ވެނެޒުއޭލާގެ އިދިކޮޅު ލީޑަރު ހުވާން ގުއޭޑޯ
05 ފެބުރުއަރީ 2019 - 10:42
4 comments
މެޑްރިޑް- ވެނެޒުއޭލާގެ އިދިކޮޅު ލީޑަރު ހުވާން ގުއޭޑޯއަކީ އެ ގައުމުގެ ވެރިޔާ ކަމަށް ބަލައިގަންނަން އެމެރިކާއިން ނިންމި ނިންމުމުގައި ޔޫރަޕިއަން ޔޫނިއަންގެ ގިނަ ގައުމުތަކުން ބައިވެރިވެއްޖެ އެވެ.
ވެނެޒުއޭލާގެ ގާނޫނީ ހައިސިއްޔަތު އޮތް ވެރިޔަކީ ގުއޭޑޯ ކަމަށް ބަލައިގަތް ގައުމުތަކުގެ ތެރޭގައި އިނގިރޭސިވިލާތާއި ޖަރުމަނާއި ފްރާންސާއި ސްޕެއިން ހިމެނެ އެވެ. އެގައުމުތަކުން ގުއޭޑޯ ބަލައިގަންނަން ނިންމީ ރިޔާސީ އިންތިހާބެއް އަލުން ބާއްވަން ވެނެޒުއޭލާގެ ރައީސް ނިކޮލަސް މަދޫރޯއަށް ދިން މުހުލަތު ހަމަވި އިރު އިންތިހާބު އިއުލާނު ނުކުރުމުންނެވެ.
ވެނެޒުއޭލާގެ މައްސަލައިގައި ދުނިޔޭގެ އެހެން ގިނަ މައްސަލަތަކެކޭ އެއްފަދައިން އެމެރިކާ އާއި އީޔޫއާ ތަފާތު ވިސްނުމެއް ގެންގުޅެނީ ރަޝިޔާ އާއި ޗައިނާއިންނެވެ.
"ވެނެޒުއޭލާގެ ރައްޔިތުންނަށް މިނިވަންކަމާއި ކުރިއެރުމާއި ހަމަޖެހުން ހޯދައިދިނުމަށް މިއަދުން ފެށިގެން އަހަރެމެން ނުކުރާ އެއްވެސް މަސައްކަތެއް ނުބާއްވާނަން،" ގުއޭޑޯ އަކީ ވަގުތީ ރައީސް ކަމަށް ސްޕެއިނުން ބަލައިގެންކަން އިއުލާނު ކުރައްވަމުން ސްޕެއިންގެ ބޮޑު ވަޒީރު ޕެޑްރޯ ސަންޗޭޒް ވިދާޅުވި އެވެ.
ވެނެޒުއޭލާގެ ނެޝަނަލް އެސެމްބްލީގެ ރައީސްގެ މަގާމުގައި ހުންނެވި ގުއޭޑޯއަކީ އެގައުމުގެ ވަގުތީ ވެރިޔާ ކަމަށް އަމިއްލަފުޅަށް އިއުލާނު ކުރެއްވީ މިދިޔަ ޖެނުއަރީމަހު އެވެ.
ލެޓިން އެމެރިކާ ސަރަހައްދުގެ ސަރަހައްދީ ހަރަކާތެއް ކަމަށްވާ ލީމާ ގްރޫޕްގައި ހިމެނޭ 14 ގައުމުގެ ތެރެއިން 11 ގައުމަކުން ވެސް ވަނީ ގުއޭޑޯ އަކީ ވެނެޒުއޭލާގެ ވަގުތީ ވެރިޔާ ކަަމަށް ބަލައިގެންފަ އެވެ. އެކަން ބަލައިގަތް ގައުމުތަކުގެ ތެރޭގައި ކެނެޑާ، ބްރެޒިލް، އާޖެންޓީނާ ހިމެނެ އެވެ.
ކެނެޑާގެ އޮޓާވާގައި އެ ގްރޫޕުން ބޭއްވި ބައްދަލުވުމަކަަށް ފަހު އެ ގްރޫޕުން ދުނިޔޭގެ ގައުމުތަކަށް ގޮވާލާފައި ވަނީ މަދޫރޯގެ ސަރުކާރުގެ މާލީ މުއާމަލާތްތައް ހުއްޓުވުމަށެވެ.
ގުއޭޑޯއަކީ ވަގުތީ ރައީސް ކަމަށް ބަލައިގަތް ގައުމުތަކަށް ރައްދު ދެމުން މަދޫރޯގެ ސަރުކާރުން ބުނީ އެއީ ވެނެޒުއޭލާގެ ގާނޫނީ ސަރުކާރު ވައްޓައިލަން އެމެރިކާއިން ކުރާ މަސައްކަތުގައި ބައިވެރިވުން ކަމަށެވެ. ވަކިން ހާއްސަކޮށް ސްޕެއިނަށް އަމާޒުކޮށް މަދޫރޯގެ ސަރުކާރުން ބުނީ އެގައުމުގެ ނިންމުމަކީ ފިނޑި ނިންމުމެއް ކަމަށެވެ.
އިތުރު ލިޔުންތައް
މަގްބޫލް ލިޔުންތައް
Mihaaru Print Edition
Download Mihaaru News App
Offline Alerts
SMS 'sub mihaaru' to 5454
ކޮމެންޓްތައް
ޓޯނީ މޮންޓާނާ
05 February 2019
ސީރިޔާގެ ރައީސް ބައްޝާރާ ދެކޮޅަށް އެގައުމުގެ ބަޔަކު މުޒާހަރާ ކުރި، އޮބާމާ ސަރުކާރުން ބައްޝާރު އިސްތިއުފާ ދޭންޖެހޭނޭ ކިޔާފަ ސީރިޔާ ފުރޭނދެން ހަތިޔާރު އޮއްސާލީ، ދެން އައިސިސް އުފެދި ސީރިޔާ ދާހިލީ ހަނގުރާމަ އަކަށް ވެއްޓި އެތަށް އަންހެނުން ރޭޕުކޮށް ގަނެވިއްކާ އެތައް ކުޑަކުދިން ނެތް މަރާ އެތަށް ބަޔަކު ބަނޑަށް މަރުވި ، ވެނެޒުއޭލާ އަށްވެސް ހަދަން އެ އުޅެނީ ހަމަ އެހެން، ޔޫރަޕާ އެމެރިކާގެ ފަރާތުން ވާގި އެދުން ދިވެހި ޕާޓީ ތަކަށް މަގޭ ވޯޓް ހަރާން.
ހޮޓްކިންގ
05 February 2019
އެމެރިކާއާއި އިނގިރޭސީން އަދި ކެނެޑާ ދުނިޔޭގައި ހަމަޖެނުން ނަގާލުމަށް ހިނގާ ހުރިހާ ކުށްތަކެއްގައި ބައިވެރިވާނެ އެއްމެ އިސްވެތިބެ.
ރަދީފް
05 February 2019
ސޯޝިއަލިސްޓް މަޑޫރޯގެ ވެރިކަމުގަ ގައުމުގެ އިގްތިސާދު ވަނީ އިނދަޖެހިފަ.ސޯޝިއަލިޒަމް ދިފާއުކުރުގެ ނަމުގަ ހުދްމުޙްތާރުވެރިކަމެއްކުރުން އެއީ ރަނގަޅުގޮތެއް ނޫން.2018 ގަ އިންފްލޭޝަން ރޭޓް 1.3 މިިލިއަން % ގަ ހުރުން އެއީ ރައްޔަތުންނަށް ލިބޭނެ ބޮޑު އަނިޔާއެއް.އުމުރުން 35 އަހަރުގެ ގުއޭޑޯއަށް ވެނެޒުއޭލާގެ ހާލަތު ބަދަލުކުރެވީދާނެބާ؟! އެމެރިކާ ބޭނުންވަނީ ވެނެޒުއޭލާގެ ތެލުގެ ރިޒާވާއި ކުޅެންނަމަ ގުއޭޑޯގެ ވެރިކަުގަ އެއީ ވަރަށް ފަސޭހަކަމަކަށް ވާނެ.#މަޑޫރޯއައުޓް
ތަމީމް
05 February 2019
އެމެރިކާ އާއި ހުޅަނގުގެ ކިތަންމެ ގިނަ ގައުމުތަކުން ދެކޮޅު ހެދި ނަމަވެސް، ވެނެޒުއޭލާގެ ރައީސަކީ ނިކޮލަސް މަދޫރޯ.! ވެނެޒުއޭލާއަށް ވެރިވެގަންނަން ހުޅަނގުން ބޭނުންވަނީ، އެ ގައުމުގެ ތެޔޮ ރިޒާވް ފޭރިގަތުމަށް.. ޑިމޮކްރަސީގެ ނަމުގައި "ޑިމޮކްރަސީ ވަޅުލުމަކީ" ބަލައިގަނެވޭނެ ކަމެއް ނޫން!!