އަންނަ ރައްޔިތުންގެ މަޖިލިސް އިންތިޚާބުގެ އެމްޑީޕީގެ ޕްރައިމަރީގައި ވާދަ ކުރެއްވުމަށް ކުރީގެ ރައީސް މުހައްމަދު ނަޝީދު މިއަދު ފޯމު ހުށަހަޅުއްވައިފި އެވެ.
މަޖިލިސް އިންތިޚާބުގައި ނަޝީދުު ވާދަ ކުރައްވަނީ މައްޗަންގޯޅީ މެދު ދާއިރާއަށެވެ. އެ ދާއިރާ އަށް ނިކުންނަވާނެ ކަން އިއުލާން ކުރައްވައި، ނަޝީދު މިހާރު ވަނީ އެ ދާއިރާގެ ޕްރައިމަރީގެ ކެމްޕެއިން ވެސް ފަށްޓަވައިފަ އެވެ.
މިއީ ރާއްޖޭގެ ރައީސްކަން ކުރެއްވި ބޭފުޅަކު މަޖިލިސް އިންތިޚާބަކަށް ނިކުމެވަޑައިގަންނަވާނެ ކަން އިއުލާން ކުރެއްވި ފުރަތަމަ ފަހަރެވެ.
ނަޝީދުގެ އިތުރުން އެހެން ދާއިރާތަކުގެ ޕްރައިމަރީގައި ވާދަކުރާ ފަރާތްތަކުން ވެސް މިހާރު ދަނީ ޕާޓީއަށް ފޯމް ހުށަހަޅަމުންނެވެ.
ކްރިމިނަލް ކޯޓުގެ އިސްގާޒީ އަބްދުﷲ މުހައްމަދު ގާނޫނާ ޚިލާފަށް ބަންދުކުރި މައްސަލާގައި ނަޝީދުގެ މައްޗަށް އިއްވި 13 އަހަރުގެ ޖަލު ހުކުމް މިދިޔަ މަހު ސުޕްރީމް ކޯޓުން ބާތިލް ކޮށްފައިވާތީ މަޖިލިސް އިންތިޚާބުގައި ވާދަކުރަން މިހާރު އެމަނިކުފާނަށް ހުރަހެއް ނެތެވެ.
ނަޝީދުގެ އިތުރުން ކުރީގެ ރައީސް އަބްދުﷲ ޔާމީން އިންތިޚާބުގައި ވާދަކުރަން އުޅުއްވާ ކަމުގެ އަޑުތަކެއް ފެތުރުނަސް، ޔާމީން ދާދިފަހުން ވިދާޅުވި ގޮތުގައި އެކަމުގައި އެމަނިކުފާނު އަދި ގޮތެއް ނުނިންމަވަ އެވެ.
ކުރީގެ ސަރުކާރުގެ އިސް ބޭފުޅުން ވެސް ގެންދަވަނީ މަޖިލިސް އިންތިޚާބަށް ނިކުންނަވާނެ ކަން އިއުލާން ކުރައްވަމުންނެވެ. މީގެ އިތުރުން ކުރީގެ ޑިފެންސް މިނިސްޓަރު މުހައްމަދު ނާޒިމް ވެސް ވަނީ އިންތިޚާބުގައި ވާދަކުރައްވަން ނިންމަވައިފަ އެވެ.