މިނިސްޓަރު އަމީން "މިހާރު" އަށް ވާހަކަ ދައްކަވަނީ: އާސަންދަ ނިޒާމްގައި ހުރި މައްސަލަތައް ދެނެގަނެ ހައްލު ހޯދަން ސަރުކާރުން މަސައްކަތް ކުރަމުން އަންނަ ކަމަށް ވިދާޅުވި. --ފޮޓޯ: ހުސެއިން ވަހީދު/މިހާރު
08 ޖެނުއަރީ 2019 - 10:32
55 comments
ވިޓަމިންސީ ގުޅައެއްގެ އާއްމު އަގަކީ ދޮޅު ރުފިޔާ އެވެ. އެކަމަކު މި ބޭހުގެ އަގު އެތައް ގުނައެއް މަތިކޮށް 66ރ. އަށް، އާސަންދައިގެ ހިދުމަތުގެ ތެރެއިން ވިއްކައިފި އެވެ. މި ބޭހުން ދައުލަތަށް ބޮޑު ގެއްލުމެއްވާ ގޮތަށް މަގުފަހިވީ، އާސަންދަ އިން އެ އަގު ފާސްކޮށްދީފައި އޮތުމުންނެވެ. ނުވަތަ ބިލްކުރާ އަގަކަށް ފައިސާ ދޫކުރާނެ ކަމުގެ ޔަގީންކަން އޮތުމުންނެވެ. މިއީ، މިދިޔަ މަހު ފެންމަތިވި، އާސަންދަ ނިޒާމު ބޮއްސުންލާފައި އޮތް މިންވަރުގެ ކުޑަ މިސާލެކެވެ.
ރައްޔިތުންނަށް ހިލޭ ބޭސްފަރުވާ ކުރާ އާސަންދަ ނިޒާމަކީ އެއް ބަޔަކަށް ބޮޑު ވިޔަފާރިއެކެވެ. އެ ނިޒާމުން ނާޖާއިޒު ފައިދާ ހޯދުމާއި ޚިޔާނާތް ހިންގާފައިވާ ކަމަށް ކުރާ ތުހުމަތުތައް ސީރިއަސް އެވެ.
އާސަންދަ އަށް ކޮންމެ އަހަރަކު ވެސް ދައުލަތުން ވަކި ބަޖެޓެއް ކަނޑައަޅަ އެވެ. އެކަމަކު އަހަރު ނިމޭއިރު އެ ބަޖެޓަށް ވުރެ ގާތްގަނޑަކަށް 100 ޕަސެންޓް އިތުރަށް ދައުލަތުން އާސަންދަ އަށް ހޭދަކުރަން ޖެހެ އެވެ. މިދިޔަ އަހަރުގެ މާލީ ރިޕޯޓުގައިވާ ގޮތުން، ޑިސެމްބަރު 29ގެ ނިޔަލަށް އާސަންދަ އިން 1.4 ބިލިއަން ރުފިޔާ ހޭދަ ކުރި އެވެ. އެކަމަކު އާސަންދަ އަށް އަށް ކަނޑައެޅި ބަޖެޓަކީ 750 މިލިއަން ރުފިޔާ އެވެ.
ނުފޫޒު ވަދެ، ނިޒާމް ބޮއްސުންލާފައި!
އާސަންދަ ނިޒާމުގައި ހުރި މައްސަލަތަކާ މެދު ކަންބޮޑުވުން ފާޅުކުރައްވައި ހެލްތު މިނިސްޓަރު އަބްދުﷲ އަމީން "މިހާރު" އަށް ވިދާޅުވީ ނިމިގެން ދިޔަ ސަރުކާރުގައި ވެސް އާސަންދައިން ހޭދަކުރި ގޮތާ މެދު ސުވާލު އުފެދޭ ކަމަށެވެ. އެ ނިޒާމުން ޚިޔާނާތުގެ އަމަލުތައް ވެސް ހިންގާފައިވާ ކަމަށް ތުހުމަތުކުރެވޭއިރު، އެ ތަފްސީލުތައް އެނގޭނީ ކަމާ ބެހޭ ފަރާތްތަކުގެ ތަހުގީގު ނިމުމުން ކަމަށް ވިދާޅުވި އެވެ.
"އެނގޭ މިންވަރަކީ އާސަންދަ އާއި އާސަންދައާ ގުޅުން ހުރި ކަންކަން ކޮށްފައި އޮތީ ދައުލަތަށާއި ރައްޔިތުންނަށް އެންމެ ފައިދާ ހުރި ގޮތަކަށް ނޫން ކަން. އޭގެ ތޭރޭގައި ސީދާ އިހުމާލުން ހިންގި ކަންކަން ހުރެދާނެ ކަމަށް ގަބޫލުކުރެވޭ. ނަހަމަ ގޮތުގައި ބޭނުންކޮށްފައި ވޭތޯ ނޫންތޯ އެނގޭނީ ތަހުގީގީ އިދާރާތަކަށް،" އަމީން ވިދާޅުވި އެވެ.
އަމީން "މިހާރު" އަށް އިންޓަވިއު ދެއްވަނީ. --ފޮޓޯ: ހުސެއިން ވަހީދު/މިހާރު
މިނިސްޓަރު ވިދާޅުވި ގޮތުގައި ނިޒާމުގައި ކަނޑައަޅާފައި އޮންނަ އުސޫލުން އެ ހިދުމަތުގައި ބައިވެރިވެ، ބޭނުން ކުރުމަށް ވުރެ ބޮޑަށް އޭގެ ތެރެއަށް ވަދެފައި ވަނީ ނުފޫޒެވެ. އެގޮތުން ދައުލަތުގެ ނިޒާމު، ނުވަތަ ހަމަޖެހިފައި އޮންނަ އުސޫލްތައް ބާއްވާފައި، ދައުލަތުގެ އިސް ބޭފުޅެއް، ވަޒީރެއް ނުވަތަ މަޖިލީސް މެމްބަރަކު ލައްވައި ކަންކަން ކުރުވާ އުސޫލަށް ފަރިތަވެފައި އޮތުމަކީ ކަންބޮޑުވުމެއް ކަމަށް ވިދާޅުވި އެވެ.
އަމީންގެ އަނެއް ކަންބޮޑުވުމަކީ، އާސަންދަ ނިޒާމް ވަރަށް ބޮޑު ވިޔަފާރިއަކަށް ބަދަލުވެފައި އޮތް މައްސަލަ އެވެ. ވިޔަފާރީގެ ޝައުގުވެރިކަމާ އެކު ފައިދާ ހޯދަން އެ ނިޒާމް ބޭންކުރަމުން ދިއުމަކީ ވަރަށް ބޮޑު ގޮންޖެހުމެއް ކަމަށް ވިދާޅުވި އެވެ.
ޚަރަދު ކުޑަކޮށް، ހިތްމަޖެހުން ގެނުވަނީ
އާސަންދަ ނިޒާމްގައި ހުރި މައްސަލަތައް ދެނެގަނެ، ބަދަލު ގެނައުމުގެ މަސައްކަތް ސަރުކާރުން މިހާރު ވަނީ ފަށައިފަ އެވެ. ބައެއް މައްސަލަތައް ފެންމަތިވެފައި ހުއްޓަސް ނިޒާމުގައި ހުރި މައިގަނޑު މައްސަލަތަކަކީ ކޮބައިކަން އަދި މުޅިން ދެނެގަނެވިފައެއް ނުވެ އެވެ.
ހައްލު ހޯދާއިރު ސަރުކާރުގެ ފުރަތަމަ ވިސްނުމަކީ، މިނިސްޓަރު ވިދާޅުވި ގޮތުގައި، އާސަންދަ ޚިދުމަތް އާއްމު ރައްޔިތުންނަށް ލިބުމުގައި ހުރި ގޮންޖެހުންތައް ނައްތާލުމެވެ. އެގޮތުން އެންމެ ބޭނުން ޖެހިފައި ތިބި މީހުންނަށް އާސަންދަ ޚިދުމަތް މެދުނުކެނޑި ލިބޭނެ ގޮތެއް ހަދަން ވަނީ ނިންމައިފަ އެވެ.
އެކި ބަލިތަކަށް ދާއިމީ ފަރުވާކުރަން ޖެހޭ މީހުންނަކީ އާސަންދަ މެދުނުކެނޑި ލިބެން ޖެހޭނެ ބައެއް ކަން މިނިސްޓަރު ގަބޫލުކުރައްވަ އެވެ.
މިނިސްޓަރު އަމީން އައިޖީއެމްއެޗުގެ އިސް ވެރިންނާ އެކު. --ފޮޓޯ/މިހާރު
އަމީން ވިދާޅުވި ގޮތުގައި ރާއްޖެ އިން ބޭރުގެ ހޮސްޕިޓަލްތައް އާސަންދަ ނިޒާމުގެ ތެރޭގައި ހިމެނި، ޚިދުމަތްތަކަށް އަގުކުރަނީ އެންމެ އެކަށީގެންވާ އަގުތޯ ވެސް ދެނެގަންނަން ޖެހެ އެވެ. ބޭސް އެތެރެކޮށް ވިއްކުމުގައި ވެސް އާސަންދަ އިން އަމަލުކުރާ އުސޫލަކީ ބަލަން ޖެހޭ ކަމެއް ކަމަށް ވިދާޅުވި އެވެ.
ކަންކަން ބަލައި މުރާޖައާކުރަން ވޭތުވެދިޔަ މަހެއްހާ ދުވަހަކީ ވަރަށް ކުރު މުއްދަތެއް ކަން މިނިސްޓަރު ފާހަގަކުރެއްވި އެވެ. މުޅި ސިއްހީ ނިޒާމަށް އާސަންދަ އިން ކުރާ ހޭދަ އަށް ބަލާއިރު، މިހާރަށް ވުރެ ބޮޑަށް ރައްޔިތުންނަށް ފައިދާވާ އަދި ދައުލަތަށް ލުއިވާ ގޮތަށް ނިޒާމަށް ބަދަލުތަކެއް އަންނާނެ ކަމަށް ވިދާޅުވި އެވެ.
އަމީން ވިދާޅުވި ގޮތުގައި އާސަންދަ އިން ކޮށްފައިވާ ތަޖުރިބާތައް ވެސް ދެނެގަންނަން ޖެހެ އެވެ.
"ވިޔަފާރީގެ ނުފޫޒު ބޭސްވެރިކަމުގެ ތެރޭގައި އޮތް މިންވަރު ކުޑަކުރުމަކީ އަމާޒެއް،" މިނިސްޓަރު ވިދާޅުވި އެވެ.
ގޮންޖެހުންތަކެއް ހުއްޓަސް، ސަރުކާރުން ކުރިއަށް ނެރޭ ވިސްނުންތަކާ އެކު ބަދަލުތަކެއް ގެނެވޭނެ ކަމަށް އަމީން ޔަގީން ކުރައްވަ އެވެ.
"އެއީ، ހަމައެކަނި ހެލްތު މިނިސްޓަރަށް ނުވަތަ މިނިސްޓްރީއަށް ހައްލު ކުރެވޭ ވަރަށް ވުރެ ބޮޑު ކަމެއް. އެ މަސައްކަތް އެބަ ދޭ. ނަތީޖާ ހާސިލްވާނެތޯ ސުވާލުކުރަން އަދި އަވަސް،" އަމީން ވިދާޅުވި އެވެ.
އިތުރު ލިޔުންތައް
މަގްބޫލް ލިޔުންތައް
Mihaaru Print Edition
Download Mihaaru News App
Offline Alerts
SMS 'sub mihaaru' to 5454
ކޮމެންޓްތައް
އަބްދޫ
09 January 2019
މަދަނަ އެއީ ދަިވެހި ދަވްލަތުން ބޭސްފަރުވާއަށް އުފެއްދި އިދާރާ . އޭރު ދަވްލަތުން ބޭސްކުރުވަނީ ސީދާ މަދަނަ ބަޖެޓުން. މިހާރު މި ހިންގާއާސަންދަ އަކީ އެލައިޑް ކުންފުނިން ހިންގާ ވިޔަފާރި ކުންފުންޏެއް. އެކަން އެގޮތަށް ކުރަންޖެހުނީ މަދަނައިން ބޭސްކުރުވާފަ ފައިސާ ނުދީ އޮތުމުން ބޭރުގެފަރާތްތަކުން ދިވެހި ސަރުކަރަށް ބޭސްކޮށްދިނުން ހުއްޓާލުމުން. މިހާރު އާސަންދަ އަިށް ބޭސް މިކޮށްދެނީ އެލައިޑް އިންސޫރަންސް ކުންފުނިން މިއީވެސް އެމްޑީޕީގެ ސަބަބުން ވީގެއްލުން.
ނަތޫ
09 January 2019
އާސަންދަ އެލައިޑް ގެ ދަށުން ވަކިވިތާ 3 އަހަރު ވަރު ވެދާނެ. ނޭނގޭ ވާހަކަ ދައްކާ އަދިވެސް.
ރެނދަން
08 January 2019
ޞިއްޙީ ޚިދުމަތްދިނުމުގެ ޤާނޫނުގެ ދަށުން ބޭސް ވިއްކޭނެ އެންމެ މަތީ އަގު ކަނޑައަޅަން ތިޔަ މިނިސްޓްރީ އަށް އޮންނަނީ ލާޒިމްކޮށްފަ. އެ ޒިންމާ އަދާކުރީމަ ރަނގަޅުވާނެ މޮޅެތި ވާހަކަ ނުދައްކާ.
ގުދުގުދާ
08 January 2019
އަޅުގަނޑަކީ ފާމަސިސްޓެއްގެ ގޮތުގައި 22 އަހަރު މަސައްކަތް ކޮށްފައިވާ މީހެއް! މީގެ އެއްއަހަރު ދުވަސް ކުރިން އަޅުގަނޑުގެ އިންޗާރޖް ކަމުގައި މަސައްކަތް ކުރި ފާމަސީއަކުން އާސަންދައިން ކުލިނިކާ އެއްބަސް ވެފައިވާ އަގުލިސްޓުން " ސެފިއޮރޮކްޝަމިން 500މގ" ގުޅައެއް 350ރ ހުރިކަން އެގިގެން ފާމަސީ ހިންގާ އިސްފަރާތުގެ ސަމާލުކަމަށް އެކަން ގެނައިން. ރީޓެއިލް އަގުގައި އެބޭސް ވިއްކޭނީ ގުޅައެއް 28ރ އަށް. ހުރިހާ ބޭސްތައްއިގޭ ޤާބިލް މީހުން އާސަންދައިގަ ނެތީމާ ވާގޮތް!
ކާމިލު
08 January 2019
އެމީހެއްގެ ބަހާއި އަމަލު ދިމާވާ މީހަކަށް ކަންކަން ކުރެވޭނެ. އަމީން މިހާރުވެސް ތިޔަ ވާހަކަ ދައްކަވަނީ ސަރީހަބަހުން ކަން އޮތްގޮތަށް އެއީ އަދި ކިތަންމެ ނިކަމެތި ހާލުގައި އެކަން އޮތަސް. އެހެންވީމަ ދެން އަަމަލުވެސް ރަނގަޅުވާނެ ކަމަށް ބެލެވެނީ.. ތި ތެދުވެރިކަމަށް ޝުކުރިއްޔާ އަމީން!
ހުށާމާ، ހެލްތު ވޯކަރު
08 January 2019
ނަސީބެއް ރައީސް އިބޫ ސިއްހަތު ވުޒާރާ ހިންގަވަން ޑަކްޓަރަކާ ހަވާލުނުކުރިކަން. ޑަކްޓަރުންގެ ގިނަ މީހުން މިފަދަ ކަންކަމުގައި އަބަދުވެސް އިސް ކުރަނީ އެމީހުންގެ ސާކަލްގައި އުޅޭ މީހުން އަދި ބުނާ އެއްޗެއް ވިޔަސް އަޑުއަހާނީ ހަމައެކަނި ޑަކްޓަަރެއްވިއްޔާ. އެމީހުންގެ ވިސްނުން އެހެންވީމަ ވަރަށް ޓެކުނިކަލް ވެފައި ވަށާ ނުޖެހޭ. އަމީންއައި ފަހުން ތިރިން ފެށިގެން މައްޗާ ހަމަޔަށް އެންމެންގެ އަޑުވެސް ދައުރުވޭ..،، އެހެންވީމާ މިފަދަ ކަންކަން ތިލަވަނީ..އަމީން ކަމުދޭ
ކުލަ ޔެލޯ ޔޯލަ
08 January 2019
އަމީން ނިކުމެ އެހެރީ ދިވެހި ރައްޔިތުންނަށް ޚިދުމަތްކޮށްދޭން އެއްވެސް ކުލައަކަށް ޕާޓީއަކަށް ނުބަލާ< ބަލަ އެމްޑީޕީގަ ތިބީ ދިވެހި ރައްޔިތުން ނޫންތަ ވަޒީރަކު ރަނގަޅު ކަމެއް ކޮށްދިނީމަ ބަލައި ނުގަންނަން؟ އެހެންވީމަ ހޮޅި ވާހަަކަ ނުދައްކާ< ރަނގަޅު މަސައްކަތަެއް ކޮށްދޭ ވަޒީރެއްވިއްޔާ އެމްޑީޕީއިން ބަލައިގަންނަނާނެ،
ރައްޔިތުންގެ ވިންދު
08 January 2019
އަޖާއިބު ވެދާނެ ހަމަ.. ކޮން އެމްޑީޕީއެކޭ މި ކިޔަނީ އިރުދެކޮޅަށް.. އެމްޑީޕީވެސް ބޮޑެއް ނުވާނެ ދިވެހި ރައްޔިތުންގެ ވިންދަށްވުރެ.. ދިވެހިރައްޔިތުންނަށް ރަނގަޅު ހިދުމަަށްކޮށްދޭން ނިކުމު ހުރި ހިވާގި ދަރިއެއްވިއްޔާ އެ މަސައްކަތްކުރަނީ ރައްޔިތުންގެ ވިންދާ އެއްގޮތަށް.. ރައްޔިތުންގެ ލޯބި ލިބޭނެ.. ޕާޓީއަކުން ނަޔަސް އަދި އަޔަސް އަޅުގަނޑުމެން އެފަދަ ކުއްޖެއް ބަލައިގަންނާނަން... ބަލަނީ މީހާގެ ބުރަދަނަށް.. ޕާޓީ ކުލައަކަށް ނޫން..
ފީލް
08 January 2019
އަމީނު ކޯއްޗެއް ކިޔާކަށް...ރ.އުނގޫފާރު ހޮސްޕިޓަލު މުޅިން ބޮއްސުންލާފި. އަންހެނުން ގޮވައިގެން ހަމުގެ ޑަކްޓަރަށް ދައްކަން ގޮއްސަ ނަންބަރު ނަގަން ކިޔޫގަ 2 ގަޑިއިރު. އެތާ ރިސެޕަޝަންގަ އެންމެ މީހެއް. ދެން ޑަކްޓަރު ރޫމަށް ވަންއިރު ތަރުޖަމާނެއް ނެތް..15 މިނިޓް ފަހުން ކުއްޖަކުއައީ..ކައުންޓަރުގަ ތިބޭކުދިން ރަނގަޅު މައުލޫމާތެއް ނުދޭ..ރީތިބަހުން މުއާމަލާތް ކުރަން އަމުދުން ނުވެސް އިނގޭ
ޙަސަން އަޙްމަދު
08 January 2019
އައިޖީއެމްއެޗް ފިޔަވައި އެންމެ ގިނަ ބަލިމީހުންނަށް ޚިދުމަތް ދެނީ ކުޅުދުއްފުށީ ހޮސްޕިޓަލުންކަމަށް އެންމެ ފުރަތަމަ އިއުތިރާފުވި މިނިސްޓަރަކީ އަމީން. އެހެންވެ ރާއްޖެތެރޭ ހޮސްޕިޓަލެއްގެ މުހިއްމުކަން މިވީހާތަނަށް އެންމެ ބޮޑަށް އަންދާޒާ ކުރެއްވި ބޭފުޅަކީ ތިޔައީ. ވަރަށް އުއްމީދު އާލާވި ކަމެއް އެއީ. ރަނގަޅު ކުރައްވާތި!
ފެކްޓްސް
08 January 2019
އާސަންދާ ތަޢާރަފްކުރުންވީ ވިޔަފާރިވެރީންނަށް އެވެރީންގެ ވިޔަފާރި ކުރިއެރުވުމަށް ލިބުނު ފުރުސަތަކަށް. ކުރީގަ 1ރ އަށް ލިބޭ ބޭސްގުޅަ 5ރ އަށް ބަދަލްވެގެން ގޮސްފައިމިވަނީ. އެއީ ފައިދާ ހޯދަން ވިޔަފާރި ކުރާ ކުންފުންޏަކަށް ނަހަދަންވީ. އިތުރަށް ގެންނަންޖެހޭ ބަދަލަކީ، މުއްސަދީންނާއި ސަރުކާރުތަކުގެ އިސްވެރީންނާއި މަޖިލީސް މެންބަރުންނަށް އާސަންދަ ނުދޭކަހަލަ އުސޫލެއް ހަދާ ނިކަމެތިންނަށް އެ ޚިދުމަތް ފުރިހަމަ ގޮތުގައި ފޯރުކޮށްދޭންވީ.
އޮޑިބެ
08 January 2019
ތިޔަ، އެއްވެސް ކަމެއް އަމީނުއަކަށް ނުވާނެ. އެހެން ކަމެއް ނުކޮށް ހެލްތް މިނިސްޓްރީ ސެކްޝަންތަކުގެ ހެޑުންގެ ގޮތުގައި ތިބި ވަގުންތައް އިހަށް ބޭރު ކުރެވޭތޯ ބަލާބަލަ.