އެމްޑީޕީގެ ހަރުގެ ކައިރީގައި ރޭ ބޭއްވި އެއްވުން ރޫޅާލުމަށް ފުލުހުން ހަރަކާތްތެރިވަނީ.---ފޮޓޯ: ނިޝާން އަލީ/މިހާރު
22 ފެބުރުއަރީ 2018 - 12:16
އިދިކޮޅު ފަރާތްތަކުން ފަހަކަށް އައިސް މާލޭގައި ބާއްވާ މުޒާހަރާތައް ރޫޅާލުމާއި މުޒާހަރާގެ ބައިވެރިންނާ މެދު ފުލުހުން އަމަލުކުރާ ގޮތް ނޭޝަނަލް އިންޓެގްރިޓީ ކޮމިޝަން (އެންއައިސީ) އިން ބަލަން ފަށައިފި އެވެ.
އެންއައިސީގެ އޮފިޝަލަކު މިއަދު ވިދާޅުވީ، މުޒާހަރާތައް ބާއްވާ ތަންތަނަށް އެ ކޮމިޝަންގެ މުވައްޒަފުން މިދިޔަ އަންގާރަ ދުވަހުން ފެށިގެން ގޮސް، މުޒާހަރާ ކުރާ މީހުންނާ މެދު ފުލުހުން ކަން ކުރާ ގޮތް ކައިރިން ބަލަމުން އަންނަ ކަމަށެވެ.
އަދި ފުލުހުންގެ އަމަލުތައް މޮނިޓާ ކުރުމަށް ފަހު، ރިޕޯޓް އެކުލަވާލައި، ކޮމިޝަންގެ މެމްބަރުންނަށް ހުށަހެޅުމުގެ މަސައްކަތް ކުރަމުން އަންނަ ކަމަށް ވެސް އޮފިޝަލް ވިދާޅުވި އެވެ.
ރޭގެ އެއްވުމުގައި ބައިވެރިވި މީހަކު ފުލުހުންގެ ބެލުމުގެ ދަށަށް ގެންދަނީ.---ފޮޓޯ: ނިޝާން އަލީ/މިހާރު
"އެކަމަކު ރިޕޯޓާ މެދު ގޮތެއް ނިންމާނީ ކޮމިޝަންގެ މެމްބަރުން ބެލުމަށް ފަހު،" އޮފިޝަލް ވިދާޅުވި އެވެ.
އިދިކޮޅު ފަރާތްތަކުގެ އެއްވުންތައް މޮނީޓަ ކުރަން އެންއައިސީން މި ފެށީ، މިދިޔަ ހުކުރު ދުވަހު ބޭއްވި މުޒާހަރާ ކަވަރު ކުރުމަށް ހަރަކާތްތެރިވި ބައެއް ނޫސްވެރިންގެ އިތުރުން ބައެއް އާންމުންނަށް ފުލުހުންގެ ފަރާތުން އަނިޔާތައް ވެ އެކަމުގެ ޝަކުވާ ބޮޑުވެފައި ވަނިކޮށެވެ.
އެންއައިސީ އަކީ ފުލުހުންގެ އިތުރުން އިމިގްރޭޝަނާއި ކަސްޓަމާއި ކަރެކްޝަނަލް ސާވިސްއާ ގުޅޭ ގޮތުން ހުށަހަޅާ މައްސަލަތައް ބަލަމުން އަންނަ މިނިވަން ކޮމިޝަނެކެވެ. ސަރުކާރުން އެންއައިސީ އުފެއްދީ، ފުލުހުންގެ މައްސަލަތައް ބެލުމަށް ކުރިން އޮތް ޕޮލިސް އިންޓެގްރިޓީ ކޮމިޝަން (ޕީއައިސީ) އުވާލުމަށް ފަހު އެވެ.
ހަތަރު މެމްބަރުން ތިއްބަވާ އެ ކޮމިޝަނުން މައްސަލަ ބެލުމަށް ފަހު އެ މުއައްސަސާއެއްގެ ޑިސިޕްލިނަރީ ބޯޑަށް ހުށަހެޅިދާނެ އެވެ. ޖިނާއީ މައްސަލައެއް ނަމަ، ކޮމިޝަނުން ތަހުގީގު ކޮށް، ދައުވާ ކުރުމަށް ޕްރޮސެކިއުޓާ ޖެނެރަލް (ޕީޖީ) އޮފީހަށް ވެސް ފޮނުވުމުގެ ބާރު ކޮމިޝަނަށް ލިބެ އެވެ.
ޖަލުގެ ހުކުމްގައި ތިއްބެވި ނުވަ ބޭފުޅަކު ދޫކޮށްލުމަށް ސުޕްރީމް ކޯޓުން މި މަހުގެ 1 ގައި ކުރި އަމުރަށް ފަހު، ރާއްޖޭގެ ސިޔާސީ މަސްރަހު ވަނީ ވަރަށް ބޮޑަށް ހޫނުވެފަ އެވެ. އަދި އެ ބޭފުޅުން
ދޫކޮށްލުމަށް ގޮވާލައި، އިދިކޮޅު ފަރާތްތަކުން ކޮންމެ ރެއަކު މާލޭގައި ދަނީ އެއްވުންތައް ބާއްވަމުންނެވެ.
އެމްޑީޕީގެ ހަރުގެ ކައިރީގައި ރޭ އެއްވުން ކުރިއަށް ގެންދާތީ، އެސްއޯ ފުލުހުން އެ ސަރަހައްދުގައި ފޯރިމަރަނީ.---ފޮޓޯ: ނިޝާން އަލީ/މިހާރު
އެކަމަކު އެ އެއްވުމަށް ކޮންމެ ރެއަކު ވެސް ވަކި ހިސާބަކުން ފުލުހުން ދަނީ ހުރަސް އަޅައި ރޫޅާލަމުންނެވެ. މުޒާހަރާތައް ރޫޅާލުމުގެ ތެރޭގައި ބައެއް އާންމުންނަށާއި ނޫސްވެރިންނަށް ވެސް އަނިޔާވެފައިވެ އެވެ.
ޖަލު ހުކުމުގައި ތިއްބެވި ނުވަ ބޭފުޅަކު ދޫކުރުމަށް އަންގައި މި މަހުގެ 1 ގައި ސުޕްރީމް ކޯޓުގެ ފަސް ފަނޑިޔާރުންގެ އިއްތިފާގުން ނެރުނު އަމުރުގެ އެ ބައި، އުއްތަމަ ފަނޑިޔާރު އަބްދުﷲ ސައީދާއި ފަނޑިޔާރު އަލީ ހަމީދު ހައްޔަރު ކުރުމަށް ފަހު، ބާކީ ތިން ފަނޑިޔާރުން ވަނީ ބާތިލް ކޮށްފަ އެވެ.
އުއްތަމަ ފަނޑިޔާރާއި އަލީ ހަމީދު މި މަހުގެ ފަސްވަނަ ދުވަހުގެ ރޭ ހައްޔަރުކޮށްފައި ވަނީ، ވެރިކަން ބަދަލުކުރުމަށްޓަކައި ރިޝްވަތު ނެގި ކަމުގެ ތުހުމަތުގަ އެވެ. އެ ދެ ބޭފުޅުން ވެސް ހައްޔަރުކޮށްފައި ވަނީ ކުއްލި ނުރައްކަލުގެ ހާލަތު އިއުލާން ކުރުމަށް ފަހު އެވެ. އަދި ރައްޔިތުންގެ މަޖިލީހުން ވަނީ ކުއްލި ނުރައްކަލުގެ ހާލަތު 30 ދުވަހަށް ދަންމާލުމަށް މިދިޔަ އަންގާރަ ދުވަހު ނިންމައިފަ އެވެ.
Copyright © 2024 Mihaaru · Terms and Conditions · Privacy Policy
ކޮމެންޓްތައް
ޖެނެރަލް އަދުރޭ
26 February 2018
މި އެސް އޯ އަކީ ފުލުހުންގެ ތެރޭން ފުހެލަންޖެހޭބައެއް.
ދޮންތުއްތު
25 February 2018
2007 ވަނަ އަހަރުތެރޭ ލަޠީފާ ކިޔާ އަންހެނަކު ބަނޑުގަ ކުލި ހާކައިގެން، ޖުމްހޫރީ މައިދާނުގަ ތިމަންނަ ގައިގަ މުގުރުން ޖަހާފައޭ ކިޔާފަ ފޮޓޯއެއް ނަގައިގެން އުޅުނު ހަނދާން ވަރަށް ބޮޑަށް އާވެއްޖެ.
ަެއެމްސް
22 February 2018
ސްޕްރީމް ކޯޓުގެ ޙުކުމް ތަންފީޒް ކުރަންވީ ހިނދު އެ ހިނގާދިޔަ ކަންކަމުން އެން އައި ސީ އަށް ކުރެވޭނީ ވަކި ކޮން ކަމެއް ބާ؟
ތިމަންނަ
22 February 2018
ވަޅެއް ނު ތެޅޭނެ ، ތެޅޭ ނީ ހަމަ ދާނި ...
މުރާސިލް
22 February 2018
މުޒާހަރާތަކުގައި ފުލުހުން އަމލުކުރާ ހޮތް މޮނިޓަރ ކުރާށެވެ. އެހެން ޤައުމުތަކުގައި މުޒާހަރާކުރާ މީހުންނާއި ދެކޮޅަށް އެޤައުމުތަކުގެ ފުލުހުން އަމލުކުރާ ގޮތާއި އަޅ ކިޔާލާށެވެ. ދުނިޔޭގ އެހެން ޤައުމުތަކުގައި މުޒާހަރާ ކުރާ މީހުން ގަަށް ފުލުހުން ބަޑިޖަހާ މަރަމަުން ދާއިރުވެސް މައްސަލައަކަށް ނުވެފައި، ޜާއްޖޭގައި ފުލުހުން އަތުން މުޒާހަރާ ކުރާ މީހެއްގެ އަތުގައި ކޫރުމެއް އެޅުނަސް އެއީ މީހަކު މެރުމަށްވުރެެވެސް ބޮޑުކަމކށް ތި ހަދަނީ ކޮން ޑިމަކުރަސީއެއްގެ ދަށުން ހެއްޔެވެ.؟
ބަޑިއެދުރު
22 February 2018
އާ ދެން މިހާރު ނުވެއޮތްކަމަކީ ރައްޔިތުން ގަޔަށް ބަޑިޖެހުން.
އައްޑޫ ސިޓީ
22 February 2018
ސުޕްރީމް ކޯޓުތެރެއަށް ފުރާޅުމަތިން ފައިބައި އިސް ފަނޑިޔާރުންނާއި ކުޅެލި ޤައުމެއްގައި އެން.އައި.ސީ އަކަށް ކޮން މިނިވަންކަމެއް އޮންނާނީ؟؟؟ ލޮލް
އަހުމަދު އިބްރާހިމް
22 February 2018
އަބަދުވެސް ފުލުހުން ކުށްވެރިވަނީ ކީއްވެބާ؟ ކޮމެންޓް ކުރާ އެއްވެސް ބޭފުޅަކު ފުލުހުންގެ ހަތިޔާރު ގެންގުޅުމުގެ ގަވާއިދާއި އަދި ފުލުހުންގެ ގާނޫނުތައް ބެއްލެވިންތޯ؟ ހަތިޔާރު ބޭނުންކުރެވޭނެ ހާލަތްތައް ބެއްލެވިންތޯ؟ ނޫސްވެރިއަކަސް އާއްމު ރައްޔިތަކަށް ވިޔަސް ހައްގުތަކާއި އެކު ޒިންމާ ތަކެއް ވޭ......
ދެރަކަލޯ
22 February 2018
ފުރަތަމަ ކަމަކައް 7 ފެބުރުވަރީ މިވެރިން ހޭވި ހަޑި ބަލާ ފިޔަވަޅު އަލަންވީ
Boava
22 February 2018
ތި ރިޕޯޓް ނެރޭއިރު ފުލުހުން ވާނީ ސާފް ހުދު ފޮތިކޮޅަކަށް ގޯސްވާނީ ރައިޔިތުން. އެންމެ ފަހުން ރިޕޯޓްގައި ފާހަނަގަކުރާނީ ރައިޔިތުން ދިވެހި ފުލުހުންނަށް ގޯނާކޮށް އަމުރަށް ނުކިޔަމަންތެރިވާކަން.
އޮމްޝިއުޕޫރީ
22 February 2018
މޮނިޓަރ ކުރާ ވަރަކަށް ރައްޔަތުން ލެވޭނީ ޖަލަށް. މާތަކަލާކޯ ތިކަން ކުރާކަށް ބޭނުމެއް ނޫން.