އިދިކޮޅު ފަރާތްތަކުން ރޭ ބޭއްވި އެއްވުމުގެ ތެރެއިން ހައްޔަރުކުރި މީހަކަށް، ފުލުސް ވެހިކަލްގެ ތެރޭގައި އަނިޔާކުރި މައްސަލަ ތަހުގީގުކުރަން ފަށައިފި އެވެ.
ފުލުހުންގެ ތަރުޖަމާނު އަހުމަދު ޝިފާން ވިދާޅުވީ އެ އިދާރާގެ ޕްރޮފެޝަނަލް ސްޓޭންޑާޑް ކޮމާންޑްސް އިން އެ މައްސަލަ ތަހުގީގުކުރަމުން އަންނަ ކަމަށެވެ. ނަމަވެސް އިތުރު ތަފުސީލެއް ނުދެ އެވެ.
މާވެޔޮ މަގު ސަރަހައްދުން ފުލުހުން ހައްޔަރުކޮޮށް ވެހިކަލަށް އެރުވީ ހުސެއިން ޝިފާއު ނަމަކަށް ކިޔާ ޒުވާނެކެވެ. އޭނާއަކީ ކުރީގެ ރައީސް މައުމޫން އަބްދުލްގައްޔޫމަށް ތާއީދުކުރާ ޒުވާނެކެވެ. އޭނާ ހައްޔަރުކުރިތާ މާ ގިނަ އިރު ނުވަނީސް އޭނާ ވަނީ ދޫކޮށްލައިފަ އެވެ.
އޭނާ ވެހިކަލަށް އެރުވި ފަހުން، ކުލަ ހެދުމުގައި ތިބި ދެ ފިިރިހެނުން އޭގެ ތެރެއަށް އަރައި އޭނާގެ ގައިގައި އަތްލައި ކޮއްޕާ ހެދި އެވެ. އެ ދެ މީހުން އެތަނަށް އެރި އިރު ވެސް އެ ވެހިކަލްގެ ތެރޭގައި ފުލުހުން ތިއްބެވެ.
މައުމޫން ފެކްޝަނުން ވާހަކަދެއްކި މީހަކު ބުނީ ވެހިކަލަށް އެރުވުމަށްފަހު ދެ ފިރިހެނުން ގޮސް ޝިފާއުއަށް އަނިޔާކުރީ ކަމަށެވެ. އެއީ ކީއްވެގެން ކަމެއް ނޭނގޭ ކަމަށް ބުންޏެވެ.
"އެއްވެސް އެއްޗެއް ވެސް ނުދައްކައި އޭނާގެ ގައިގައި ތެޅީ. ޝިފާއު އަކަށް ނޭނގޭ އެއީ ކޮން ބައެއް ކަމެއް ވެސް،" މައުމޫން ފެކްޝަނުން ވާހަކަދެއްކި މީހަކު ބުންޏެވެ.
ސޯޝަލް މީޑިއާގައި ދައުރުވަމުންދާ ވީޑިއޯއިން ފެންނަ ގޮތުގައި އެ ދެ މީހުން ވެހިކަލަށް އަރައި ޝިފާއުއަށް އަނިޔާކުރަން ފެށުމުން، ފުލުހުން ގޮސް އެކަން ހުއްޓުވަ އެވެ.
އިދިކޮޅު އެއްވުމަށް ޕެޕާ ސްޕްރޭ ޖެހުމުން ހާލު ސީރިއަސްވި މީހަކަށް ވެސް އައިޖީއެމްއެޗުގައި އަންނަނީ ފަރުވާ ދެމުންނެވެ.
