ކެންސަރާއި ފުއްޕާމޭގެ ބަލިތަކަށް ފަރުވާދޭ ދެ ސެންޓަރު އައިޖީއެމްއެޗުގައި ހުޅުވައިފި

ކެންސަރާއި ފުއްޕާމޭގެ ބަލިތަކަށް ފަރުވާދޭ ދެ ސެންޓަރު މިއަދު މިނިސްޓަރު ނާޒިމް ހުޅުއްވައިދެއްވަނީ. -- މިހާރު ފޮޓޯ: ހުސެން ވަހީދު

އާމިނަތު ޝިފްލީން، މިހާރު

11 ޖެނުއަރީ 2018 - 16:12

1 comments

ކެންސަރާއި ފުއްޕާމޭ އަދި ނޭވާލާ ނިޒާމުގެ ބަލިތަކަށް ފަރުވާ ދިނުމަށް އައިޖީއެމްއެޗުގައި ދެ ސެންޓަރެއް ގާއިމުކޮށް މިއަދު ޚިދުމަތް ދޭން ފަށައިފި އެވެ.

ސަރުކާރުގެ މައި ހޮސްޕިޓަލަށް 70 އަހަރު ފުރުން ފާހަގަ ކުރުމަށް މިއަދު އެ ހޮސްޕިޓަލުގައި ބޭއްވި ރަސްމިއްޔާތުގައި އެ ދެ ސެންޓަރު ހުޅުއްވައިދެއްވީ ހެލްތު މިނިސްޓަރު އަބްދުﷲ ނާޒިމް އިބްރާހީމެވެ.

އައިޖީއެމްއެޗުން ބުނީ ދިވެހިން އެންމެ ގިނައިން ރާއްޖޭން ބޭރުން ފަރުވާ ހޯދަނީ ކެންސަރަށް ކަމަށާއި އެހެންވެ އެ ބައްޔަށް ހާއްސަ ސެންޓަރެއް ރާއްޖޭގައި ހުރުން މުހިއްމު ކަމަށެވެ. އަލަށް ހުޅުވި މި ސެންޓަރުން ރޭޑިއޭޝަންގެ ފަރުވާ ފިޔަވައި އެހެން ހުރިހާ ފަރުވާއެއް ލިބޭނެ ކަމަށް އެ ތަނުން ބުންޏެވެ.

ކެންސަރަށް ފަރުވާ ދޭ ސެންޓަރުގައި ފަރުވާ ދެއްވާ ޑރ. ޝިފާން މިއަދު "މިހާރު"އާ ވާހަކަ ދައްކަވަނީ-- ފޮޓޯ: ހުސެން ވަހީދު

ކެންސަރަށް ފަރުވާ ދޭ އެ ސެންޓަރުގައި ފުރަތަމަ ދިވެހި އޮންކޯސާޖަން ނުވަތަ ކެންސަރުގެ އޮޕަރޭޝަންތަކަށް ޚާއްސަ ޑޮކްޓަރު މުހައްމަދު ޝިފާން ވެސް ފަރުވާ ދެއްވަ އެވެ.

އޭގެ އިތުރުން ކީމޯ ތެރަޕީ އަށް ބޭނުންވާ ސާމާނު ލިބޭ ފާމަސީއެއް އެ ސެންޓަރުގައި ހުންނައިރު، އެ ތަނުގައި ތިބޭނީ ވެސް އެކަމަށް ހާއްސަކޮށްގެން ތަމްރީނުކޮށްފައިވާ ނަރުހުން ކަމަށް އައިޖީއެމްއެޗުން ބުންޏެވެ.

ފުއްޕާމެ އާއި ނޭވާލާ ނިޒާމުގެ ބަލިތައް ވެސް ރާއްޖޭގައި އިތުރުވަމުން އަންނަ އިރު، މި ފަދަ ސެންޓަރެއް ވަކިން ހުޅުވުމަކީ އޭގެ ފަސޭހަ އާއްމުންނަށް ލިބޭނެ ކަމެއް ކަމަށް ވެސް އެ ހޮސްޕިޓަލުން ބުންޏެވެ.

ސިއްހަތު އައިޖީއެމްއެޗު ކެންސަރު ބަލިތައް

1 ކޮމެންޓް, 17 ރިއެކްޝަންސް

The name is already taken The name is available. Register?

ކޮމެންޓުކުރުމުގެ ގައިޑްލައިންއަށް އެއްބަސްވަމެވެ.

ކޮމެންޓްތައް

އެންމެ ފަސް މަގުބޫލް

ޝިފާގު

11 January 2018

އައިޖީއެމްއެޗަށް ސަރުކާރުން ގެންނަން ބޭނުންވާ ކުރިއެރުން ގެނެވެނީ އެތަން ހިންގުމަށް ގާބިލުޓީމަކާ ހަވާލުކުރީމައެވެ. ސަރުކާރުގެ ކުންފުނިތައް ވެސް މިފަދަ ފަރާތްތަކާ ހަވާލުކުރުމުން ތަފާތު ފެންނާނެއެވެ.