޑަށް ހާވާފައި އޮތީ،" އެކަން އެނގޭ މީހަކު "މިހާރު" އަށް ބުންޏެވެ.
ބޯޓުން ވައްކަން ކުރުމުން، އޭގެ ސަލާމަތީ ކަންކަން ހުރި ގޮތް ބެލުމަށް ޓީއެމްއޭގެ ޓީމެއް ވެސް އިއްޔެ ވަނީ އެ ރިސޯޓަށް ގޮސްފަ އެވެ.