ބާޒާރުމަތި: މާސްކް އަޅައިގެން، އެކަމަކު ތޮއްޖެހިފައި!

މާލޭގައި ކޮވިޑް-19 ގެ ކޭސްތަކުގެ އެންމެ ބޮޑު ކްލާސްޓާތައް ގުޅިފައި ވަނީ ބާޒާރުމައްޗާ އެވެ. އެހެންވެ ބާޒާރު މައްޗަށް ގޮސް އުޅުމުގައި އިތުރަށް ސަމާލުވާން ކަމާބެހޭ ފަރާތްތަކުން އަބަދު ވެސް އިރުޝާދު ދެ އެވެ. މާލެ ސަރަހައްދަށް އިއުލާން ކޮށްފައިވާ ލޮކްޑައުން އަށް މިދިޔަ ހޯމަ ދުވަހުން ފެށިގެން ލުއިތަކެއް ދީފައިވާއިރު އަނެއްކާ ވެސް ބާޒާރުމަތި ފެންނަނީ ވަރަށް ބާރު ބޮޑު ކޮށެވެ. އެކަމަކު ތޮއްޖެހިގެން ތިބި ނަމަވެސް އެންމެން ވެސް ތިބެނީ މާސްކް އަޅައިގެންނެވެ.

ބާޒާރުމަތީ ގިނަ ފިހާރަތަކެއް ކައިރީގައި ވެސް މީހުން ދުރުދުރުގައި ތިބެން ނިޝާންތަކެއް ކުރަހާފައި އެބަހުއްޓެވެ. މަސް މާރުކޭޓް ބޭރު، ޕޭވްމަންޓްގައި ވެސް އެފަދަ ނިޝާންތައް ކުރަހާފައި އެބަ ހުއްޓެވެ. ނަމަވެސް މީހުން ތިބެނީ ތޮއްޖެހިގެންނެވެ. އެ ނިޝާންތައް ބޭނުމެއް ނުކުރެ އެވެ. އެކަމަކު ގިނަ ބަޔަކު ތޮއްޖެހިގެން ތިބި ނަމަވެސް އެ އެންމެން ތިބެނީ މާސްކް އަޅައިގެންނެވެ.

ހެލްތު ޕްރޮޓެކްޝަން އެޖެންސީ (އެޗްޕީއޭ) އިން ލަފާ ދިނީ ބޭރުގައި އުޅޭއިރު މާސްކް އަޅައިގެން އުޅުމާ އެކު އެކަކު އަނެކަކާ ދެމެދު ތިން ފޫޓްގެ ދުރުމިނެއް ވެސް ބެހެއްޓުމަށެވެ. އެކަމަކު ބާޒާރުމަތިން ފެންނަނީ މާސްކް އެޅުމަށް އެންގި އެންގުމަށް އަމަލު ކުރިޔަސް ގައިދުރުކަން ބަހައްޓަން އަމަލު ނުކުރާތަނެވެ.

ބަޔަކު ބާޒާރުމަތީ ފިހާރައަކުން ވިޔަފާރި ކުރަނީ: މާސްކް އަޅައިގެން ތިއްބަސް ގައިދުރުކަމެއް ނުބަހައްޓާ-- ފޮޓޯ: ނިޝާން އަލީ/މިހާރު

ބާޒާރުމަތީގެ ޓްރެފިކް ބެލުމަށާއި ސަލާމަތީ ކަންކަން ބެލެހެއްޓުމަށް ފުލުހުން ހަރަކާތްތެރިވެ އެވެ. ނަމަވެސް ތޮއްޖެހިގެން އުޅޭ މީހުން ދުރު ކުރާ ތަނެއް ނުފެނެ އެވެ.

ބާޒާރުމައްޗަށް ބާރު ބޮޑު ވެފައިވާ ސަބަބު ކިޔައިދެމުން އުތުރުގެ ވިޔަފާރިވެރިއަކު ބުނީ ލޮކްޑައުންގެ ސަބަބުން އެ މީހުންގެ ރަށްރަށަށް ފޮނުވަން ޖެހޭ ގިނަ މުދާތަކެއް ހުރީ ނުފޮނުވި ކަމަށެވެ. އެހެންކަމުން އެ ރަށްރަށަށް ބޭނުންވާ މުދާ ވަނީ ހުސްވެފައި ކަމަށާއި ބާޒާރަށް ބާރު ބޮޑުވަނީ އެ މުދާތައް ގަންނަން ގިނަ ބަޔަކު އަންނާތީ ކަމަށް އޭނާ ބުންޏެވެ.

"ހުރިހާ ރަށަކަށް ވެސް ހަމަ މިގޮތަށް ދިމާވީ. އެހެންވީމަ އެންމެން ނުކުންނާނެ އެންނު ރަށަށް މުދާ ފޮނުވަން. ދެން އަސްލު ބުނި ގޮތް ހަދާތީ ދޯ މާސްކް އަޅައިގެން އެ ތިބެނީ. އެކަމަކު ތިބުނާ [ތޮއްޖެހުން] ކަންތައް ގޯސް،" ރަށުގައި ފިހާރަ ހިންގާ ވިޔަފާރިވެރިޔާ ބުންޏެވެ.

Bodethi cluster thah gulhifai vanee Baazaarumahchaa: Dr. Afzal

The most trusted news source in the Maldives

Mihaaru

ގިނަ ކްލަސްޓާތަކެއް ގުޅިފައި ވަނީ ބާޒާރު މައްޗާ ކަމަށް އެޗްޕީއޭއިން ބުނުން

ތޮއްޖެހިގެން ތިބުމުގެ އިތުރުން ތަކެތީގެ އަގު ބެލުމަށާއި ތާޒާކަން ބެލުމަށް ގިނަ ބަޔަކު ތަކެތީގައި އަތްލައި ވެސް ހަދަ އެވެ. އެގޮތަށް އަތް ލެވޭ ގޮތަށް ޑިސްޕްލޭގައި ތަރުކާރީ އާއި މޭވާގެ އިތުރުން އެހެން މުދާތައް ވެސް ކުރިއެކޭ އެއްގޮތަށް ބަހައްޓާފައި ހުރެ އެވެ. އެޗްޕީއޭއިން ވަނީ އެގޮތަށް ތަކެތީގައި އަތްލައި ނޫޅުމަށް ވެސް އަންގައިފަ އެވެ.

މާލޭގެ ފަޅުތެރޭގައި މިއަދު އޮތް މަސް ދޯންޏެއްގައި ތިބި ބަޔަކު މާސްކް ނާޅައި، ކޮވިޑް-19 އިން ރައްކާތެރިވުމުގެ އުސޫލާ ޚިލާފަށް ކައިރިކައިރީގައި.---ފޮޓޯ: ނިޝާން އަލީ/މިހާރު

ތޮއްޖެހިގެން އުޅޭ މައްސަލާގައި ވިޔަފާރިވެރިން ބުނަނީ އެ މީހުންނަށް އެކަން ކޮންޓްރޯލް ނުކުރެވޭނެ ކަމަށް ކަމަށެވެ. ލޮކްޑައުންގެ ފަހުން ކުރިއެކޭ އެއްގޮތަށް ވިޔަފާރި ކުރަން މީހުން ނާންނަ ކަމަށް ވެސް ބައެއް ވިޔަފާރިވެރިން ބުނެ އެވެ.

"ލޮކްޑައުންގައި ރަނގަޅު ކޮންމެ ވެސް ވަރަކަށް. މިހާރު 40 ޕަސެންޓް ދަށް ވެއްޖެ. މީހުން ވަރަށް ނާދޭ،" ބާޒާރު ފިނޮޅު ފިހާރައިގެ ސޭޓަކަށް ހުރި ބޭރު ސޭޓް ބުންޏެވެ.

ގިނަ ބަޔަކު ބާޒާރު މައްޗަށް އެއްވެ ވިޔަފާރި ކުރަނީ: ރައްކާތެރިވުމުގެ ގޮތުން މާސްކް އެޅިޔަސް އެހެން އުސޫލުތަކަށް އަމަލެއް ނުކުރޭ-- ފޮޓޯ: ނިޝާން އަލީ/މިހާރު

ރާއްޖޭން ކޮވިޑް-19 އަށް ޕޮޒިޓިވްވި ގިނަ މީހުންގެ ކްލާސްޓާތައް ގުޅެނީ ބާޒާރު މައްޗާ އެވެ. މާލޭގެ ބާޒާރުމަތީގެ ފިހާރަތަކުގެ ތެރެއިން އެމްއެޗްއޭ އާއި ލިލީ އަދި ބީއެޗްއެމް ޓްރޭޑާސްގެ މުވައްޒަފުންތަކެއް ވަނީ ކޮވިޑް-19 އަށް ޕޮޒިޓިވްވެފަ އެވެ. އޭގެ ތެރޭގައި ގިނަ އަދަދަކަށް ބިދޭސީން ހިމެނެ އެވެ.

ކޮވިޑް-19 އާ ގުޅިގެން އިއުލާން ކުރި ލޮކްޑައުން އަށް މިދިޔަ ހޯމަ ދުވަހުން ފެށިގެން ލުއިތަކެއް ދީފައިވާއިރު މިހާރު ހުއްދައަކާ ނުލައި ކޮންމެ ދުވަހެއްގެ ފަތިހު 5:00 އިން ރޭގަނޑު 10:00 ހަމައަށް ބޭރުގައި އުޅެވެ އެވެ. ލުއިތަކާއެކު ގިނަ ބަޔަކު ނުކުމެ ތޮއްޖެހިގެން އުޅޭތީ އެޗްޕީއޭއިން ވަނީ ކަންބޮޑުވުން ފާޅުކޮށްފަ އެވެ.